41.ª edición de la Selmana de les Lletres Asturianes

La Conseyería de Cultura, Política Llingüística y Turismu publicó’l programa de la Selmana de les Lletres Asturianes, l’eventu más importante alredor de la lliteratura n’asturianu y gallego-asturianu que se convoca n’Asturies. La cita, programada pal mes de mayu pasáu, aplazóse pola crisis provocada pola covid-19 y va celebrase la selmana del llunes 28 de setiembre al vienes 2 d’ochobre.

Na so 41 edición, la Selmana de les Lletres recupera la figura de la escritora María Teresa Villaverde, Tuxa (1882-1934), a quien homenaxa cola edición del llibru Postrer adiós. Prosa, poesía y teatru, y el documental Tuxa, tradición y sentimientu. El llibro, con una edición al cargu de Lluis Portal, y el documental van presentase’l llunes, día 28, na Casa de los Hevia, en Villaviciosa. Tuxa foi una escritora del Rexonalismu de la primer metá del sieglu XX qu’escribió poesía y narrativa, y firmó obres de teatru.

Al  Día del Llibru Asturianu, que se celebra’l vienres 2 d’ochobre, van sumase anguaño 47 llibreríes de toa Asturies, que van sacar los sos puestos a la cai y aplicar un 10 % de descuentu na compra de llibros y discos n’asturianu, amás de regalar un exemplar del mentáu Postrer adiós. Prosa, poesía y teatru, hasta fin d’existencies.

El martes 29 de setiembre va celebrase, na Sala Borrón d’Uviéu, el quintu concursu de microrrellatos improvisaos n’asturianu pa mocedá, y van presentase los llibros ganadores de los Premios Asturies Xoven de poesía, narrativa y testos teatrales 2019.

Na Casa de la Cultura d’A Veiga, el miércoles 30 de setiembre, y baxo’l xenéricu Homenaxe ás nosas lletras, va presentase’l númberu 11 de Trabatel. Revista eonaviega de lliteratura. Delles llibreríes del occidente asturianu van regalar la publicación cola compra de llibros o discos en gallego-asturianu.

El programa de la Selmana de les Lletres presenta como novedá’l Conciertu de les Lletres Asturianes, que baxo la dirección d’Óliver Díaz, va protagonizar la Orquesta Sinfónica del Principáu d’Asturies (OSPA) el llunes 28 nel Auditoriu Príncipe Felipe d’Uviéu. La OSPA va interpretar un programa con obres de compositores vinculaos con Asturies: Covadonga, de Facundo Viña, Tres danzas sinfónicas, de Julián Orbón, Asturias desde la distancia, de Jorge Muñiz, y Escenas asturianas, de Benito Lauret.

La protocolos de prevención a qu’obliga la crisis sanitaria condicionaron la programación de la Selmana de les Lletres y el formatu de los sos actos p’axustalos a les normes establecíes polos responsables sanitarios y garantizar al máximu la seguranza de los participantes y los usuarios.

(25 de septiembre de 2020)