Beatriz Redondo Viado gana’l Premiu ‘Máximo Fuertes Acevedo’ d’ensayu

Beatriz Redondo Viado resultó ganadora de la decimonovena edición del Premiu d’ensayu en llingua asturiana «Máximo Fuertes Acevedo», que concede la Conseyería d’Educación, Cultura y Deporte del Principáu d’Asturies.

La directora xeneral de Política Llingüística, Ana Fueyo Llaneza, presidió la reunión del xuráu, nel que participaron los escritores y investigadores Rafael Rodríguez Valdés, Cristóbal Ruitiña Testa, Lourdes Álvarez García, Hugo Cortina Fanjul y Marta Mori de Arriba. El premiu ta dotáu con 3.000 euros.

Ente les obres presentaes, el xuráu decidió, por unanimidá, conceder el galardón al testu tituláu Yá cuasi nunca lo facemos por amor. Conciencies mercenaries, destacando que se trata de «una obra bien estructurada que se sirve de la llingua asturiana pa reflexonar sobre un tema relevante y d’actualidá, como ye’l de les relaciones ente poder y medios de comunicación».

El testu ganador foi presentáu baxo’l seudónimu «Perra Tierra». Abierta la plica, l’autora resultó ser Beatriz Redondo Viado.

Beatriz Redondo Viado (El Remediu, Nava, 1976) ye llicenciada en Ciencies de la Información pola Universidá Complutense de Madrid, y en Filosofía (UNED). Redactora y collaboradora en dellos medios de comunicación asturianos (el selmanariu Les Noticies, del que foi directora; les revistesAtlánticaXXII o Muyeres Ateyabana; el periódicuDiagonal Asturies o la emisora Onda Cero Radio), ye autora del llibru xuvenil Qué ye que ye’l Tercer Mundu. Un viaxe del centru a les periferies (Ámbitu, 2004) y coautora xunto con Vanessa Gutiérrez del ensayu documental El país del silenciu (Ámbitu, 2007), que rellata la vida de delles muyeres asturianes nacíes a partir de 1910, centrándose nes sos esperiencies de la Guerra Civil.

La publicación nel selmanariu Les Notícies del reportaxe «El campu asturianu, en víes d’estinción» fíxola acreedora nel añu 2003 del Premiu «Enriqueta González Rubín» de periodismu n’asturianu, otorgáu pol Gobiernu del Principáu d’Asturies.

(27 de payares de 2013)