Cuadernos d’Ítaca

Cuadernos d’Ítaca

Alfonso Zapico

V Premiu de Cómic “Alfonso Iglesias”

Trabe

89 páxs.

///

Ye precisamente la so emigración forzada en busca de meyores vientos artísticos lo que reflexen, dalguna manera, estos cuadernos: una especie de diariu d’artista que va recoyendo aquelles pequenes hestories que l’autor va atopando nel so vagabundear, güei na so propia Asturies, mañana en Francia, Madrid o nel pasáu.

Según indicó nel so día el xuráu del gallardón, Cuadernos d’Ítaca destaca pola “profesionalidá que s’amuesa na obra d’acordies coles nueves tendencies europees”.

Alfonso Zapico (Blimea, 1981) estudió Artes Plástiques y Diseñu na Escuela d’Arte d’Uviéu, y trabaya como profesional gráficu dende l’añu 2006. Tien fecho ilustraciones, diseños, animaciones y campañes pa delles axencies de publicidá, editoriales y instituciones. Amás ye ilustrador de prensa en diarios asturianos (La Nueva España, Cuenca del Nalón…). N’asturianu publicó una tira cómica, Les pites de Grau, nel selmanariu Les Noticies.

Nel añu 2012,  ganó’l Premiu Nacional de Cómic, qu’otorga’l Ministeriu de Cultura, pola so obra Dublinés. Amás, ye ganador del Prix BD Romanesque Ville de Moulins (2007) y de los premios Haxtur (2008) y Josep Toutain (2010). Amás de collaborar en delles obres colectives, tien editaos cinco títulos: La guerre du professeur Bertenev (2006), Café Budapest (2008), Dublinés (2011), La ruta Joyce (2011) y El otro mar (2013).

El Centru Niemeyer acoyó nel añu 2013 la esposición Pasos alcontraos. “Un viaxe dibuxáu d’Alfonso Zapico!”, onde s’amosó información sobre l’autor blimeín, planches orixinales de Dublinés y La ruta Joyce y sesiones de dibuxu en vivo nes muries de la sala. Vive dende’l 2008 n’Angulema (Francia), na Maison des Auteurs, onde trabaya nel so últimu proyectu, La balada del norte, novela gráfica en dos tomos ambientada na revolución asturiana d’ochobre de 1934 y que’l primer volume va ver la lluz nel 2014.