Cincoxcinco= Vanessa Gutiérrez

(Urbiés, 1980). Diose a conocer como poeta nel añu 2003 con Onde seca l’agua (Trabe, 2003). Algama’l Premiu Teodoro Cuesta de poesía con La danza de la yedra (Trabe, 2004), convirtiéndose d’entós p’acá nún de los referentes de la nueva poesía asturiana. La so primer obra en narrativa fue Les palabres que te mando (Ámbitu,2006), a la que siguió, nel 2007, la obra El país del silenciu (Ámbitu); un ensayu documental sobre la vida de muyeres asturianes y sos esperiencies de la Guerra Civil.

Presentadora del magazine cultural Pieces na Televisión Pública Asturiana (TPA), tamién dirixe y presenta’l programa Entrelíneas dedicáu a la lliteratura en Punto Radio Asturias. Amás, ye colaboradora habitual del periódicu El Comercio y nel selmanariu Les Noticies. Ta acabante de presentar so última obra: La cama (Ámbitu, 2008).

1.      Proponga un menú lliterariu: entrada, platu principal y postre.

Depende del día, del estáu d’ánimu y de la dieta qu’ésti condicione, pero agora mesmo ocúrreseme, pensando n’invitar a dalgunos amigos, Soy una caja de Natalia Carrero, Claus y Lucas d’Ágota Kristof y La boca pobre de Flann O’Brien.

 2. ¿Cuálu foi l’ últimu llibru que sacasti en préstamu d’una biblioteca?

Hai muncho que descubrí qu’hai una patrimonialista en mi (por nun dicir una fetichista de los llibros), asina que nun me recuerdo porque, una vez que lleo una obra, necesito que siga siendo mía. Y la educación cristiana nun me permite robar, asina que voi arruinándome en compres…

3.      ¿Qué escena lliteraria-y vien nesti momentu a la cabeza?

Como me pilles cola garganta como  una saltadera por culpa la gripe, pienso agora na voltura que me tresmitía El viejo y el mar, d’Hemingway, cuando mazcaba’l pescao cruo…

4.      ¿Tiense namorao de dalgún personax lliterariu?

Ye mui difícil detectar cuándo ta una namorada y más si yá partes del conocimientu de que ye una ficción. Pero sí que m’atraen les vides y la personalidá de dellos escritores que fixeron de sí auténticos personaxes.

5.      Indique una triada de poetes.

Jaime Gil de Biedma, Adam Zagajewski y Sharon Olds, por dicir, porque podíemos tar faciendo tríades ensin aparar.

6.      ¿Cuála foi la Biblioteca la so vida?

La biblioteca de la mio vida voi faciéndola a midida que vivo y va conmigo, pero reconozo una querencia especial nos últimos años po la Biblioteca del Atenéu de Turón.

7.      ¿Con qué llibru despertaría l’amor a la llectura nun adolescente?

Depende de la persona, pero creo que cualquiera que nun tea escritu nin etiquetáu pensando en llectores adolescentes. A mi en so día gustóme Las guerras de nuestros antepasados de Delibes.

8.      Cite tres novelistes pa siguir por cualquier llector.

Podríen ser Haruki Murakami, Claudio Magris y H. G. Wells. (O non. Qué difícil ye reducir).

9.      Proponga una midida a favor de la difusión de la llectura.

Accesibilidá y promoción, que vien a ser lo mesmo.

10.   ¿Quiénes son los sos compositores o músicos favoritos?

Vamos “mutatis mutandi” porque interésenme momentos y obres en concreto. Agora toi espectante cola salida del primer discu de los asturianos Elle Belga. Pero, mira, acabo enterame de que Philip Glass va venir el 30 de mayu a Xixón, asina qu’aprovecho pa recomendarla cita. Y MattElliot pal 19 de marzu.

11.   ¿Hai dalguna llectura que-y marcara especialmente na vida?

Tán nello munches llectures pero autores tan distintos como Sylvia Plath, Julio Ramón Ribeyro, Al Berto, Salvatore Quasimodo, Peter Hanke, Marguerite Yourcenaur o la Duras, por exemplu, llegaron en momentos necesarios.

12.   ¿Sabría dicime qué ye un “tejuelo”?

¿El cartelín que se-yos pon en llombu a los llibros? Qué fees y poco útiles son les etiquetes, en xeneral, y cuánta anécdota graciosa por cuenta d’elles hai en particular.

13.   ¿Qué persona viva-y inspira más despreciu.

Desprecio l’actitú que lleva al despreciu asina que nun te puedo dicir. Amás, a les úniques persones que quiciás-yos fixese esi mal xestu nun voi tener ocasión de teneles delante.

14.   ¿A qué persona viva admira?

Estimo munches cualidaes en munches persones pero nada nun hai que me resulte tan estraordinario como pa resaltalo. Nun me gusta condenar nin elevar a los altares: nin tanto nin tan dello.

15.   De xuro que podría recomendanos la visión de, polo menos, tres películes.

París, Texas de Win Wenders, Blow up d’Antonioni (asina indirectamente tamién recomendamos a Cortázar) y Charlie y la fábrica de chocolate de Tim Burton.

16.   ¿Qué poema interpreta los sos sentimientos?

Son tantos… Pero anota Amor a primera vista de Wislawa Szymborska.

17.   ¿Cuáles son los sos nomes -de persona- favoritos?

A estes altures creo que yá quedó clara la mio mutabilidá por tener tendencia al condicional pero de nena adoraba la cercana rareza de Macrina porque forma parte de la mio historia.

18.   ¿Ta d’acuerdu cola aplicación d’un canon pol préstamu en biblioteques?

Rotundamente non.

19.     Los artistes más admiraos son…

Los que tienen concentren rigor, honestidá y coherencia.

20.   L’últimu llibru que compró foi…

Hai poco llegué con un par que nun sé si son exactamente los últimos: El mal absoluto de Pietro Citati y Amigos y amantes d’Iris Murdoch.

21.   ¿Podría dicinos cómo ordena la so biblioteca personal?

Intento ordenar más o menos por xéneros, pero desordénola caóticamente por apetencies.

22.   ¿Ónde-y prestaría vivir?

Onde’l corazón me lleve, como’l títulu de la novela de Susanna Tamaro.

23.   Pal so entender ¿cuála ye la meyor obra lliteraria adaptada pal cine?

Entiendo poco, pa ser sincera, pero dalgo tendrá l’adaptación de Blade Runner cuando tol mundu la cita.

24.   ¿Qué ta lleendo actualmente?

Numbérote la mesina que tengo al par de la cama coles llectures y rellectures: Revolución en el jardín de Jorge Ibargüengoitia, Dietario voluble de Vila-Matas y El miedo d’Al Berto.

25.   ¿Pa qué sirve la llectura?

Pa que podamos conxugar “conocer” en toles persones del verbu y en tolos tiempos verbales.

(Publicado en Biblioasturias12)