La Biblioteca de Les Vegues (Corvera) acueye un nuevu “Veranu Lliterariu”

Veranu Lliterariu ye una actividá de promoción y animación a la llectura de lliteratura infantil n’asturianu, organizada pola Casa de la Llingua-Serviciu de Normalización Llingüística de Corvera, que va desarrollase a lo llargo de los meses de xunetu y agostu na Biblioteca de Las Vegas/Les Vegues.

Tala actividá, d’asistencia llibre y gratuita, consiste n’alcuentros ente escritores y tolos/es neños/es que quieran asistir; cada escritor acerca y cuenta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos.

Faciendo un esfuerzu por mostrar la diversidá y pluralidá de la lliteratura infantil n’asturianu, nesta tercer edición los/es más de los/es escritores ye la primer vez que participen nella, sacando l’escritor candasín Xurde Fernández y l’escritor corveranu Berto García, que yá tuvieron presentes n’ediciones anteriores de Veranu Lliterariu.

Los alcuentros van facese tolos llunes de xunetu y agostu n’horariu de les 11:30 a les 12:30 hores. El calendariu de participación de les y los escritores ye’l que s’indica darréu:

Llunes 7 de xunetu:

Carla Perucho

Llunes 14 de xunetu:

Xuan Carlos Crespos Lanchas

Llunes 21 de xunetu:

María Xesús Guillón

Llunes 28 de xunetu:

Esther García

Llunes 4 d’agostu:

Xurde Fernández Fernández

Llunes 11 d’agostu:

Berto García