Cincoxcinco= Berto García

Berto García naz en Les Vegues (Corvera), en 1975, y hasta la fecha tien seis poemarios editaos: Ensin otra sida (Trabe, 2005), Treslallende (Trabe, 2007) [escritu a medies con Carlos Suari], Manual contra’l vacíu (Trabe, 2008) [Premiu Fernán Coronas 2007], Cuando’l mundu debala (Academia de la Llingua Asturiana, 2011) [Premiu Llorienzu Novo Mier 2009], Inercia (Trabe, 2013) y Tendal (Suburbia, 2013). Tien amás bien d’obra espardío peles revistes lliteraries del país, como: El Canciu’l Cuélebre, Lletres Asturianes, Lliteratura, Formientu, Lletres Lliterariu o Entellunu, y nes antoloxíes Pa[i]saxes y Cuando la memoria fala. Como traductor fixo,  na estaya de la lliteratura infantil, pa la editorial Cumio, les tornes de los llibros Florenta, la gata poeta y Les fábules de Leonardo da Vinci. Amás, ye’l responsable de la compilación de poesía contemporánea n’aturianu, Contra’l silenciu, editada de recién por Suburbia Ediciones.

1. Propón un menú lliterariu: entrada, platu principal y postre.

De entrada, un  relatu. Por exemplu cualisquiera de los del llibru de Miguel Rojo, Tienes una tritura nos güeyos que me fae mal, o de La casa y otros cuentos, de María Teresa González.  Como platu principal, Díes de muncho, d’Antón García y pa finar, como postre, unos h.aikus, a mou de tabla de tartes o pastelinos.

2. ¿Cuál foi l’últimu llibru que sacasti en préstamu d’una biblioteca?

Un poemariu de David González, La carretera roja, pa una rellectura.

3. ¿Qué escena lliteraria te vien nesti momentu a la cabeza?

La de Don Quixote lluchando escontra los molinos que yeren xigantes. Una imaxe, o una realidá, mui actual y testerona na nuesa sociedá.

4. ¿Tienes namoraote de dalgún personaxe lliterariu?

Non, de nengún. Anque de xuru que tamién alloriaría col cantar de les serenes, como Ulises.

5. Indica una triada de poetes.

David González, Mirian Reyes y Luis García Montero

6. ¿Cuála foi la Biblioteca la to vida?

La de Les Vegues, en Corvera. Siempre ehí, al llau de casa. Nella de nenu averéme a un mundu perinteresante, el de la lliteratura, pente medies de: Los cinco, Tintín, Astérix, etc. y yá más de mozu siguí percorriendo esi camín, de la mano, principalmente, de la poesía.

 7. ¿Con qué llibru despertaríes l’amor a la llectura nun adolescente?

Esta respuesta ye mui difícil, yo  diría Cien años de soledá y a él-y prestaría dalgún de Federico Moccia; yo-y propondría cualisquiera de los poemarios de David González, y ella lleería 50 sombres de Grey. Ye una edá mui complicada y la lliterartura ye cuestión de gustos, y l’afición pola llectura debería venir dende muncho enantes, dende la infancia y los primeros años. Ehí ye onde hai qu’averalos a los llibros y les llectures.

8. Cita trés novelistes pa siguir por cualquier llector.

Gabriel García Márquez, Mario Vargas – Llosa y Ana María Matute

9. Propón una midida a favor de la difusión de la llectura.

Voi proponer un par d’elles, mui cencielles. En casa, una mui cenciella: lleer un cuentu toles nueches a los nenos enantes de durmir. La segunda: fomentar nes escueles, nos nenos, la creación, al traviés de talleres de poesía y narrativa. Con posterior llectura d’esos testos al restu de la clase. Incluso una edición d’esos trabayos pa compartilos col restu’l Colexu.

10. ¿Quiénes son los tos compositores o músicos favoritos?

Ente los músicos: Bruce Springsteen, Gordon Summer (Sting) o The Beatles y como compositores, ye mui difícil la eleición, pero quiciabes: Vivaldi, Mozart y Grieg.

11. ¿Hai dalguna llectura que te marcare especialmente na vida?

Asina, faciendo alcordanza Réquiem por un campesino español, de Ramón J. Sénder. Un llibru d’esos que yeren llectura obligatoria nel institutu, y que foi mui interesante.

12. ¿A qué autor rescataríes del olvidu?

De los autores n’asturianu, pémeque ye necesariu rescatar a toos. Y d’ente los autores en castellán, quiciabes a Juan Ramón Jiménez, na so dimensión como poeta. Nada conocida y de gran altor.

13. De xuru que podríes recomendanos la visión de, polo menos, trés películes.

K-Pax, Million Dolar Baby y Ben – Hur, por exemplu.

14. ¿Qué poema interpreta los tos sentimientos?

Pues ún distintu en cada momentu. Agora mesmu, esti de Marta Mori:

SIEMPRE

Masque me sientas dicir siempre,

has de saber

que naide sabe ónde empieza siempre

nin ónde acaba;

que siempre ye namás el nome

que-y pongo al desconciertu

cuando tu nun tas conmigo;

pues siempre

tien la esacta duración de los tos güeyos

llimpiándome de culpes,

y pasa sele,

sele y con procuru,

mirando por nun abrir la puerta

que pudiera llevanos

pa siempre fuera d’esti siempre.

15. ¿Cuáles son los tos nomes -de persona- favoritos?

Deva y Nel. Los nomes de los mios fíos.

16. ¿A qué sitiu salíu de la imaxinación d’un autor te gustaría treslladate?

A munchos, d’ente ellos davezu a la islla a la que Daniel Defoe fizo que llegare’l náufragu Robinson Crusoe.

17. Los artistes más admiraos son…

Munchos:  los directores Clint Eastwood y Tim Burton; los pintores Van Gogh, Matisse, Cezanne, …; y a los grandes compositores de la historia: Bethoven, Haendel, Dvorak, etc.

18. L’últimu llibru que comprasti foi…

Ún de lliteratura infantil pa la mio fía Deva. El poema que cayó a la mar, d’Aurelio González Ovies. Editáu por Pintar-Pintar, editorial asturiana de gran calidá.

19. ¿Puede l’e-book reemplazar al formatu clásicu?

Non, nun creo que llegue nunca esi momentu. Pue ser l’e-book una alternativa y convivir los dos formatos a la mema vegada. Pero la maxa, el golor del llibru físicu, en papel, nunca va desapaecer.

20. ¿Podríes dicinos cómo ordenes la to biblioteca personal?

De los estantes que me dexen llibres los llibros de lo mios fíos, los mios llibros ordénolos en catellán: novela y poesía; lo mesmo n’asturianu. Y estos sigún autores, n’orde alfabéticu. Otros estantes queden pa llibros teúnicos y de consulta,  d’etnografía, música tradicional, toponimia, etc.

21. ¿Ónde te prestaría vivir?

Dacuando nun país de clima bonal y tropical, como: Puerto Rico, República Dominicana, Trinidá  y Tobagu o Xamaica. Otres veces, en países modernos y civilizaos del norte d’Europa, como: Noruega, Suecia, Finlandia o Dinamarca. Pero mientres me decido sigo equí, nesti proyeutu inacabáu de país llamáu Asturies.

22. ¿A qué persona viva almires?

Nun soi de munches referencies personales, nin d’idolatrar a naide, pero gústame la capacidá d’esfuerzu, el saber llevantase y el saber tar del tenista Rafa Nadal.

23. Pal to entender ¿cuála ye la meyor obra lliteraria adaptada pal cine?

 L’Ültimu Mohicanu, de James Fennimore Cooper. Dirixida en 1992 por Michael Mann.

24. ¿Qué tas lleendo actualmente?

Superficie del silenciu, de Ricardo Candás. Poemariu que ganó nel 2013 el Xuan María Acebal de poesía.

25 ¿Pa qué sirve la llectura?

Como un placebu, la llectura ye un actu de lliberación, que val p’afuxir del ruxerrux que t’alloria, del llaberintu en qu’espiertes cada mañana, una técnica anti-estress, como’l Yoga o’l Pilates, pa desconectar, relaxate…   alendar.

 Contra’l Silenciu

Berto García

Suburbia

148 páxs.

///

Contra’l Silenciu supón el númberu 13 de la colección de poesía males tierres de Suburbia Ediciones. Una obra -cuya esbilla y compilación débense al tamién poeta Berto García- qu’amuesa un completu panorama de tola poesía espublizada en llingua asturiana dende los tiempos del Surdimientu hasta anguaño. Nella apaecen tolos poetes  xunto cola mención a toles sos obres espublizaes, y ún poema de cada autor seleccionáu por Berto García. En palabres del compilador: “Esti llibru ye una cenciella pero, al empar, completa esbilla de poesía del Surdimientu, cola qu’afitar que l’asturianu tien una puerta abierta al futuru. Esta compilación quier ser una referencia, un puntu d’arrinque pa quien s’avere a la poesía en Llingua Asturiana; un escaparate onde poder ver lo meyor de la creación na poesía llariega y qu’afale l’enclín por siguir conociendo y andando’l camín de la poesía contemporánea n’asturianu. Frutu d’un llargu procesu d’afondamientu tienes, agora nes tos manes llector, una amuesa d’esta estaya de la lliteratura, na nuesa llingua, nos últimos trenta años.”

(2 xunetu 2014)