Cincoxcinco= Pablo Rodríguez Medina

Llicenciáu en Filoloxía Hispánica y Especialista en Filoloxía Asturiana, Pablo Rodríguez Medina (L’Entregu, 1978) ye too un fenómenu lliterariu n’Asturies. Escritor billingüe, les sos obres algamaron delles distinciones tanto nel ámbitu rexonal como nel nacional e internacional. Combina tamién dellos xéneros: la narrativa, con obres como Los paraísos perdíos y Ente semeyances; la poesía, con poemarios como Los desconocedores del agua y Aires de mudanza; y el teatru, con obres como Martema. Historia d’una guerra, retratu d’unes culpes, El Santu y Orbaya. En castellán tien publicao títulos como El desorden en los vientos, La arena tras tus ojos y Los laberintos del humo. Ente los sos trabayos últimos destaquen La edad de los caminos y Vivir ensin probalo.

1. Proponga un menú lliterariu: entrada, platu principal y postre.

Entrada: dalgo llixero (un microcuentu, unos versinos de Seferis…); un bon platu de cocíu (una novela clásica, una colección de relatos, bona prosa, de lo que pases páxines y nun te das cuenta) y de postre unosversos d’esos que saborees tiempu y tiempu… Los de Chechu García, por exemplu.

2. ¿Cuálu foi l’ últimu llibru que sacasti en préstamu d’una biblioteca?

Una novela gráfica suprema: Nonnonba de Shigeru Muzuki.

3. ¿Qué escena lliteraria-y vien nesti momentu a la cabeza?

Cuando Edmon Dantés dubia del so cometíu al morrer nel so torbolín de venganza un inocente y regresa a la isla de If pa visitar la prisión y sal reforzáu y cola conciencia clara de que tien una misión que cumplir: la so venganza.

4. ¿Tiense namorao de dalgún personax lliterariu?

Sí, del amor, sobre too cuando vien adobáu con ciertu erotismu.

5. Indique una triada de poetes.

Seferis, Chechu García, José Emilio Pacheco.

6. ¿Cuála foi la Biblioteca la so vida?

La que permanez na mollera: los llibros que me lleeron de nenu y yo nun soi p’atopalos agora; les hestories que me contaron los mios güelos; los llibros que que me dexaron un rastru pa volver a ellos y siguilos lleendo.

7. ¿Con qué llibru despertaría l’amor a la llectura nun adolescente?

Nun sé. Cada persona ye un mundu y un adolescente un mundu inestable.

8. Cite tres novelistes pa siguir por cualquier llector.

¿Namás tres? García Márquez, Marco Denevi y Juan Rulfo. (Dos d’ellos tán muertos, asina que podemos sigui-yos la pista fácil).

9. Proponga una midida a favor de la difusión de la llectura.

Que la prohiban. En viendo que toles midíes a favor nun valen pa nada… Amás, les coses prohibíes tienen más morbu y consúmense y enganchen.

10. ¿Quiénes son los sos compositores o músicos favoritos?

Toos lo que beben de les fontes popularesy dan-y el gustu de lo popular: Compay Segundo, Ambás, Cesaria Evora, Tuenda, Maria Bethania… Los que saben fusionar dellos estilos: Manu Chao, Soncai System, Carlinhos Brown.

11. ¿Hai dalguna llectura que-y marcara especialmente na vida?

Aparte de la de la escritura de la casa y la de los votos matrimoniales, Cien años de soledad y Las aventuras del Baron de Muchausen.

12. ¿A qué autor rescataría del escaezu?

Nun m’alcuerdo. Ye un pocoñín difícil rescatar del escaezu daqué; sicasí, quiciabes autores nuestros: Acebal, Marirreguera… Autores de gran valir y que mui pocos conocemos.

13. De xuro que podría recomendanos la visión de, polo menos, tres películes.

Amelie, El milagro de P. Tinto y Amanece que no es poco. Tres películes que me presta ver davezu porque cada vegada que les veo sáco-yos coses nueves.

14. Qué poema interpreta los sos sentimientos?

Mitologías, de Seferis.

15. ¿Cuáles son los sos nomes -de persona- favoritos?

Gael, Deva, Izan, Ángel… Los nomes del futuru. Los de los neños qu’hai en casa agora.

16. ¿A qué llugar salíu de la imaxinación d’un autor-y gustaría treslladase?

A Macondo, yendo per vía Comala tres de pasar peles ciudaes invisibles.

17. Los artistes más admiraos son…

Los artistes populares que faen coses cotidianes: les costureres, los homes que llevantaron los horros y les paneres, los que tallaron la madera y los canteros que ficieron casones palaciegues que lleguen a fundise col paisaxe.

18. L’últimu llibru que compró foi…

Una montonera d’ellos nel rastru. L’últimu d’ellos Los cuentos maravillosos d’hoy y de siempre de James Riordan onde acabo atopar un cuentu que me sentí en clas de nenu y tres del que llevaba tiempu. Tengo mieu lleelu por perder la imaxe del recuerdu que guardo d’él.

19. ¿Pue l’e-book reemplazar al formatu clásicu?

Evidentemente. Primero daráse un procesu de sustitución y adulces va dir pasando al nuevu formatu que revolucionará tol sector que conocemos: la recepción, la edición, etc.: lo mesmo que pasó cola cámara y les cámares dixitales, que les máquines d’escribir y los ordenadores, etc. Con too y con ello el llibru físicu siguirá esistiendo, en menor midida, camiento.

20. ¿Podría dicinos cómo ordena la so biblioteca personal?

La mio biblioteca ye un mostruu informe nel que s’apilen volúmes. Ordénola rezando pa que nun se derrumbe una pila llibros y me dexe enterráu ente los poetes polacos, les noveles de Dumas, London, Sabatini, los porfolios y los folletos de la Revista Semanal Novelas y Cuentos.

21. ¿Ónde-y prestaría vivir?

Soi de L’Entregu. Prestaríame vivir equí siempres, col permisu de los vecinos.

22. ¿A qué persona viva admira?

A mio pá. Ye’l mio pequeñu héroe cotidianu. Él sabe por qué. Ye un exemplu del paisanu que quiero ser. L’espeyu nel que me miro dacuando pa ver que nun erro nel camín.

23. Pal so entender ¿cuála ye la meyor obra lliteraria adaptada pal cine?

La leyenda de Sleepy Hollow: ente otres coses porque nun se paecen en nada. El director supo enaltecer una producción lliteraria pequeñina y upala a una obra d’arte con estilu propiu.

24. ¿Qué ta lleendo actualmente?

Tolo que cai nes mios manes. Toi rematando una antoloxía de microcuentos, que son bien abegoses de lleer porque pa disfrutalos hai que se concentrar en caún.

25. ¿Pa qué sirve la llectura?

¿Hai que se lo plantear? Les coses bones nun suelen tener sentíu. ¿Pa qué sirve l’amor? Los dos, cuento, sirven p’aprendenos a ser.

(Publicado en Biblioasturias16)