Cincoxcinco= Ricardo Candás

Ricardo Candás (Xixón, 1977) ye llicenciáu en Filosofía pola Universidá d’Uviéu y nel so curriculum como escritor destaca como ganador de dalgunos de los premios más prestixosos del panorama poéticu asturianu, como’l “Fernán Coronas”  col poemariu Quiciás seya payares; el “Llorienzu Novo Mier”  cola obra Nos díes pensatibles y el “Nené Losada Rico”  col poemariu Naufraxos. Como narrador estrenóse col volume de cuentos Les últimes pallabres (2010). Sicasí, la so última entrega lliteraria ye’l poemariu Superficie del silenciu, editáu por Trabe, col que se convirtió en ganador de la decimonovena edición del Premiu “Xuan María Acebal” de poesía n’asturianu. Una obra de la que’l xuráu destacó “la solidez d’una obra unitaria que crea una atmósfera de sensaciones alredor de la memoria, el destín y el presente, estableciendo un diálogu ente la voz y el silenciu”.

1. Propón un menú lliterariu: entrada, platu principal y postre.

Un viejo que leía novelas de amor, de Luis Sepúlveda (porque como entrante ye una novelina llixera, mui bien escrita qu’entra rápido). Sociofobia, de César Rendueles (porque como platu principal ye una obra tipu ensayu densa, que convién echa-y tiempu pa saborgala como tien que ser). La mala suerte, d’Esther Prieto (porque hai versos prestosos que te dexen un tastu guapo na boca; una pena que nun tenga muncha obra poética espublizada esta autora porque ye interesante la so poesía)

2. ¿Cuál foi l’últimu llibru que sacasti en préstamu d’una biblioteca?

L’antoloxía de poemes Poesía amatoria fecha pol propiu autor José Manuel Caballero Bonald.

3. ¿Qué escena lliteraria te vien nesti momentu a la cabeza?

La de Gregorio Samsa cuando se decata de que ta tresformáu en bichu asquerosu (na Metamorfosis de Kafka).

4. ¿Tienes namoraote de dalgún personaxe lliterariu?

Cuando lleí Clara y la penumbra, de José Carlos Somoza, empatizaba muncho cola so protagonista Clara Reyes y daben ganes de metese nel llibru pa que nun-y pasara nada nesi mundu tan deshumanizáu que nos presenta Somoza. Supongo que ye lo más paecío a namorame d’un personaxe.

5. Indica una triada de poetes.

José Manuel Caballero Bonald, José Ángel Valente y Luis Cernuda.

6. ¿Cuála foi la Biblioteca la to vida?

Los llibros más bien probetayos que teníemos nuna estantería en casa cuando yo yera rapazucu. Yeren de temes diversos y munchos los agarraba pa ver les semeyes que trayíen y lleer pies de foto. Quiciás nun yeren lliterariamente los meyores, pero fueron el primer contactu col mundu de los llibros.

7. ¿Con qué llibru despertaríes l’amor a la llectura nun adolescente?

Ye difícil dicir. Quiciás con Cuentos de la taberna del ciervo blanco d’Arthur C. Clarke. Ye un conxuntu de cuentos más o menos de ciencia ficción o futurismu que te puen facer pensar un poco sobre’l mundo en que vivimos o p’hacia ónde avanza la sociedá. Como son cuentos curtios y tan escritos en clave d’humor (si mal nun recuerdo), la llectura ye más relaxada, cenciella y prestosa.

8. Cita trés novelistes pa siguir por cualquier llector.

José Luis Sampedro, Gabriel García Márquez y Antón García.

9. Propón una midida a favor de la difusión de la llectura.

Crear cuentos personalizaos, ye dicir, escribir cuentos onde los personaxes se llamen como neños reales o la hestoria asoceda nes ciudaes o colexos reales de los neños y regala-yoslos a los neños reales qu’apaecen nes hestories al entamu del cursu académicu pa que, cuando los llean, los vivan como si en verdá tuvieren experimentando eses hestories. Too esto podría sufragase col sueldu de Wert.

10. ¿Quiénes son los tos compositores o músicos favoritos?

Silvio Rodríguez y el desapaecíu grupu «Los piratas»

11.  ¿Hai dalguna llectura que te marcare especialmente na vida?

Una antoloxía de los poetes del 27 que tengo en casa. Albidro que m’enganché a la poesía gracies a ella.

12. ¿A qué autor rescataríes del olvidu?

A Alberto Vega, poeta llangreanu yá fallecíu pero que tien una obra bien orixinal ya interesante.

13. De xuru que podríes recomendanos la visión de, polo menos, tres películes

El secreto de sus ojos, 7 cajas y El efecto mariposa.

14. ¿Qué poema interpreta los tos sentimientos?

Depende del momentu.

15. ¿Cuáles son los tos nomes -de persona- favoritos?

Llara.

16. ¿A qué sitiu salíu de la imaxinación d’un autor te gustaría treslladate?

A cualquiera mientres lleo’l llibru.

17. Los artistes más almiraos son…

Silvio Rodríguez como cantante. A Sorolla como pintor. A Caballero Bonald como escritor.

18. L’últimu llibru que comprasti foi…

Sociofobia, de César Rendueles

En difusión y en ventes sí. Pero nesi aspectu psicolóxicu d’otorga-y valor emotivu o sentimental, nun lo creo. Nun e-book nun pues escribir una dedicatoria, nin atopar depués d’años dalguna ayalguina ente les sos páxines qu’escondiesti tu o dalguién cercanu a ti y yá nun t’alcordabes… esta posibilidá de solmenar psicolóxicamente (pa bien o pa mal) nun te la pue ufrir l’e-book.

20. ¿Podríes dicinos cómo ordenes la to biblioteca personal?

Por xéneros. O esa ye la idea.

21. ¿Ónde te prestaría vivir?

N’Asturies.

22. ¿A qué persona viva almires?

Como músicu y poeta almiro a Silvio Rodríguez. Tien canciones que nun tienen nada qu’envidiar a poemes de los meyores escritores.

23. Pal to entender ¿cuála ye la meyor obra lliteraria adaptada pal cine?

El secreto de sus ojos tien pinta de ser una de les meyores. Nel guion de la mesma participó’l propiu escritor de la obra na que ta basada (La pregunta de sus ojos).

Toi relleendo Cien años de soledad, que facía munchos años que la lleera y ye’l meyor homenaxe que-y podemos dar al so autor esti añu.

25. ¿Pa qué sirve la llectura?

Pa enanchar de mou dignu la vida tan probetaya y mísera que tenemos nesti universu.

Superficie del Silenciu

Ricardo Candás

Trabe

81 páxs.

///

Superficie del silenciu ye una obra fecha cola solidez de l’argamasa pero tamién col desconsuelu del adultu qu’escribe y que sabe qu’«El neñu que fui / duerme nos terruños del pasáu». La memoria y el destín, tamién el presente, son el filu que da unidá a esti poemariu enllén d’imáxenes que son a crear un mundu de sensaciones qu’apoderen a quien llee.

(12 de agosto 2014)