Cincoxcinco= Alejandro Fernández-Osorio

Alejandro Fernández-Osorio (Villayana, Asturies, 1984). Llicenciáu en Psicoloxía pola Universidá de Salamanca y especialista en Psicoterapia Psicoanalítica, ye Máster n’Estudios Lliterarios pola Universidá Complutense de Madrid. En 2008 publica’l so primer poemariu, La exactitud del instante; en 2012 apaez Frontería —Premiu Asturias Xoven de Poesía 2011—. Magaya, acabante de ser publicáu por Impronta, ye’l so tercer poemariu asoleyáu.

1. Propón un menú lliterariu: entrada, platu principal y postre.

Entrada: En tierras bajas, d’Herta Müller. Principal: Moby Dick de Melville. Postre: un llectura aleatoria de poemes n’asturianu na antoloxía Toma de tierra, de José Luis Argüelles.

2.  ¿Cuál foi l’últimu llibru que sacasti en préstamu d’una biblioteca?

Hai tiempu que nun saco llibros de la biblioteca. Al tener una relación bastante invasiva con ellos he de compralos. Los últimos  hai un par d’años na universidá, pa cuestiones de trabayu.

3. ¿Qué escena lliteraria te vien nesti momentu a la cabeza?

La rapaza coles llaranxes na mano, en Berta Piñan y, enantes d´ella, una rapaza paecía en Borís Sávinkov.

4. ¿Tienes namoraote de dalgún personaxe lliterariu?

Caro. De José Cemí, de Castell, d’El pijoaparte, de Lolita, de la Maga, de Raskólnikov…, de munchos.

5. Indica una triada de poetes.

Así, de primeres, a los que recurro cuando nun sé pa ónde tirar: Whitman, Wallace Stevens y Antonio Gamoneda.

6.  ¿Cuála foi la Biblioteca la to vida?

La biblioteca pública de Villayana, a la vera la estación del tren.

7. ¿Con qué llibru despertaríes l’amor a la llectura nun adolescente?

Paezme que hai que conectar colo que-y presta a cada llector y, dende ehí, dir introduciendo llectures más “espansives”. Lo que-y guste, Juego de Tronos o Los pilares de la tierra, y qu’ente medies-y caiga nes manes los cuentos de Tizón, Cortázar, Lovecraft, Poe, Kafka, Von Kleist…, onde la psicoloxía del adolescente pue atopar milenta posibilidaes.

8. Cita trés novelistes pa siguir por cualquier llector.

Dígote tres de los que siempre toi esperando’l so próximu llibru: Rafael Chirbes, Ricardo Menéndez Salmón y Nikolai Grozni.

9. Propón una midida a favor de la difusión de la llectura.

Educaría na llectura como actu de provocación emocional y intelectual. Dende abaxo, na escuela, centraríame na relación del llector col llibru, colos perxonaxes y los paisaxes, colos so sentimientos y reflexones. Tou llector tien una intelixencia llectora que nun debe subestimase.

10. ¿Quiénes son los tos compositores o músicos favoritos?

Llevo unos años enfotau en Arvo Pärt. Amás Ligeti, Mozetich, Brahms, la bestia de Beethoven; la voz de Antony and the Jonhsons, Silvia Pérez Cruz, Estrella y Enrique Morente, Nick Cave, Mica P. Hinson…

11. ¿Hai dalguna llectura que te marcare especialmente na vida?

El artista del hambre de Kafka, na adolescencia; depués, na universidá, Paradiso de Lezama Lima.

12. ¿A qué autor rescataríes del olvidu?

Más que un autor olvidáu rescataría una mirada lliteraria a esportar a la nuesa lliteratura. Pierre Michon, Bergounioux, Maurice Druon, Phillip Forest…, la mirada de ciertu estilismu frances. Gústame esta lliteratura qu’equí rápidamente tíldase de burguesa, lo que me paez un erru de tactu garrafal y pue terminar anulándonos otra manera de detenenos nes coses.

13. De xuru que podríes recomendanos la visión de, polo menos, trés películes.

Les que más me prestaron d’ente les últimes que vi: The Turin horse de Béla Tarr. Boyhood de Linklater. La jungla interior de Juan Barrero

14. ¿Qué poema interpreta los tos sentimientos?

“Entréme donde no supe/ y quedéme no sabiendo”. Juan de la Cruz

15. ¿Cuáles son los tos nomes -de persona- favoritos?

Los nomes de la xente que quiero: Marta, Ángela, Héctor, Olegario y Maximina.

16. ¿A qué sitiu salíu de la imaxinación d’un autor te gustaría treslladate?

A la Habana de Lezama Lima o al barcu de Melville o al restaurante onde cenó la familia Soprano l´ultimu capítulu de la serie.

17.  Los artistes más admiraos son…

Los de les cueves de Chauvet. Tamién Caravagio, Goya, Turner, Rothko, Pollock, Tarkovsky, Chris Marker, Fellini, Angelopoulos…

18. L’últimu llibru que comprasti foi…

Canción de tumba de Julián Herbert.

19. ¿Puede l’e-book reemplazar al formatu clásicu?

Supongo que pa dalgunes llectures sí. Nel mio casu pierdo la relación física col llibru, que siéntola mui necesaria. Caricialu, escarabayalu, escribir n’él, doblar una fueya… Pero pa testos académicos o pa les futures dimensiones de la lliteratura como una llanzadera multiartística pue tener munchu sentíu.

20. ¿Podríes dicinos cómo ordenes la to biblioteca personal?

Siempre tuvieron separaos per xéneros y dientro pel nome del autor, pero dende la última mudanza quedó desordenada. Ordénola cuando toi depresivu nun actu psicomáxicu de equilibriu personal; nun val pa nada.

21. ¿Ónde te prestaría vivir?

En Barcelona o Roma.

22. ¿A qué persona viva almires?

Hai años atopé un personaxe de Bernhard en Maestros Antiguos que dicía que l’almiración nun yera de persona intelixente. Como almiraba tanto a Bernhard, diome entós por dicir que yo nun almiraba si non que respetaba; una patochada de les gordes que nun me duró muncho. La verdá ye qu’almiro a muncha xente. A les muyeres de la mio casa, almíroles. A mio pá, tamién. La xente honesta consigo mesma que se deconstruye y s’enfreta a la so mentira, despiértame muncha almiración.

23. Pal to entender ¿cuála ye la meyor obra lliteraria adaptada pal cine?

Los santos inocentes de Miguel Delibes llevada al cine por Mario Camus.

24. ¿Qué tas lleendo actualmente?

Arvo Pärt in conversation, que son conversaciones ente l’artista y diferentes musicólogos y filósofos, y Canción de Tumba de Julián Herbert.

25. ¿Pa qué sirve la llectura?

Pa que, mientras se da, disfrutemos nel engañu de que servirá pa salvanos dalgo.

Títulu: Magaya

Autor: Alejandro Fernández-Osorio

Añu: 2014

Editorial: Impronta Ediciones

69 páxs.

“En Magaya el llector sigue’l procesu d’una vuelta emocionada ya irónica al orixe. Con mirada cariñosa pero nada afalagadora’l poeta muestra l’interior d’una vida que ye trabayu y amor a la tierra. Lloñe del costumismu y el coloríu folklorista, Magaya entra nel corazón del arte, onde se mezcla la durez dela gaspia cola la esperanza tienro de la semiente. Colos matices de quien conoz los recursos d’una llingua popular rica constrúyese un ambiente reconocible d’una materialidá tan histórica como recreada. Una manera evocadora d’entrar na historia pequeña de quien al dise dexa tres de sí la puerta apenes entornada”.

(21 de xineru de 2015)