Premios lliterarios en llingua asturiana

... con todas las letras

L’actu d’entrega de los premios lliterarios en llingua asturiana, qu’anualmente convoca la Conseyería de Cultura y Deporte del Principáu d’Asturies, puso fin el pasái mes d’avientu a la temporada lliteraria 2011. El Palaciu d’Inclán Leiguarda, sede de la Conseyería na Plaza’l Sol, n’Uviéu, quedose pequeñu p’acoyer el numberosu públicu asistente que quiso arropar a los galardonaos desti añu.

Premiu “María Josefa Canellada” de lliteratura infantil y xuvenil

La escritora Paquita Suárez Coalla resultó ganadora de la cuarta edición del Premiu “María Josefa Canellada” de lliteratura infantil y xuvenil en llingua asturiana cola obra Camín de lletres: de Asturies a Nueva York, un conxuntu de relatos nel que destaca la orixinalidá de la construcción narrativa del testu y de la temática, relacionada cola realidá actual de la nueva emigración asturiana.

Otros nueve trabayos optaben a esti premiu, que tá dotáu con 7.000 euros y que cuenta cola implicación del Ayuntamientu de Cabranes y la familia de María Josefa Canellada, escritora que da nome al gallardón.

Paquita Suárez Coalla (Grullos, Candamu, 1965) vive en Nueva York dende 1994 onde trabaya como profesora de castellán na Universidá de la Ciudá de Nueva York. Ye activista cultural y cofundadora de l’asociación LART (Latino Artists Round Table). Ye autora de La mio vida ye una novela (Trabe, 2001) una antoloxía de testimonios de muyeres del campu d’Asturies; de la colección de cuentos Pa nun escaéceme (Trabe, 2003), publicada n’español y n’inglés en Nueva York pola editorial Campana Para que no se me olvide/So I Won´t Forget (2007), y El día que nos llevaron al cine (Trabe, 2007). Ye tamién editora de l’antoloxía de cuentos d’escritores llatinos residentes en Nueva York Aquí me tocó vivir (Trabe, 2006).

Premiu “Alfonso Iglesias” de cómic

Doña Berta ye’l títulu del cómic galardonáu col Premiu “Alfonso Iglesias”, qu’esti añu alcanza la so tercer edición y que tá dotáu con 7.000 euros. La decisión del xuráu adoptóse por unanimidá.

El testu ganador presentóse col alcuñu “FOI”, perteneciente a Isaac del Rivero. El xuráu destacó l’acertada adaptación d’un testu lliterariu al llinguaxe propiu del cómic y la estraordinaria calidá de les ilustraciones.

Isaac del Rivero de la Llana (Colunga, 1931) ye dibuxante y guionista, amás del principal impulsor de munches de les iniciatives llevaes a cabu n’Asturies pa promocionar el cómic y el cine ente’l públicu infantil y xuvenil. Asína, foi organizador en 1963 en Gijón/Xixón –ciudá na que vive dende neñu- del Certamen Internacional de Cine pa la Infancia y la Xuventú, del que fue director hasta 1981. En 1973 organizó la primera Muestra Internacional de Publicaciones Infantiles y Xuveniles. Esti compromisu y la so entrega valieron-y gallardones de prestixu qu’avalen la so trayectoria de dibuxante y la so continua llabor de promoción del mundu del cómic y del cine. D’esta manera, en 1973 recibió el “Aro de Plata de Valencia” pol so trabayu en pro del cine pa la infancia. En 1976 obtuvo la “Venus de Barcelona” por idénticu motivu. Amás, reconociéndo-y los servicios prestados al cómic, diéron-y el Diploma de Honor de la “National Cartoonists Society” d’Estaos Xuníos. Tien la “Distinción de la Organización Mundial de la Salud, dentro del Servicio de Comunicaciones” pol so trabayu como director del Certamen Internacional de Cine pa la Infancia y la Xuventú de Gijón/Xixón (1963-1981). Ye patronu de la Fundación Foro Jovellanos del Principáu d’Asturies. Na so faceta como dibuxante de cómic tien bayura de trabayos fechos, destacando Jovellanos, La Regenta y ¡Adiós, Cordera! de Clarín, a los que se suma agora l’adaptación de Doña Berta del mesmu autor lliterariu.

Premiu “Xuan María Acebal” de poesía

La decimoséptima edición del Premiu “Xuan María Acebal” de poesía n’asturianu tuvo como ganador a Xosé Anxelu Gutiérrez Morán, que presentó col alcuñu “Xuan d’Andía” el poemariu Un ciertu desorde. El xuráu destacó que se trata d’un poemariu nel que sobresal l’intentu del autor de dir de lo oscuro a lo claro, componiendo una poesía conceptual que tiende hacia’l pensamientu ensin dexar de ser canción.

El xuráu adoptó la decisión por unanimidá y acabante valorar los once testos presentaos al certamen. El Premiu tá dotáu con 7.000 euros.

Xosé Anxelu Gutiérrez Morán (Avilés, 1969) ye doctor en Bioloxía pola Universidá d’Uviéu y trabaya como investigador nel Centru Oceanográficu de Xixón del Institutu Español d’Oceanografía. Nel so ámbitu profesional ye autor d’una cincuentena d’artículos científicos y capítulos de llibru. Como escritor n’asturianu, ye autor de los poemarios Países (Trabe, 2005), que recibió ex-aequo con Marta Mori’l XIV Premiu “Teodoro Cuesta”, y Diversa memoria (XVIII Premiu Teodoro Cuesta, Trabe, 2010), amás de dellos poemes publicaos en revistes lliteraries. El so cuentu Anestesia foi premiáu nel V Concursu de Cuentos pola Oficialidá del Asturianu (Camín de Bimenes, Xébana Ediciones, 2008) y collaboró col capítulu La ecología microbiana marina como exemplu de cambiu de paradigma científicu en La ciencia n’otres palabres (coord.. Xulio Viejo, Trabe, 2007).

Premiu “Máximo Fuertes Acevedo” d’ensayu

Cipriano Folgueras, una gloria d’Asturies ye’l títulu del ensayu galardonáu col Premiu “Máximo Fuertes Acevedo”, qu’esti añu algama la so decimuséptima edición y que tá dotáu con 7.000 euros. La decisión del xuráu adoptóse por unanimidá.

El testu ganador presentóse col’alcuñu “Xandru”, perteneciente a Lluis Portal Hevia. El xuráu destacó’l carácter biográficu del ensayu y el trabayu de recuperación de la figura y la obra d’un escultor brillante olvidáu pola sociedá asturiana. L’autor, con un bon dominiu críticu y estéticu, llévanos al ambiente del mundu de la escultura española de finales del sieglu XIX y empiezos del XX. Asinamesmo, el xuráu rescampla la implicación emocional del autor cola figura del escultor.

Lluis Portal Hevia (Villaviciosa, 1964) ye periodista y como tal collabora con distintos medios de comunicación (La Voz de Asturias, Les Noticies, Asturias Deportivo, Maliayo…). Como escritor tien trabayaos distintos xéneros lliterarios: el cuentu, la novela xuvenil, el teatru, la poesía, la biografía… Asinamesmo destaca na investigación etnográfica. Ente los sos llibros publicados tan Trófimo y Radamés (Ediciones Caveda y Nava, 1991), Francisco Balbín, Xiquín de Villaverde (Asociación Cubera, 1995) y Secretos de Pandenes (Trabe, 2006). Pueden alcontráse collaboraciones d’él en Lletres Asturianes o la revista Albentestate. Tamién tien ganao diversos premios: Premiu Uviéu de Teatru 2007 pola obra Oh, 36!, Premiu Uviéu de Teatru 2008 con Poison, Premiu de llectures pa rapazos 2009 pola obra Pelegrinos del abismu o Premiu Asturnews de lliteratura infantil y xuvenil 2009 con El club de los valientes.

Premiu “Xosefa Xovellanos” de novela

L’escritor Xandru Fernández resultó ganador de la trentésimu segunda edición del premiu “Xosefa Xovellanos” de novela en llingua asturiana cola obra El príncipe derviche, una novela na que destaca la construcción d’un universu narrativu personal nel que se van esbillando acontecimientos, datos y situaciones sobre les que l’autor vuelve dende distintes perspectives a lo llargo de tola obra. Otros seis trabayos optaben a esti premiu, que tá dotáu con 7.000 euros.

Xandru Fernández (Turón, 1970) ganara yá n’otres dos ocasiones el Premiu Xosefa Xovellanos coles obres El club de los Inocentes (1993) y El suañu de los páxaros de sable (1999). Amás d’estes, tien publicaes otres tres noveles: Los homes de bronce (2001), Les ruines (2004) y La banda sonora del paraísu (2006). Publicó asinamesmo’l llibru de relatos Entierros de xente famoso (2008). Tamién tien una notable actividá como traductor: La tresformación, de Franz Kafka, y Mario y el magu, de Thomas Mann (dambes dos al asturianu); y La promesa, de Friedrich Dürrenmatt, y La transformación, de Franz Kafka (al castellán). Tamién tien collaboraciones en prensa escrito en distintos medios de comunicación (La Nueva España, El Comercio, Les Noticies y La Voz de Asturias).