Xentiquina crew!

Xentiquina crew!

Xentiquina/ VV.AA.

Algamar, 2011

///

Trátase d’un discu doble y un DVD homenaxe a Xentiquina y al so creador, Nacho Fonseca, depués de más de 20 años dedicaos a la música infantil na escuela.

Per un llau atopamos un DVD nel que s’inserta “Seliquín-Xentiquina, una ferramienta pedagóxica al serviciu de la escuela n’Asturies”, un documental dirixíu por Pablo A. Quiroga Prendes nel que, nuna hora y diecisiete minutos, s’amuesa’l percorríu que, dende los sos oríxenes, tuvo la llabor del maestru Nacho Fonseca al traviés de los coros escolares Seliquin y Xentiquina.

La xénesis d’esta apasionante aventura musical -que foi pionera n’Asturies- remóntase al cursu escolar 1985-86, cuando Nacho Fonseca exercía de maestru de Música y Asturianu na escuela rural de Porrúa, nel conceyu de Llanes. Yeren unes dómines nes que la llingua acababa d’entrar nes aules, pero nun había materiales didácticos colos que trabayar, polo que Fonseca decidió componer cantares infantiles como la meyor ferramienta pedagóxica. Y d’ehí surdió’l primer discu Seliquín (Fonográfica Asturiana, 1986), que llegó a competir nes ventes coles estrelles del pop d’aquel entós.

Tres cambiar de destín al colexu públicu de Lieres (Siero), Fonseca grabó nel cursu 1987/88 otru discu colos sos escolinos nomáu Xentiquina, cancios pa neños (Fonoastur), una denomación que yá quedaría pa llamar al grupu pa siempre. Esi álbum tradúxose al gallegu y editóse na comunidá vecina en 1989. De magar entós Xentiquina editó otros cinco discos más nos sellos Fonoastur y L´Aguañaz -Yera la princesa d´un país (1990), Llambionaes (1994), Nun mos gusten les lenteyes (2001), Marchóme la gata (2005) y El sapu y la lluna (2009)- y protagonizó centenares de conciertos per toa Asturies. A lo llargo d’estos años, desfilaron por esti grupu infantil ente 100 y 200 escolinos y tamién se pue apreciar una evolución musical, cola presencia de cantares en clave de rock o blues.

Nel trabayu discográficu participaron un total de 23 grupos asturianos de diferentes xéneros músicales como folk, rock, pop y música d’autor. Nél participen dende Anabel Santiago, Héctor Braga o Tejedor a Los Berrones, Pauline en la Playa, Bueno o Skama la Rede. Vien al casu recordar que la banda Dixebra foi la primera en llevar hai unos años al terrén del rock un tema de Xentiquina tituláu Cañicón. D’esta miente aporten diferentes colores a les versiones de los cantares de coros escolares. Dalgunos d’estos temes puen sentise yá n’itunes, emusic, napster, amazon, myspace, medianet, spotify ylast.fm.

(27 de febrero de 2012)