El fervinchu

El fervinchu

Sidoro Villa Costales

Impronta

105 páxs.

///

El fervinchu (Premiu «Xosefa Xovellanos» de Novela 2020) vien a enanchar y arriquecer más tovía’l singular proyectu narrativu de Sidoro Villa Costales. Los llectores de A estaya (2016), Tres beyuscos (2019) y Pielgos de llercia (2021) han reconocer de primeres la bayura de la prosa —enraigonada no más auténtico del nuestru patrimoniu llingüísticu pero qu’aguanta lo mesmo cualquier retu de la modernidá—, igual que van disfrutar la maña del autor polesu pa trazar topografíes, dibuxar perfiles humanos enllenos de verdá, mover personaxes al debalu del so destín particular, gobernar xuntances corales, manexar situaciones hasta faceles climátiques y, al cabu, esa manera insuperable que tien de desfacer tolos enriedos nel duviellu del puntu final.

Sidoro Villa Costales (Lieres, 1962), profesor de primaria, ilustrador y escritor, debutó como novelista con A estaya (2016), onde l’allegría y el bon xuiciu intenten nun se fundir braciando ente foles de soberbia y de maldá, nun escenariu apocalípticu de vallines fonderes y bastiazos nel que la naturaleza, omnipresente, algama un papel protagonista. Con Tres beyuscos (2019) vuelve afondar l’autor na so personal mestura ente comedia y drama. Rescampla tamién l’humor negro, pero nun falta una emocionante historia d’amor, protagonizada por unos cuantos perdedores, nel contestu d’una Asturies onde namás la mesma naturaleza va ser quien a devolver l’orde verdaderu a les persones y a les coses. Pielgos de llercia (2021) ye un roman noir que protagoniza’l teniente Corripio, un guardia civil posáu al que’l llector amigu del xéneru ensiguida va poner al empar de los detectives clásicos de la novela policiaca.

Con El fervinchu ganó en 2020 Sidoro Villa la 41.ª edición del Premiu «Xosefa Xovellanos» de Novela. Ye tamién autor de los llibros infantiles y xuveniles Llibru de los suaños (2007), ¡Nun-yos tengas perceguera! (2006), Mael al debalu (2010) y Evaristo Valle, el pintor del antroxu (2011).