La Tertulia Malory escueye ‘Onde’l caos se texe y se destexe’, de Xulio Viejo, como meyor llibru n’asturianu del añu 2021

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2021 la novela Onde’l caos se texe y se destexe, del escritor y profesor universitariu Xulio Viejo. El xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l viernes 7 de ochobre de 2022.

El xuráu destacó, nel acta del fallu, cómo’l llibru «amuesa una narrativa híbrida d’un valir lliterariu altu, qu’afita de forma perfecha’l camín de lo universal a lo llocal, siendo quién a empatar  a historia familiar con un territoriu míticu y, al empar, real, como ye Quirós, y que furrula como una métafora d’Asturies y del orixe mesmu de la cultura occidental». El xuráu tamién quixo rescamplar la calidá tan grande de la producción lliteraria n’asturianu del añu 2021, lo que fixo que la decisión de premiar la novela de Xulio Viejo se garrara por mayoría depués d’una votación apretada.

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes.

Esta ye la décimoprimer vez que’l grupu concede esti premiu, l’añu pasáu resultó ganador el poemariu de Xuan Bello Les isles inciertes, y n’ediciones anteriores, premiáronse les obres Memoria de Tuña, d’Antón García; Incorrectos de David Artime; El llibru póstumu de Sherezade, de Raquel F. Menéndez; Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodríguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los promotores quieren prestixar les lletres asturianes, al empar que se da difusión a les obres que’l xuráu considere los meyores llibros escritos cada añu n’asturianu.

Onde’l caos se texe y se destexe ye la cuarta novela de Xulio Viejo depués de Na llende del condicional perfeutu (1990), Les falcatrúes del demoniu (1992) y Los araxales de la vida (2001).

Onde’l caos se texe y se destexe constitúi una historia d’histories rica, que se llevanta como una reflexón emocionante sobre la cultura, el poder, la resistencia y una busca del sentíu que se-y pue dar a la existencia. La memoria escrita como homenaxe a un padre que baxa de los montes de Quirós a ganar la vida en Ventanielles y que va ser la cadena que nos caltién xunto a los nuestros y a lo nuestro, dientro d’una cosmovisión asturiana y universal emocionante que nos plasma y nos trescala.

Xulio Viejo Fernández (Uviéu, 1968) ye doctor en Filoloxía Románica, profesor de la Universidá d’Uviéu y estudiosu de la llingua y la lliteratura asturianes. Ye responsable del volume Relatos asturianos medievales del sieglu XII (2003), qu’inclúi siete testos traducíos del llatín. Como poeta, ganó’l Premiu «Xuan María Acebal» nel añu 1996 col llibru Les etimoloxíes del silenciu.