Cincoxcinco = Marta Mori

Marta Mori (Xixón, 1965) estudió Filoloxía Hispánica na Universidad d’Uviéu, onde se doctoró en Filoloxía Española. Ye profesora d’Enseñanza Secundaria nel IES Jovellanos de Xixón y da clase tamién como profesora asociada na Universidá d’Uviéu. Ye miembru de númberu de l’Academia de la Llingua Asturiana y dirixe la revista Lliteratura, qu’espubliza esta institución.

Ye autora de publicaciones pedagóxiques (artículos sobre didáctica de les llingües, investigaciones socioeducatives y llibros de testu) y d’artículos y ensayos de crítica y historia lliteraries, munchos d’ellos sobre lliteratura asturiana. Sacó apocayá una compilación titulada Notes de lliteratura asturiana (Ediciones Trabe, 2022). Arriendes d’esto, collaboró na Historia de la Lliteratura Asturiana de l’Academia de la Llingua y coordinó los llibros Xosé Bolado. Fálame duce (Principáu d’Asturies, 2023) y Palabres blanques (Trea, 2023). Nel campu de la traducción lliteraria, tien publicao, ente otros trabayos, les versiones al asturianu de Le cimetière marin de Paul Valéry (El cementeriu marín, Saltadera, 2018) y Cacophonie de Ken Bugul (Cacofonía, Ediciones Trabe, 2024). Amás de lo dicho, collabora como crítica lliteraria nel diariu La Nueva España reseñando lliteratura n’asturianu y en gallego-asturianu.

Como poeta, tien dao a la prensa los poemarios Pórticu, Premiu Teodoro Cuesta de Poesía en 2002 (Ediciones Trabe, 2003), El tiempu de la espera, Premiu Teodoro Cuesta de Poesía ex aequo con Ánxelu Gutiérrez en 2004 (Ediciones Trabe, 2005), L’alcordanza (Academia de la Llingua Asturiana, 2010), La mio voz, Premio Xuan María Acebal de Poesía en 2010 (Suburbia, 2011), Orfandá (Ediciones Trabe, 2019) y Los carreros del tiempu, Premio Xuan María Acebal de Poesía en 2022 (Impronta, 2023). Nel campu de la narración, escribió’l llibru  Histories familiares y un piñu de microrrellatos qu’anden esparcíos en volúmenes colectivos.

1. Proponga un menú lliterariu: entrada, platu principal y postre.

Pa entamar, el Cantar de mi mesmu de Walt Whitman, un llibru del que tenemos una traducción al asturianu escelente de Milio Ureta (Delallama, 2021). El platu principal diba ser Pozu sin fondu (Impronta, 2021), que recopila tola poesía publicada hasta agora por Pablo Antón Marín Estrada. De postre, pondría una esbilla de poesíes d’Anna Aimátova, sacaes, por poner un casu, de l’antoloxía de Belén Ojeda Soy vuestra voz (Hiperión, 2005).

2. ¿Cuál foi l’últimu llibru que sacó n’empréstamu d’una biblioteca?

Entre manzanos d’Alfonso Camín (col. Biblioteca de Xixón, Ayuntamientu de Xixón). Saquélu de la biblioteca del institutu onde trabayo, el Jovellanos.

3. ¿Qué escena lliteraria-y vien nesti momentu a la mente?

La escena de Cien años de soledad en que’l coronel Aureliano Buendía ta perdiendo la memoria y va dexando cartelinos pela casa colos nomes de les coses. La primer vez que lleí la novela, con trece años, nun la entendí bien, agora doime cuenta de la potencia metafórica que tien y tamién de la llectura lliteral que se-y pue dar.

4. ¿Namoróse de dalgún personaxe lliterariu?

Nun soi namoradiza. Namoréme de la figura de Simone de Beauvoir cuando lleía les memories d’ella, dende los quince a los ventipicu años. Cuando m’enteré d’algunes coses que nun contaba nos llibros, llevé desilusión. Agora doime cuenta de la importancia y l’interés de la so obra, el so pensamientu y el so estilu de vida, pero pienso nella desapasionadamente.

5. Suxera una tríada de poetes.

Voi dar nomes distintos de los del menú, p’ampliar les referencies: Antonio Machado, Rosalía de Castro, Joan Margarit.

6. ¿Cuála foi la (o les) Biblioteca de la so vida?

Guardo recuerdos guapísimos de la sección infantil de la Biblioteca Xovellanos qu’había nel parque de Begoña de Xixón, con Paco Abril y Victoria Fernández al frente. Depués cambié a la sección d’adultos que tovía taba allugada nel Antigu Institutu. Hai otres: la blibliotequina formada polos llibros que mio madre compraba al Círculo de Lectores, la biblioteca del Seminariu de Crítica Lliteraria de la Facultá de Filoloxía, onde fui becaria, la biblioteca escolar que contribuí a montar nel IES Selgas de Cuideiru, la Biblioteca del Centru Pompidou de Paris, onde taba TOO, la Biblioteca Nacional, onde fui pa buscar material pa la tesis…

7. ¿Con qué llibru espertaría l’amor a la llectura nun adolescente?

Depende del adolescente. Hai quien-y presta la lliteratura realista como Cuando Hitler robó’l coneyu rosa de Judith Kerr o El neñu col pixama de rayes de John Boyne. Otra xente prefier la fantasía, tipu Harry Potter. A casi toos-yos presten la mitoloxía (yo trabayo en clase colos Mitos griegos de Maria Angelidou) y les histories de mieu, por poner un casu, d’Egar Allan Poe… Yo intento personalizar les recomendaciones.

8. Cite trés novelistes pa siguir por cualquier llector.

Emmanuel Carrère, Svetlana Aleksiévich, Brenda Navarro.

9. Proponga una midida a favor de la difusión de la llectura.

Facer un programa de promoción de la llectura nos centros educativos qu’incluya encuentros con escritores (al marxe de los intereses editoriales), una dotación curiosa pa les biblioteques escolares y un plan de coordinación coles biblioteques públiques.

10. ¿Quién son los sos compositores o músicos favoritos?

Nestos momentos, J.S. Bach, Silvio Rodríguez y Nacho Vegas.

11. ¿Dalguna llectura marcó especialmente la so vida?

La que mencioné antes, les memories de Simone de Beauvoir.

 12. ¿A qué autor rescataría del escaecimientu?

A Xosé Bolado, que recibió dellos homenaxes l’añu pasáu, pero taba un poco olvidáu pola crítica y polos propios llectores de lliteratura n’asturianu.

13. De xuru que podría aconseyanos la visión de polo menos trés películes.

Apocalipsis now de Francis F. Coppola, El Sur de Víctor Erice y Roma, ciudá abierta de Roberto Rossellini.

14. ¿Qué poema interpreta los sos sentimientos?

Agora mesmo, los que Machado escribió a Leonor depués de que morriera. El que dedicó a José María Palacio resúltame mui cercanu nestos momentos.

15. ¿Cómo ve’l panorama editorial asturianu?

Ricu en númberu d’editoriales y en propuestes interesantes, pero arrecostinando colos problemes que tienen les editoriales “perifériques” pa dar a conocer autores nuevos, pa distribuir, etc. Per otru llau, les editoriales que publiquen n’asturianu dependen demasiao de les subvenciones, porque  nun tienen masa crítica  de llectores suficiente (habría que trabayar nesi sen) y sufren problemes de distribución, que, por ciertu, tamién afecten a les llibreríes.

16. ¿A qué sitiu salíu de la imaxinación d’un autor-y prestaría treslladase?

Prestaríame tener perres pa vivir nun locus amoenus como los que describe Garcilaso, siempre que tuviera bien comunicáu.

17. Los sos artistes más almiraos son… (referío a pintores, escultores, fotógrafos, arquitectos… etc.)

Boticelli, Velázquez, Miguel Ángel, Bernini, Capa (Gerda Taro y André Friedman)…

18. L’últimu llibru que mercó foi…

Paezme que foi’l poemariu Violencia de Bibiana Collado.

19. ¿Pue l’e-book reemplazar el formatu clásicu?

Pue ser. De momentu nun me paez, porque’l llibru en papel ye más cómodu de tresportar y tien más encantu. Pero nun descarto una crisis de la industria papelera causada pol cambiu climáticu que nos obligara a cambiar de soporte.

20. ¿Podría dicinos cómo ordena la so biblioteca personal?

Per idiomes, per materies y per xéneros. Tamién axunto llibros de la mesma colección pa que quede más curioso.

21. ¿Ónde quedría vivir?

Siempre quixi pasar una temporada en París. Agora prestábame más vivir nel campu, tando bien comunicada.

22. ¿A qué persona viva almira?

Últimamente, a Yolanda Díaz.

23. Al so paecer, ¿cuála ye la meyor obra lliteraria adaptada pol cine?

Tán bien les adaptaciones de les Cróniques de Narnia, pa los rapacinos y rapacines los llibros son un poco difíciles. Y son guapísimes dende’l puntu de vista visual les adaptaciones de Visconti, sobre too Muerte en Venecia.

24. ¿Qué ta lleendo actualmente?

Chanson douce de Leïla Slimani, premiu Goncourt en 2016.

25. ¿Pa qué val la llectura?

Supongo que pa formase y pa disfrutar. Nel mio casu, pa sobrevivir.

Los carreros del tiempu

Marta Mori

Impronta

2022

///

Al concede-y el premiu Xuan María Acebal de Poesía 2022, el xuráu destacó que Los carreros del tiempu rescampla pola «claridá, la elegancia, l’equilibriu ente lo clásico y la contemporaneidá, la sensibilidá social nada impostada y la naturalidá llingüística».

(15 de abril 2024)