Cincoxcinco= Berta Piñán

Comprometida pa cola recuperación y dignificación de la cultura y la llingua asturiana, Berta Piñán tien desarrollao la mayor parte’l so trabayu como escritora nesta llingua. Teniendo publicao obres d’otros xéneros, el so llabor rescampla na faceta poética: Al abellu les besties (1985), Vida privada (1991), Temporada de pesca (1998), Un mes (2002) y Noches de incendio (2005). Na so faceta de narradora son pa destacar La tierra entero (1996) y La maleta al agua (2006), y na lliteratura infantil relatos como Lula, lulina (1989) o los más de recién Las cosas que le gustan a Fran y El extranjero (2007). Ye autora tamién de testos de didáctica y ensayos. Presente en bien d’antoloxíes, tien ganao una montonera premios lliterarios de gran prestixu. Reconocida como una de les voces fundamentales de la moderna lliteratura asturiana, anguaño collabora con reseñes na prensa y publicaciones lliteraries y trabaya sobre teoría y práctica de la escritura creativa.

1.   Proponga un menú lliterariu: entrada, platu principal y postre.

D’entrada, unos canapés variaos a base de poesía fundamentalmente: dalgún haiku p´abrir boca, unos versos colos sabores contemporanios asturianos y entemedies, unes gregueríes de Gómez dela Sernapa da-y un pocu de color.

Como platu principal, un llibru bien golosu pero de dixestión lenta: Una historia de la lectura d’Alberto Manguel.

Y p´acabar, ún d´esos postres que-y presten a los más llambiones porque siempre te dexa ganes de más: Jane Eyre de Charlotte Brönte.

2.     ¿Cuálu foi l´últimu llibru que sacó en préstamu d´una biblioteca?

Tovía lu tengo en casa: El retrato de Dorian Gray , d’Óscar Wilde. Lleéralu hai munchos años y tenía ganes de volver sobre él. Y como pasa cuasi siempres, agora tengo otra “mirada”, otra perspectiva más crítica qu´entós nun-y aplicaba a estes llectures.

3.     ¿Qué escena lliteraria-y vien nesti momentu a la cabeza?

Alejandra pasiando sola peles cais de Buenos Aires en Sobre héroes y tumbas d’Ernesto Sábato.

4.    ¿Tiense namorao de dalgún personaxe lliterariu?

Sí, de munchos, pero como tolos namoramientos, eso pertenez al planu de la intimidá.

5.     Indique una triada de poetes.

Jaime Gil de Biedma (poeta español de la xeneración del 50), Wislawa Szymborska (poeta polaca contemporania y premiu Nobel) y Taresa Lorences (poeta asturiana contemporania)

6.     ¿Cuála foi la biblioteca de la so vida?

En realidá,la del Institutude Cangues d´Onís onde estudié.  Foi la primera onde sentí que sacar un llibru en préstamu nun yera un actu próximu al delitu y como nun teníemos a naide que nos orientara, tamién ellí pudi sentir per primer vez esa maraviosa llibertá que ye devorar llibros namás guiada pol institu y la pasión de lleer.

7.   ¿Con qué llibru despertaría l´amor a la llectura nun adolescente?

Ellos y elles, los adolescentes d´agora, nun son obviamente, los que fuimos na mio xeneración. Tienen otros intereses y otros códigos de comunicación. Sin embargu, creo que se mantienen polo menos tres constantes: la fantasía, l´aventura y l´autorreconocimientu. Por eso, respondiendo a les tres nesi orde, yo recomendaría: El señor de los anillos de Tolkien, La isla del tesoro de R. L. Stevenson y El guardián entre el centeno de Salinger.

8.     Cite tres novelistes a siguir por cualquier llector:

J. M. Coetze, Margarite Yourcenar y un cuentista: Jorge Luis Borges.

9.     Proponga una midida a favor de la difusión de la llectura.

Si tuviera que sacar una conclusión de tolo que se llee nel metru de Madrid, obligaría a tol mundu a viaxar en metro pa convertilos en llectores. Non, en seriu, cualquier midida aisllada diba ser siempre insuficiente  pero non por ello dexa de ser necesaria.

10.  ¿Quiénes son los sos compositores o músicos favoritos?

 De la música clásica, lo que más me presta ye la ópera. Y equí quiciabes Puccini seya´l mio preferíu. De los compositores contemporanios admiro la música de Jordi Savall, d´Hevia y de Ramón Prada, qu´amás ye del mio pueblu.

11.  ¿Dalguna llectura tien marcao especialmente la so vida?

 A cada etapa de la mio vida-y correspuenden les suyes pero si tuviera qu´escoyer, fairíalo ente les más tempranes y significatives, les que puen llamase “de xuventú” pero que tovía güei tienen un pesu y una trescendencia na mio formación lliteraria y humana: La tierra baldía de T. S. Eliot, en poesía; En busca del tiempo perdido, la magnífica colección de siete noveles de Marcel Proust y Una habitación propia, l´ensayu llúcidu y revelador de Virginia Woolf.

12.  ¿Sabría dicime qué ye un “tejuelu”?

Ye una etiquetina que se coloca en llombu de los llibros y contién la información básica p´atopalos y clasificalos na biblioteca.

13.  Qué persona viva-y inspira más despreciu?

Dende hai unos años, creo que George Bush.

14.  ¿A qué persona viva admira?

 Fuera del mundu del arte o la lliteratura, a Nelson Mandela y a Kate Millet, una de les principales y más interesantes teóriques del feminismu del pasáu sieglu XX.

15.  De xuro que podía recomendanos la visión de, polo menos, tres películes.

De les más recientes, Pequeña Miss Sunshine de Jonathen Dayton y Valerie Fario, directores noveles de cine independiente americanu; de les clásiques más universales, El gran dictadorde Charles Chaplin y de les que marcaren la mio mocedá, Thelma y Louise de Ridley Scott.

16.  ¿Qué poema interpreta los sos sentimientos?

Los sentimientos son múltiples y cambiantes, asina que tendría qu´escoyer más bien un cóctel de versos del que dir entesacando según los momentos y les etapes de la vida. Agora bien, si tuviera que citar un poema que deprendí de memoria cuando tenía quince años y que d´entós p´acá m´acompaña, sería esi famosu de Luis Cernuda  “Si el hombre pudiera decir” y que ye una de les declaraciones d´amor más emocionantes que conozo. Cito de memoria dalgunos versos finales: “Libertad no conocozco, sino la libertad/ de estar preso en alguien/ cuyo nombre no puedo oir/ sin escalofrío./ (…) Tú justificas mi existencia:/ si no te conozco, /no he vivido. / Si muero sin conocerte, /no muero, / porque no he vivido.”

17.  ¿Cuáles son los sos nomes de persona favoritos?

 Los de les mios fíes: Andrea y Alma.

18.  ¿Ta d´alcuerdu cola aplicación d´un canon pol préstamu nes biblioteques?

Non. Yo creo que la nuestra rede de biblioteques públiques y gratuítes ye un lluxu pero tamién un drechu d´esta sociedá del bienestar qu´intentamos construyir y que tenemos el deber de defender.

19.  Los sos artistes más admiraos son…

 Lucien Froid (pintor), Cristina Iglesias (escultora) Mª Jesús Rodríguez (pintora y escultora), Victoria Abril (actriz), Gracia Querejeta (directora de cine), Maria Callas (intérprete d’ópera), Pablo Picasso (pintor)… En fin, diba ser una llista bien llarga.

20.  L´últimu llibru que compró ye…

Comprélu ayeri na Cuesta Moyano. Ye una novela de segunda mano pero ta nuevu y varies amigues nes que confío me falaren mui bien d´elli: El abanico de seda, d’Isa See.

21.  ¿Podría dicinos cómo ordena la so biblioteca personal?

Nuna especie de caos tamién mui personal. Más que por temes propiamente dichos, son centros d´interés los que l´articulen. Pero resumiendo un pocu, tengo la mio colección de poesía nun llugar bastantes privilexáu y yo diría que nun orde lóxicu. Depués ta la narrativa pela so parte, l´ensayu y la lliteratura asturiana.  Tamién los diccionarios y obres de consulta tien el so llugar específicu. Asina y too, tovía me queden dellos estantes de “inclasificables” coles coses más variopintes.

22.  ¿Ónde desearía vivir? 

Dicía Eliot nunos versos: “Lleo tola nueche/ y n´iviernu marcho pal sur.” Yo tamién quixera vivir nesi llugar imaxinariu, cásique emocional, onde tuviéramos tol tiempu que quixéramos pa lleer y onde nos momentos más duros nos abellugara l´aire cálidu del sur.

23.  Pal so xuiciu ¿cuála ye la meyor obra lliteraria adaptada al cine?

Ocúrrenseme dos mui distintes ente elles: Lolita de Nabokov y El tercer hombre de Graham Green.

24.  ¿Qué ta lleendo agora?

Polo común, lleo varies coses a la vez. Por exemplu, dellos llibros de poemes, dalguna novela y artículos variaos. Agora acabo de zarrar sobre la mesa Y todos estábamos vivos l´últimu poemariu d´Olvido Gracía Valdés y voi pela metá de Diario de un mal año de  Coetzee. Entemedies tamién toi lleendo l´últimu de Xuan Bello, Al dios del llugar.

25.  ¿Pa qué sirve la llectura?

Yo creo que ye l´actividá intelectual más satisfactoria qu´esiste. La llectura, la lliteratura, permítenos agrandar el mundu que nos arrodia, ponenos nel llugar del “otru”, comprender el tiempu que nos toca vivir. En definitiva, dir más p´allá de la nuestra siempre– e inevitablemente– limitada esistencia.

(Publicado en Biblioasturias08)