Elías Veiga gana’l XXI Premiu Teodoro Cuesta col poemariu “Testamentu”

Reuníu’l xuráu de la XXI edición del Premiu Teodoro Cuesta de Poesía na Casa de Cultura de Mieres del Camín la trade de llunes 19 d’avientu de 2011, decidió conceder por unanimidá’l Premiu al poemariu tituláu Testamentu, presentáu baxo’l seudónimu “Truébanu Solitariu”, y del que resultó ganador l’escritor Elías Veiga.

El xuráu del Premiu Teodoro Cuesta de Poesía tuvo integráu nesta edición por María Antonia Pedregal, directora de la Oficina de Política Llingüística de la Conseyería de Cultura, Jesús Fernández, director de la revista Biblioasturias, Ismael María González Arias, escritor y director de la Casa de Cultura de Mieres, Esther Prieto, escritora, ganadora d’esti premiu na edición de 1998 y responsable d’Ediciones Trabe, y Xuan Bello, escritor y ganador d’esti premiu na edición de 1993. Presidió’l xuráu’l conceyal de cultura y vicealcalde del Ayuntamientu de Mieres, Manuel Ángel Álvarez, y actuó como secretaria Anghara Trillo, técnicu superior de cultura de la Casa de Cultura de Mieres; dambos ensin votu.

Tres de la primera ronda de delliberaciones del xuráu pasaron a la siguiente rueda de valoración los poemarios titulaos Testamentu, Destruimientu del xardín y Magaya; resultando tres de la posterior votación, por unanimidá, ganador el poemariu tituláu Testamentu.

El Premiu Teodoro Cuesta de Poesía, dotáu con 4000 € (cuatro mil euros), ye’l de más grande prestixu de los que se conceden n’Asturies nel apartáu de poesía, dalgo qu’atestigua la nómina de los sos ganadores:

1991 Berta PIÑÁN
1992 Lourdes ÁLVAREZ y Alfonso VELÁZQUEZ
1993 Xuan BELLO
1994 Lourdes ÁLVAREZ
1995 Antón GARCÍA
1996 Martín LÓPEZ-VEGA y Chechu GARCÍA
1997 Pablo Antón MARÍN ESTRADA
1998 Esther PRIETO
1999 Xuan SANTORI
2000 Xabiero CAYARGA
2001 Ánxel ÁLVAREZ LLANO
2002 Marta MORI DE ARRIBA
2003 Vanesa GUTIÉRREZ
2004 Marta MORI DE ARRIBA y Xelu GUTIÉRREZ MORÁN
2005 Pablo RODRÍGUEZ ALONSO
2006 Pablo TEXÓN y Pablo RODRÍGUEZ MEDINA
2007 Miguel ALLENDE y Héctor PÉREZ
2008 Xelu GUTIÉRREZ MORÁN
2009 Ánxel NAVA
2010 Xabiero CAYARGA
2011 Elías VEIGA

Elías Veiga (Presnes, Ayande. 1972)
Diplomáu en Biblioteconomía y Documentación pela Universidá de Lleón y encargáu del Archivu de Tinéu y de la Casa Cultura de Navelgas, Elías Veiga venía publicando dellos de los sos poemes en revistes lliteraries como Lliteratura, editada pola Academia de la Llingua Asturiana, cuando nel añu 2004 publica’l poemariu La tierra fonda (Trabe), destacando por ser una voz propia que sigue la llinia figurativa de la poesía asturiana de los últimos tiempos.

L’agradececíu golor de la tierra apálpase en La tierra fonda, poemes trazaos en llingua asturiana como sema dende l’occidente y que encierren un secretu y un arume propiu. Posteriormente Robinson astur (Universos) llanzó una botella de salvación en versu a tiempos que yá se presumíen escuros y dafecho crueles; el poemario obtuvo el Premiu de la Crítica de l’Asociación d’Escritores d’Asturies.

Tamién ganó a primeros d’esti mesmu añu 2011 la VIII edición del Concursu de Cuentos Curtios d’Adultos de Cangas del Narcea col cuentu Tierra adientro.
Collabora como articulista nel selmanariu Les Noticies y dellos de los sos poemes tán incluyíos nes antoloxíes Escritores en Llanes y Palabres Clares.