Nené Losada Rico protagoniza la Selmana de les Lletres Asturianes 2013

La XXXIV Selmana de les Lletres Asturianes qu’entama’l Gobiernu del Principáu d’Asturies, amplía’l so tradicional programa centráu na lliteratura fecha n’asturianu a nuevos ámbitos. La edición de 2013, qu’empezará’l 29 d’abril, va cuntar con diverses actividaes que busquen normalizar socialmente l’asturianu en campos como’l de la música, el teatru escolar o la promoción gastronómica, turística y cultural en xeneral. La intención ye programar eventos o realizar actuaciones que lleguen a públicos distintos y a tolos tramos d’edá.

Too ello ensin perder de vista la vocación orixinal de la Selmana de les Lletres, dedicada a visibilizar y potenciar la lliteratura fecha n’asturianu. Nesti sen, van realizase actos destinaos a poner en valor la figura y la obra de Nené Losada, una de les poetises más destacaes del panorama lliterariu asturianu de les últimes décades. A ella y la so obra va tar dedicada la publicación d’un llibru conmemorativu que se va regalar el vienres 3 de mayu, Dia del Llibru Asturianu, cola compra d’otru llibru escritu n’asturianu.

Nené Losada Rico (L.luarca 1921-2009) empezó bien llueu a escribir poemes y relatos en castellán y n’asturianu occidental, llingua que conoció fondamente mientres la so infancia y mocedá nel pueblu de Sanfliz de Trevías. Siguiendo’l cercu marcáu pol Padre Galo, empezó escribiendo poemes en tonu popular que fueron evolucionando temática y formalmente hacia nueves formes d’espresión llírica ya intimismu. La so obra puede atopase nos poemarios Cantares valdesanos (Llibros del Pexe, 1992), Entre apigarzos (Trabe, 1997) y El nome de las cousas (Trabe, 2001); nes antoloxíes Fueyas que reverdecen (Atenéu Obreru de Xixón, Colección “Tiempu de cristal”, 2005) y Obra poética en castellano (llibru + CD) (coedición de la Fundación Fernández Lema y Trabe), amás de nel volume Obra completa n’asturianu (Trabe, 2011).

Dientro de los actos programaos esta 34 Selmana de les Lletres Asturianes son de destacar la celebración d’una gala dedicada a la música y la poesía n’asturianu que se fadrá nel auditoriu del Centru Niemeyer el martes 30 d’abril; y la celebración del I Certame de teatru Escolar en llingua asturiana/gallego-asturianu, yá convocáu y que va rematar con una Gala nel Teatru de Llaboral Ciudá de la Cultura’l miércoles 8 de mayu.

(1 de abril de 2013)