Cincoxcinco= Adolfo Camilo Díaz

(Caborana, 1963) Escritor, traductor y xestor cultural. Destaca como autor de testos teatrales y de noveles curties y tien ganaos dellos de los premios más prestixosos de la lliteratura asturiana, como’l Xosefa de Xovellanos (en tres ocasiones) o’l de novela curtia de l’Academia de la Llingua. Homede teatru, formó y participó nos grupos “Güestia” y “Amorecer”.

Nel ámbitu institucional trabayó como animador cultural nos conceyos de Carreño, Corvera y Avilés. Tamién forma parte del Conseyu d’Alministración de la Radiotelevisión Asturiana. Aparte de les sos collaboraciones na prensa, lleva asoleyaos hasta la fecha 17 llibros, principalmente de narrativa o rellacionaos col teatru, onde destaquen títulos como Imago, Añada pa un güeyu muertu,o El vientre del círculu.

1.      Proponga un menú lliterariu: entrada, platu principal y postre.

De manu fadría un platu combináu: unos versos de Vanessa Gutiérrez, un cuentiquín de Cortazar, una novelina de Richard Matheson, un artículu de Plá, un guión de Guillermo Arriaga. Bien mecío y deconstruío con saliva de besos a la medianueche y música de Silvio Rodríguez, Bjork y Dixebra. Too ello en plan nueva cocina, ello ye, quedar con fame (de lliteratura)

2.      ¿Cuálu foi l’ últimu llibru que sacasti en préstamu d’una biblioteca?

“La Universidad Laboral de Gijón”, un escelente cartafueyu publicáu por Inocencio Ares sobre la obra maestra de Luís Moya y que sacó El Comercio nel 1997. En xunto cola magnífica historiadora del arte Mercedes Menéndez acabo facer la “Guía Secreta dela Llaboral”, que darréu va salir en Madú.

3.      ¿Qué escena lliteraria-y vien nesti momentu a la cabeza?

El besu de Fermín de Pas a Ana Ozores.La Rexentasigue siendola Bibliay el BOPA del nuestru país (Asturies).

4.      ¿Tiense namorao de dalgún personax lliterariu?

De munchos… Eso sí, con unos foi sobremanera sexu… Con otros yá hebo más asuntu.

5.      Indique una triada de poetes.

Safo, Pessoa, Ángel González

6.      ¿Cuála foi la Biblioteca la so vida?

La familiar del mio tíu José Álvarez (Pepón d´Usebio) enLa Vega Vil.layana.La pública vieya d´Avilés, na cai Xovellanos.

7.      ¿Con qué llibru despertaría l’amor a la llectura nun adolescente?

Con cualisquiera de los menos conocíos de Verne (y con munchos de los más conocíos): Miguel Strogoff, Énte la bandera,La Xangada… Verne sigue siendo un provocador (en tolos sentíos).

8.      Cite tres novelistes pa siguir por cualquier llector.

Ricardo Menéndez Salmón, Philiph Roth… y un clásicu malditu desapaecíu pero siempre seguible y reivindicable: Jean Ray.

9.      Proponga una midida a favor de la difusión de la llectura.

Nun obligar a lleer llibros nel bachilleratu.

10.   ¿Quiénes son los sos compositores o músicos favoritos?

Leonard Cohen, Silvio Rodríguez, Janis Joplin, Giovanotti, Battiato, Manu Chao,La Mala, Amy Winehouse…

11.   ¿Hai dalguna llectura que-y marcara especialmente na vida?

La Metamorfosis, de Kafka. Con 13 años lleyéralo seis veces. Nun sé si pegó dalgo (de Kafka o de la cucarachona: inda nun lo se)

12.   ¿Sabría dicime qué ye un “tejuelo”?

Ye la etiquetina que se pon nel llombu del llibru pa identificalu… Y ye una palabra bien guapa. Bien del “tengere” latinu que dio en “tapar” o “protexer” y d´ehí la palabra “teya” y de “teya”, “teyina”, que vendría la tradución al asturiano más aprosimao del castellanu “tejuelo” (llevo unos añinos coordinando y/o collaborando coles áries de biblioteca de los conceyos onde trabayé y dalgo siempre se pega –vuelvo a lo de Kafka)

13.   ¿Qué persona viva-y inspira más despreciu?

Hai unu que se multiplica: esi que ye grande colos pequeños y diminutu colos grandes. En cada país lleva un nome: Bush, Aznar o Putin son tópicos que lu identifiquen. Pero de seguro que, cerquillina d´onde vivimos, trabayamos o amamos hai unu/a. Cuidao con ellos: siempre voten al partíu ganador y acaben de conceyales, críticos lliterarios o ausiliares administrativos especializaos nel vuelva usté mañana y nos “moscosos”.

14.   ¿A qué persona viva admira?

A Olaya Llucía… Y nun ye amor de padre.

15.   De xuro que podría recomendanos la visión de, polo menos, tres películes.

Blade Runner de Ridley Scott, Brazil de Terry Gilliam o El Angel Exterminador de Buñuel. Por dir a lo que güei se ta faciendo nel estáu,la Coixet, Balagueró o Alex dela Iglesia tán marcando territorios creativos de munchu interés.

16.   ¿Qué poema interpreta los sos sentimientos?

Depende de los sentimientos… Llevo una temporaína de confusiones emocionales, que ye una manera como otra cualisquiera, qu´andar boriando pel desiquilibiu. Pa momentos asina ná meyor que´l carmina 84 de Catulu, aquel que diz: “Odi et amo. Quare id faciam. Fortasse requiris. Nescio, sed fieri sentio et excrucior” Obra maestra que vien decir, en traidora y prosaica versión: “Odio y amo. Al meyor tas entrugandote que por qué faigo esto… Nun lo sé, pero asina toi y bien que lo siento”.

17.   ¿Cuáles son los sos nomes -de persona- favoritos?

Llucía, Olaya, Llara, Malía… Nemo, Neville…

18.   ¿Ta d’acuerdu cola aplicación d’un canon pol préstamu en biblioteques?

La economía de mercáu ye lo que ye y, préstenos o nun nos preste, los trabayadores de lo creativo, los qu´enllenen de sentíu eso que llamamos ociu, diversión… A los que con tanta alegría celebramos nel TopManta, baxamos d´Internet o fotocopiamos comen y caguen como los demás. Naide nun muerre por pagar una tasa pola gasolina o pol pinchu que ponen nuna barra, y que te lu cobren col vinu o la sidra. Nun creo que tenga más drechos, nesa economía de mercáu, un fubolista qu´un poeta. Caún respuende al espectáculo que-y toca.

19.    Los artistes más admiraos son…

Los que nun m´aburren. Hai munchos. Anque nun tiendo admirar a naide (en quitando a Olaya Llucía), sí a mirar y, nel so casu, a deprender. Encántame Adolfo Manzano, Maite Centol, Hopper, Marina Abramovich… Depende del llinguaxe. Hai artistes que se dediquen a la papiroflexa o a la maxa que me flipen más que tolos qu´acaben n´Arco no na Llaboral.

20.   L’últimu llibru que compró foi…

La Ofensa de Ricardo Menéndez Salmón.

21.   ¿Podría dicinos cómo ordena la so biblioteca personal?

En función dela Lleidela Gravedá. Avezoponer los más grandes, abaxo y a los llaos, pa qu´aguanten polos otros… Tengo unos venti mil llibros y un espaciu que nun ta fechu a esa escala. El saber sí ocupa llugar, jode, pero asina ye.

22.   ¿Ónde-y prestaría vivir?

Nunos llabios. Indistintamente arriba qu´abaxo (nun temo les altures nin la humidá).

Los llabios puen tener vistes al Mediterranéu.

23.   Pal so entender ¿cuála ye la meyor obra lliteraria adaptada pal cine?

¿Sueñan los androides con ovejas eléctricas” de Philiph K Dick, que dio na matricial y magistral “Blade Runner”.

24.   ¿Qué ta lleendo actualmente?

Avezo lleer delles obres a la vez y de palos mui destremaos. Agora toi col guión d´El Xeque Blancu de Federico Fellini, La vida de Pi de Yann Martel y l´ensayu El Cine Negro Americano de Robert Porfirio.

25.   ¿Pa qué sirve la llectura?

Pa nun tener que matar.

Pa nun tener que morrer.

Pa saber qué pudo pasar,

quién pude ser, qué voi facer.

Qué voi sentir.

Qué vas sentir.

(Publicado en Biblioasturias11)