Cincoxcinco= Inaciu Galán

Inaciu Galán y González (Xixón, 1986) ye Máster en Sociedá de la Información y el Conocimientu na Universitat Oberta de Catalunya (UOC), Diplomáu en Turismu y Especialista en Xestión Cultural pola Universidá d’Uviéu, y anguaño ta rematando los estudios de Periodismu na Universidá a Distancia de Madrid (UDIMA). Comprometíu cola defensa de la llingua asturiana, en 2012 fue reconocíu col Premiu Urogallo del Centru Asturianu de Madrid. Ente los sos munchos proyectos, destaquen, en 2004, l’impulsu dende Xareos! Xestión Cultural, y xunto a Benxa Pérez, la modernización del monólogu asturianu, organizando eventos relacionaos con esti xéneru y publicando en 2008 la primer Antoloxía de monólogu modernu ¡Pa echar unes rises!, con testos propios y d’otros autores, que preparó y prologó pa Ediciones Trabe. En 2011 asoleyó un nuevu volume tituláu Más monólogos… ¡Pa echar unes rises!, con testos de nuevos autores. Como articulista, escritor y traductor tien colaborao n’estremaes publicaciones; algamao diferentes premios en distintos xéneros, y tien feches y espublizaes en delles revistes tornes al asturianu d’obres en gallegu, castellán, catalán, inglés o francés, ente otres llingües. Y precisamente una revista, Formientu, ye ún de los sos trabayos más ambiciosos, col que lleva años dando voz a los escritores más nuevos de la lliteratura asturiana. Recién presentáu un númberu nuevu d’esta publicación, publicaba tamién per primer nel campu de la lliteratura infantil de la mano de la editorial Asturtoons. Un volume que cuenta con actividaes didáctiques y que se titula Nel, el coríu que nun sabía nalar.

1. Proponga un menú lliterariu: entrada, platu principal y postre.

P’abrir boca, unos haikus de Faraguyas, d’Esther García López, como platu principal una novela cualquiera de Dolfo Camilo Díaz y de postre, un llibru pa echar unes rises, Diálogu de la llingua o los gochos llinguateros de Milio Rodríguez Cueto.

2. ¿Cuál foi l’ últimu llibru que sacó en préstamu d’una biblioteca?

Soi un bibliófilu absolotu. Salvo necesidá puntual, soi más de faceme col llibru pa la mio biblioteca, pa desgracia de los que conviven conmigo.

3. ¿Qué escena lliteraria-y vien nesti momentu a la cabeza?

Una d’un monólogu que toi entamando a escribir sobre parrillaes.

4. ¿Namoróse de dalgún personaxe lliterariu?

Namorase ye siempres un poco facelo d’un personaxe, más que d’una persona real. Entós podría dicir que siempres.

5. Indique una triada de poetes.

Un clásicu, Pin de Pría; una poeta de voz popular llamada a convertise en clásicu, Nené Losada, y una apueste de futuru, la voz del escritor mozu Alberto Cla, que va estrenase na revista Formientu esti mesmu añu.

6. ¿Cuála foi la Biblioteca de la so vida?

-iempres rebusqué muncho nes biblioteques familiaries, les de los mios güelos. Y ellí apaeció la Antología del Bable que foi la primer publicación n’asturianu a la que tuvi accesu.

7. ¿Con qué llibru despertaría l’amor a la llectura nun adolescente?

-Con cualquier que-y preste. Hai que dexar a los rapazos averase a la lliteratura en llibertá. Nunca entendí’l vezu de tener qu’acabar los llibros sí o sí. Si nun te presta un llibru, pasa a otru, y más nos primeros años de llectura, cuando puedes garrar el gustu o la zuna polos llibros.

8. Cite trés novelistes pa siguir por cualquier llector.

Pablo Rodríguez Medina, Xandru Fernández y Xulio Arbesú.

9. Proponga una midida a favor de la difusión de la llectura.

La oficialidá de la llingua asturiana ayudaría abondo a que les obres n’asturianu tuvieren más llectores, porque l’asturianu tendría una presencia normal na escuela y la xente saldría formao pa lleer con naturalidá na so llingua.

10. ¿Quiénes son los sos compositores o músicos favoritos?

Préstame la música sele, los cantautores como Toli Morilla, Alfredo González o Carlos Rubiera, o fuera d’Asturies, Sergio Dalma, sobremanera cantando en catalán. Nuberu, Xabel, Anabel Santiago… pero la verdá, soi más bien fan de cantares que de cantantes. Hai que ganame con cada tema.

11. ¿Hai dalguna llectura que-y marcare especialmente na vida?

Quiciabes el ver ente les manes esa Antología del Bable de la Gran Enciclopedia Asturiana que taba per casa los mios güelos en La Collá (Siero).

12. ¿A qué autor rescataría del olvidu?

A los clásicos asturianos, tan poco reconocíos y trataos munches vegaes como autores menores, teniendo pieces mui interesantes y que teníen el méritu de llegar al so pueblu.

13. De xuru que podría recomendanos la visión de, polo menos, trés películes.

As good as posible estrenada en castellán como Mejor imposible, n’apariencia una comedia romántica más, pero pa min ye una película perbién fecha, con momentos pa rir, pa llorar… Mamma Mia una película pa los que-yos preste’l xéneru, y un curtiumetraxe n’asturianu 7377, de Sergio G. Sánchez, que dempués fizo’l guión d’El Orfanato.

14. ¿Qué poema interpreta los sos sentimientos?

Los sentiemientos cambien según el momentu, poro, indentifíqueste con unu o otru poema según el momentu vital –o del día- nel que tas.

15. ¿Cuáles son los sos nomes -de persona- favoritos?

D’home Illán, Enol, Lluis, Xuan… de muyer Olaya, Maruxa, Llara…

16. ¿A qué sitiu salíu de la imaxinación d’un autor-y gustaría dir?

A l’Asturies de “Sol reló” de Nicolás V. Bardio.

17. Los artistes más almiraos son…

Nel campu de la escultura préstame abondo Fernando Alba, autor de Solombre de lluz, escultura instalada nel paséu d’El muro en Xixón, y que como toles estatues que conecten colos playos, tien nomatu, “Les chaplones”.

18. L’últimu llibru que compró foi…

Historia de la televisión asturiana (1964-2006), de Cristobal Ruitiña.

19. ¿Puede l’e-book reemplazar al formatu clásicu?

Nunca. Hai usos pa los que tener un llibru dixital ye interesante, pero a los que mos presten los llibros queremos tenelos nes estanteríes. Albidro que siguirá esistiendo’l llibru en papel anque como un productu más de lluxu, una especie de delicatessen.

20. ¿Podría dicinos cómo ordena la so biblioteca personal?

Básicamente por xéneros, temes y colecciones. Amás, poles condiciones especiales de conservación, la mio Biblioteca de Llibru Vieyu n’asturianu, qu’inclúi obres dende’l XVII, manuscritos y otros materiales hasta los años setenta del siglu XX, por ser munchos d’ellos materiales delicaos, guárdase aparte. Apocayá entamé a sellar y rexistrar tolos llibros, pero entá queda munchu llabor pa tenelo too fecho.

21. ¿Ónde-y prestaría vivir?

Vivo feliz n’Asturies, soi medio urbanu medio rural, polo que me presta vivir a mediu camín, coles coses bones de los dos ámbitos.

22. ¿A qué persona viva almira?

A munches que ficieron munchos sacrificios por Asturies y que lluchen cada día pol futuru del país, de la so llingua. Son espeyos nos que mirase. Por suerte hailos a embute, pero nun son abondo tovía.

23. Pal so entender ¿cuála ye la meyor obra lliteraria adaptada pal cine?

De les estrenaes nos últimos años, paezme mui especial The Boy in the Striped Pyjamas, “El neñu en piyama de rayes”.

24. ¿Qué ta lleendo anguaño?

Lleo al mou d’espicha. Tengo una llarga estanteria xunto a la cama onde voi atropando les novedaes, els recuperaciones de llibros yá lleíos, revistes, escritos propios, y voi alimentándome con un pocoñín de cada según el día.

25. ¿Pa qué sirve la llectura?

Pa deprender, pa entretenese, pa perder el tiempu… depende.