Cincoxcinco= Ramón Lluís Bande

Ramón Lluís Bande (Xixón, 1972) ye escritor y cineasta. Ente la so obra narrativa destaquen títulos como Les habitaciones vacies o Teoría de la pertenencia. Tien dos llibros publicaos de lliteratura infantil: Un viaxe distintu y Historia d’un árbol. Grabó dos discos con Nacho Vegas: Diariu y Diariu dos. Na so producción cinematográfica aparecen títulos como El fulgor, Estratexa, De la Fuente, El Paisano, un retratu colectivu o Sangre. Tamién firmó películes musicales pa bandes como Manta Ray, Mus o Nacho Vegas. Dende 2007 dirixe dos espacios na Televisión del Principáu d’Asturies (TPA): la revista audiovisual de cultura asturiana Pieces y la serie documental Camín. De recién publicaba La vida pésima (De la Piedra Producciones, 2012), nel qu’un cruce de llinguaxes -el cine-testimoniu (Estratexa), la ficción cinematográfica (Sangre), el teatru radiofónicu (La vida pésima) o’l periodismu (Una vida marcada pola historia)- pa intentar dibuxar el retratu personal del guerrilleru Manuel Alonso González, “Manolín el de Llorío”.

1. Proponga un menú lliterariu: entrada, platu principal y postre.

Entrada: El viento comenzó a mercer la hierba, d’Emily Dickinson.

Platu principal: El Dolor, de Marguerite Duras.

Postre: El malentendido, d’Albert Camus.

2. ¿Cuál foi l’ últimu llibru que sacó en préstamu d’una biblioteca?

Hai tiempu que nun voi a la biblioteca…

3. ¿Qué escena lliteraria-y vien nesti momentu a la cabeza?

Aquella na qu’una moza conduz rápido peles carreteres d’Utah, mentes va falando coles cenices de la madre asitiaes, nuna urna de cerámica verde, nel asientu del copilotu, y para’l coche pa socorrer a un ferre atropelláu… El ojo parpadeante (Sam Shepard).

4. ¿Tien namoráose de dalgún personaxe lliterariu?

Non. Nun tengo tan desarrollada la capidá d’amar. Siempre soi consciente de la separación insalvable ente lo que lleo y lo que vivo.

5. Indique una triada de poetes.

William Carlos Williams, Raymond Carver y Tonino Guerra; por exemplu.

6. ¿Cuála foi la Biblioteca de la so vida?

La del Atenéu de La Calzada.

7. ¿Con qué llibru despertaría l’amor a la llectura nun adolescente?

Con “El extranjero” d’Albert Camus.

8. Cite trés novelistes pa siguir por cualquier llector.

De los imprescindibles: Marguerite Duras, Peter Handke y Franz Kafka.

D’ente los vivos: Michael Houellebecq, Hanif Kureishi y Barry Gifford, por exemplu.

9. Proponga una midida a favor de la difusión de la llectura.

Quita-y la solemnidá de les academies y les enseñances reglaes y ufiertala como lo que ye: ún de los mayores placeres que podemos alcontrar na vida.

10.¿Quiénes son los sos compositores o músicos favoritos?

Como fotografía d’esti momentu: Arvo Pärt, Scoot Walker, Nick Cave.

11. ¿Hai dalguna llectura que-y marcare especialmente na vida?

El descubrimientu de la lliteratura, de Marguerite Duras.

12. ¿A qué autor rescataría del olvidu?

A María Josefa Canellada.

13. De xuro que podría recomendanos la visión de, polo menos, trés películes.

Mouchette, de Robert Bresson; Sicilia!, de Jean Maria Straub y Daniele Huiellet y No quarto da Vanda, de Pedro Costa, por exemplu.

14. ¿Qué poema interpreta los sos sentimientos?

Depende’l día. O meyor dicho, depende’l momentu’l día de cada día. Esti podría tar bien: “Dios dio un pan a cada páxaru, / pero namás una miga a mí. / Nun m’atrevo a cómela, / anque muerra. // Tenela, tocala, / ye’l mio placer dolorosu. / Confirmar la fazaña que fexo míu’l cachín. / Feliz abondo, na mio suerte de gurrión, / pa codicia mayor”. (Emily Dickinson).

15. ¿Cuáles son los sos nomes -de persona- favoritos?

Llara y Vera, poles persones cercanes que-yos dan vida y significáu.

16. ¿A qué sitiu salíu de la imaxinación d’un autor-y gustaría dir?

La imaxinación de los autores qu’almiro sirve pa facer más habitable’l sitiu nel que vivo.

17. Los artistes más almiraos son…

Los hermanos Lumière.

18. L’últimu llibru que compró foi…

Un año ajetreado d’Anne Wiazemsky y Fama y soledad de Picasso, de John Berger.

19. ¿Puede l’e-book reemplazar al formatu clásicu?

Non, la coexistencia pacífica ye perfectamente posible.

20. ¿Podría dicinos cómo ordena la so biblioteca personal?

Ensin nengún tipu d’orde. Los llibros van escoyendo l’espaciu que quieren habitar na biblioteca (y nel restu la casa).

21. ¿Ónde-y prestaría vivir?

Toi agusto onde toi, anque un cambiu radical de modelu social nun vendría nada mal, la verdá.

22. ¿A qué persona viva almira?

A Manoel de Oliveira, por exemplu.

23. Pal so entender ¿cuála ye la meyor obra lliteraria adaptada pal cine?

Como película individual: Diario de un cura rural, de Georges Bernanos adaptada por Robert Bresson. Como métodu de traducir la lliteratura en la pantalla: el trabayu de Jean Marie Straub y Daniele Huillet, y el de Marguerite Duras.

24. ¿Qué ta lleendo anguaño?

Siempre toi con varios llibros al tiempu, agora: Un año ajetreado, d’Anne Wiazemesky; La vida interior de las plantas de interior, de Patricio Pron; Interperie, de Jesús Carrasco y Lo viejo y lo nuevo, de Santos Zunzunegui, ente más otros.

25. ¿Pa qué sirve la llectura?

Pa siguir buscando’l sentíu a dalgo que sabemos que nun lu tien…

La vida pésima

Ramón Lluis Bande

De la piedra Producciones

108 paxs.

///

Los textos recoyíos en La vida pésima son el resultáu d’una obsesión pola figura del guerrilleru Manuel Alonso González, Manolín el de Llorío. Aquel paisanín de falar posáu y mirada intensa yera l’últimu superviviente de la guerrilla antifranquista asturiana y ún de los tres o cuatro combatientes comunistesdel monte que nun morrieran en manes del enemigu.

Un cruce de llinguaxes –el cine-testimoniu, la ficción cinematográfica, el teatru radiofónicu o el periodismu– pa intentar debuxar el retratu personal d’una vida exemplar.

(7 de marzo de 2013)