Cincoxcinco = Francisco Álvarez

Francisco Álvarez (Xixón, 1970) ye periodista, escritor y traductor d’italianu. Autor d’una decena de llibros n’asturianu y en castellanu, de ficción y de non ficción, ente ellos Lluvia d’agostu (Hoja de Lata, 2016), novela cola que llogró’l Premiu Xosefa Xovellanos y el Premiu de la Crítica d’Asturies y que se publicó tamién en castellanu. La so obra más reciente ye’l volume de cuentos históricos Pasaxeres de la nueche (Hoja de Lata, 2019). Ye’l traductor, ente otres, de les noveles del escritor sardu Marcello Fois Memoria del vacío (Hoja de Lata, 2014), que ganó’l Premiu al Meyor Llibru Italianu Publicáu n’España, y  Estirpe’ (Hoja de Lata, 2016), Premi Llibreter de Catalunya.

1. Proponga un menú lliterariu: entrada, platu principal y postre.

Propongo un menú cocináu nes tres llingües qu’amo: l’asturianu, el castellanu y l’italianu.  Hestoria universal de Paniceiros,  de Xuan Bello; Los girasoles ciegos, d’Alberto Méndez, y Esercizi di memoria,  d’Andrea Camilleri, autor sicilianu que nos dexó va unos díes.

2. ¿Cuál foi l’últimu llibru que sacó n’empréstamu d’una biblioteca?

Cuando tengo un ratín llibre voi a dalguna biblioteca pública de Xixón a lleer revistes especializaes y a lleer llibros ‘a plazos’, pero va tiempu que nun los saco, esa ye la verdá.

3. ¿Qué escena lliteraria-y vien nesti momentu a la mente?

El principiu de Cien años de soledad, de Gabriel García Márquez. Cuando’l coronel Aureliano Buendía, a puntu de ser fusiláu, recuerda’l día en que so pá llevólu a conocer el xelu.

4. ¿Namoróse de dalgún personaxe lliterariu?

Namoréme d’unos cuantos personaxes reales a los qu’usé como personaxes lliterarios na mio novela Lluvia d’agostu: Buenaventura Durruti, Francisco Ascaso y tolos homes y muyeres del grupu Los Solidarios que, como dixo Durruti, llevaben un mundu nuevu nos sos corazones.

5. Suxera una tríada de poetes.

Rosalía de Castro, Federico García Lorca y Pablo Neruda.

6. ¿Cuála foi la (o les) Biblioteca de la so vida?

Una biblioteca que tenía ruedes y volante: el Bibliobús, famosu pa quienes fuimos neñes y neños nos años setenta. Yera un autocar enllenu de llibros que paraba, ente otros munchos llugares, na mio cai, nel barriu xixonés de Pumarín. El conductor-bibliotecariu que me tocó a mi tenía un carácter avinagráu, pero pesie a ello guardo un recuerdu bien prestosu d’aquel vehículu que golía a papel, a aventura y a maxa.

7. ¿Con qué llibru espertaría l’amor a la llectura nun adolescente?

A mi valiome Un drama en el océano Pacífico, d’Emilio Salgari, y n’asturianu El Norte, de Vicente García Oliva. Pero los tiempos cambien y les xeneraciones tamién… La mio sobrina Laura, que ye adolescente, ta enganchada agora a El lector de Julio Verne, d’Almudena Grandes. Y a mi paezme bien, lo importante ye lleer.

8. Cite trés novelistes pa siguir por cualquier llector.

Charles Dickens, Marguerite Yourcenar y Leonardo Sciascia.

9. Proponga una midida a favor de la difusión de la llectura.

Estudiar y copiar les polítiques de cultura de países como Finlandia (que ye exemplar pa esto y pa munches coses más). Ellí’l promediu de llectura ye de 47 llibros por persona al añu, cuasi un llibru cada selmana. Y nun me paez que seya por casualidá.

10. ¿Quién son los sos compositores o músicos favoritos?

Hai milenta, pero voi escoyer ún que nun quixo pasar a la historia como compositor, pesie a que compunxo una de les pieces de música clásica más conmovedores de tolos tiempos. El famosu Adagio’d’Albinoni nun lu compunxo Albinoni, sinon el musicólogu italianu Remo Giazotto, que nunca quixo atribuise l’autoría d’esa obra. Dixo qu’él solo ficiera los arreglos, pero en realidá yera una creación dafechu d’él; compúnxola al paecer en 1945, dos sieglos dempués de la muerte d’Albinoni. Nun sé por qué lo fizo, quiciás pensó que si atribuía la firma a Albinoni diba ser más fácil qu’esa obra se convirtiera no que ye anguaño: una obra universal que va siguir sonando a traviés de los sieglos. Y lo curioso ye que la composición más famosa d’Albinoni nun la fizo él.

11. ¿Dalguna llectura marcó especialmente la so vida?

El camino de Varennes d’Alejandro Dumas padre. Saqué’l llibru de la biblioteca del Institutu Doña Jimena de Xixón, onde taba faciendo’l Bachilleratu y cuido que l’enclín que tengo a escribir cuentos y noveles históriques tien muncho que ver con aquella llectura.

 12. ¿A qué autor rescataría del escaecimientu?

A Luis Ricardo Alonso, novelista asturcubanu que morrió va cuatro años en Pensilvania, onde trabayó como profesor universitariu. Ye autor de El candidato,  finalista del Nadal en 1969, y de La estrella que cayó una noche en el mar, cola que ganó’l Premio Asturias en 1995.

13. De xuru que podría aconseyanos la visión de polo menos trés películes.

Casablanca, de Michael Curtiz; El padrino de Francis Ford Coppola, y La escopeta nacional, de Luis García Berlanga. Y como la entruga diz “polo menos tres”, doi otra de propina: Primera plana , de Billy Wilder.

14. ¿Qué poema interpreta los sos sentimientos?

Oltre il ponte (Más allá de la ponte). Anque más qu’un poema ye la lletra d’un tema musical escrita pol escritor Italo Calvino na qu’evoca los sos díes, duros y fermosos, como partisanu n’Italia.

15. ¿Cómo ve’l panorama editorial asturianu?

Con aforfugu pero con esperanza. En xeneral, cuerren tiempos malos pa la llírica, pa la épica y pa tolo demás. Pero sigue habiendo autores y editoriales que defenden y qu’apuesten pola bibliodiversidá. Porque pa facer más de lo mesmo yá tán los grupos editoriales multinacionales, que funcionen como churreres.

16. ¿A qué sitiu salíu de la imaxinación d’un autor-y prestaría treslladase?

A Utopía, la isla qu’imaxinó va cinco sieglos Tomás Moro, al qu’acabaron quemando na foguera.

17. Los sos artistes más almiraos son… (referío a pintores, escultores, fotógrafos, arquitectos…).

Hai tantos… Quédome con un pintor que protagoniza L’home de la lluz y la tiniebla, el cuentu últimu que me premiaron, en Candamu. Llamábase Michelangelo Mersini, pasó a la historia como Caravaggio.

18. L’últimu llibru que mercó foi…

Todos los naufragios, de la escritora xixonesa Laura Castañón.

19. ¿Pue l’e-book reemplazar el formatu clásicu?

Non. Ye más, los datos que conocimos va poco sobre’l sector editorial dicen que’l llibru electrónicu ta estancáu. Dicho esto, lo importante ye que la xente llea o qu’escuche lliteratura; da igual si ye en papel, en formatu electrónicu, n’audiollibru o en radionoveles. La lliteratura entra pelos cinco sentíos.

20. ¿Podría dicinos cómo ordena la so biblioteca personal?

Ensin orde nin conciertu. La mio biblioteca, amás de ser anarquista pol carácter de dalgunos de los llibros, ye anárquica.

21. ¿Ónde quedría vivir?

N’Italia. Yá viví ellí un tiempu y, si cuadren los acontecimientos, espero volver ellí ceo.

22. ¿A qué persona viva almira?

Al mio meyor collaciu. Llámase Xurde Rodero, ye’l tipu más honestu, coherente, reflesivu y xenerosu que conozo.

23. Al so paecer, ¿cuála ye la meyor obra lliteraria adaptada pol cine?

La meyor nun sé, pero pongo como exemplu La lengua de las mariposas, que ye l’adaptación cinematográfica de tres de los cuentos de ¿Qué me quieres, amor,  de Manuel Rivas. El guión, escritu pol director José Luis Cuerda, pol gran guionista Rafael Azcona y pol propiu Rivas, respeta y intensifica esa parte del llibru que reflexa la película.

24. ¿Qué ta lleendo actualmente?

Amianto, el primer títulu d’una triloxía del autor italianu Alberto Prunetti.

25. ¿Pa qué val la llectura?

P’alimentar la fantasía, que ye la forma meyor de nun conocer nin reconocer l’aburrimientu. Tengo una amiga milanesa, Elena Carrara, que suel dicir que “la noia è una mancanza di fantasia”, y pamidea que tien razón: l’aburrimientu ye la falta de fantasía.

Pasaxeres de la nueche

Fráncisco Álvarez

Hoja de Lata

256 paxs.

///

¿De qué falen les muyeres d’ún de los cuadros más famosos del sieglu xx cuando queden soles nel muséu? ¿Qué historia hai detrás d’esi mineru que baxa toles mañanes cantando a la mina? ¿Qué pasa pela cabeza d’una sicaria brasileña qu’afuega n’alcohol les llagues del so alma d’asesina? ¿A quién s’encomendaba’l xeneral napoleónicu que comanda les tropes franceses enantes d’entamar la batalla de la Ponte de Peñaflor, nel conceyu de Candamu?

«Lo que facemos quienes escribimos ye crear y criar personaxes pa nutrinos d’ellos, pa intentar deprender con ellos a esmarañar y a interpretar esos sentimientos y emociones que son el leitmotiv inalterable de la historia y de la humanidá: l’amor y l’odiu, el rencor y el perdón, el mieu y el valor, la esperanza y la desesperación, l’arguyu y l’arrepentimientu…», confiesa l’autor nel prólogu a esti volume.

Pasaxeres de la nueche recueye la meyor narrativa curtia de Francisco Álvarez, ganador de los premios Xosefa Xovellanos y de la Crítica d’Asturies cola so primera novela, Lluvia d’agostu, quiciabes el debú más sorprendente na lliteratura asturiana de los últimos años.

Semeya de Paco Álvarez: Pablo Lorenzana

(26 xunetu de 2019)