Cincoxcinco = Miguel Rojo

Miguel Rojo (Zarracín, Tinéu, 1957) ye escritor de reconocíu prestixu nes lletres asturianes y de llarga trayectoria lliteraria, mesmo n’asturianu qu’en castellanu. La so capacidá creativa algama casique tolos xéneros lliterarios, pero ye más conocíu como narrador y poeta. Tien publicaos los poemarios Buscador d’estrel.las, 1996; Bilbao: estación terminal, 2001; Llaberintos, 2006; Territorios –ed. billingüe–, 2007 y El Paséu / El Paseo, 2011. Creador d’una de les noveles más vendíes de la lliteratura asturiana del Surdimientu, Histories d’un seductor (memories d’un babayu) –1993–, ye autor tamién d’Asina somos Nós (2.ª ed. 2011), Tienes una tristura nos güeyos que me fai mal (1989), Cuentos pa un turista blancu (2006), La ponte y otros cuentos (2009) y L’amor suicida / El amor suicida (2014), amás de delles publicaciones infantiles.

1. Proponga un menú lliterariu: entrada, platu principal y postre.

Un poema de Berta Piñán
Desgracia de Coetze.
Los cuerpos celestes de José A. Gayol.

2. ¿Cuál foi l’últimu llibru que sacó n’empréstamu d’una biblioteca?

Una guía de Grecia, fai un mes.

3. ¿Qué escena lliteraria-y vien nesti momentu a la mente?

Una que toi escribiendo: el descubrimiento d’un rapaz de cómo ´l so pa tien relaciones sexuales con una prima qu’acaba llegar a casa.

4. ¿Namoróse de dalgún personaxe lliterariu?

D’ Odette, una “cocotte” qu’apaez en La busca del tiempo perdido de Proust, cola que se casa Swann y que me producía una gran tenrura pol so esvalimientu y amor imposible.

5. Suxera una tríada de poetes.

Antonio Machado, Charles Simic, José Luis Piquero.

6. ¿Cuála foi la (o les) Biblioteca de la so vida?

L´antigua biblioteca pública de la plaza Porlier, n´Uviéu.

7. ¿Con qué llibru espertaría l’amor a la llectura nun adolescente?

El guardián entre el centeno de Salinger.

8. Cite trés novelistes pa siguir por cualquier llector.

Camus, Kawabata, Muñoz Molina.

9. Proponga una midida a favor de la difusión de la llectura.

La non midida.

10. ¿Quién son los sos compositores o músicos favoritos?

Sebastian Bach, Lou Red, Diamantina, Nick Cave, Los Berrones, Deep Purple, Aute, Vivaldi…

11. ¿Dalguna llectura marcó especialmente la so vida?

La llectura de A la busca del tiempo perdido, de M.Proust. Esta novela enseñóme les infinites posibilidaes de la lliteratura, non sólo como conocimiento históricu d’una época, sinon tamién, y más importante, el conocimiento del ser humanu en tola so abegosa complexidá.

 12. ¿A qué autor rescataría del escaecimientu?

A José Luis Martín Vigil. Noveles como Sexta Galería o La vida sale al encuentro engancháronme definitivamente a la lliteratura cuando yera un adolescente.

13. De xuru que podría aconseyanos la visión de polo menos trés películes.

El Padrino, El resplandor y cualquier de Fellini

14. ¿Qué poema interpreta los sos sentimientos?

Los mios sentimientos cambien tres o cuatro veces por día. ¿Hai un poema pa cada momeno? Nun lo tengo mui claro.

15. ¿Cómo ve’l panorama editorial asturianu?

La edición n´Asturies va pareya a tol restu actividades de la rexón. Somos una comunidá ensin muncho peso específicu dientro l´Estáu y les nueses editoriales xueguen nesa división de segunda, non precisamente contra molinos, sinon a la escontra de xigantes de verdá. Por otru llau, nun convien escaecese de qu´apenes llegamos al millón d´habitantes. Por eso ´l méritu de los nuesos editores ye grande por seguir adelantre col so trabayu y facer llibros cola calidá y el gusto col que lo fain.

16. ¿A qué sitiu salíu de la imaxinación d’un autor-y prestaría treslladase?

A dalgún de los paisaxes y mundos de les noveles de Robert L. Stevenson.

17. Los sos artistes más almiraos son… (referío a pintores, escultores, fotógrafos, arquitectos… etc.)

Perdonai: pero la llista ye demasiáu grande pa ponela equí.

18. L’últimu llibru que mercó foi…

La lengua de los árboles del poeta llionés Antonio Manilla.

19. ¿Pue l’e-book reemplazar el formatu clásicu?

Poder podrá, quién sabe les revueltes que trai ´l camín, pero a mí nun me garrará. A mí prestame sentir el tactu físicu de los llibros, velos medrar polos requexos de la casa, atopalos en cualquier llugar inesperáu… Y, amás, son un artiluxo estéticu que me gusta.

20. ¿Podría dicinos cómo ordena la so biblioteca personal?

Por orde alfabéticu. Tengo una seición n’asturianu, otra en castellán y otra pal restu llingües. Separo poesía de narrativa. Y otra estantería pa llibros d´Hestoria.

21. ¿Ónde quedría vivir?

Onde vivo

22. ¿A qué persona viva almira?

A mio má.

23. Al so paecer, ¿cuála ye la meyor obra lliteraria adaptada pol cine?

Tambor de hojalata de Günter Grass. O El Gatopardo de Lampedusa.

24. ¿Qué ta lleendo actualmente?

El murmullo de Belén Gopegui

25. ¿Pa qué val la llectura?

La entruga tenía que ser al revés: ¿Pa qué nun val la llectura?. A mi valme pa casi too: pa conocer otros mundos, otros tiempos, otras xentes, otra manera d’entender les coses, pa reflexionar, pa maravillame, pan nun aburrime, pa deprender, pa esfrutar, pa llorar, pa reir, pa sentime bono, pa sentime malváu, pa que me venga ´l suañu, pa suañar… En fin, pa ser más feliz.

La edá de la memoria / La edad de la memoria

Miguel Rojo

Trabe

114 páxs.

2023

///

Dividíu en tres partes («La edá del l.l.imiagu», «La edá del guepardu» y «La edá del buei»), esti poemariu ye la obra d’un home yá fechu, maduru, cola memoria enllena y los movimientos cansos y lentos del buei. La primer parte, escrita n’asturianu occidental, correspuende a la memoria de la infancia; la segunda a la fase adulta, fuerte, segura de sigo mesma: la edá del amor y del deséu. La memoria allarga colos díes y el vivir y con ella crecen los versos y los poemes, correllatu cuasi perfectu de la señardá. La edá de la memoria, editáu en versión billingüe asturianu-castellanu, ruempe con más d’una década de silenciu poéticu del autor.

(12 de xuno de 2023)