Cincoxcinco= Cristina Muñiz Martín

(Xixón, 1953) Amás de narradora, ye creadora de monólogos y escritora de guiones radiofónicos. Llega al mundu de la lliteratura de la mano precisamente de Dolfo Camilo Díaz, de quien foi alumna nos talleres de creación lliteraria de Corvera. Entama a publicar na editorial Trabe nel añu 2005 col volume de cuentos Onde pisen poques güelles, col que fue quien a sorprender y agradar tanto a la crítica como al públicu llector. Desde entós tien publicaos na mesma editorial dos volúmenes más de rellatos (El buscador d’hestories y Kárias, de reciente aparición), una novela (Ventiocho díes, 2008) y dellos monólogos nos llibros conxuntos Ente muyeres (2007) y ¡Pa echar unes rises! (2008). Con too ello ta confirmándose como una de les más sólides voces de la narrativa asturiana.

1. Proponga un menú lliterariu: entrada, platu principal y postre.

Pa facer boca Cuentos de Mario Benedetti; de platu fuerte Cien años de soledad y un postre variáu de poesíes n´asturianu.

2. ¿Cuálu foi l’ últimu llibru que sacasti en préstamu d’una biblioteca?

Unu de biografíes, de la coleición Asturianos universales, que necesitaba pa un trabayu

3. ¿Qué escena lliteraria-y vien nesti momentu a la cabeza?

La qu´escribí enantes de facer esta entrevista

4. ¿Tiense namorao de dalgún personax lliterariu?

Non, de nengunu.

5. Indique una triada de poetes.

Miguel Hernández, Baudelaire, María Teresa González.

6. ¿Cuála foi la Biblioteca la so vida?

Unos pocos llibros que tenía mio güelu, cuasi toos de Vicente Blasco Ibáñez, el quioscu onde cambiaba tebeos, los llibros que me mandaben nel colexu y los que fui mercando cada trimestre nel Círculu de LLectores.

7. ¿Con qué llibru despertaría l’amor a la llectura nun adolescente?

Con Rebelión en la granja de George Orwell.

8. Cite tres novelistes pa siguir por cualquier llector.

Dickens, García Márquez, Benedetti.

9. Proponga una midida a favor de la difusión de la llectura.

Quitar les llectures obligatories na escuela. Tener llibros en casa y apagar unes hores a la selmana la televisión, l´ordenador y la consola. Ofrecer al llector coses interesantes. Desmitificar la lliteratura…

10. ¿Quiénes son los sos compositores o músicos favoritos?

Verdi, la zarzuela, Sabina, Serrat, Nuberu…

11. ¿Hai dalguna llectura que-y marcara especialmente na vida?

La barraca de Vicente Blasco Ibáñez que llei, cuatro o cinco veces, el branu que cumplí los diez años.

12. ¿Sabría dicime qué ye un “tejuelo”?

Si, porque yá lo lleí n´otres revistes.

13. ¿Qué persona viva-y inspira más despreciu?

Tolos poderosos que xueguen cola vida de los demás.

 14. ¿A qué persona viva admira?

A esa persona anónima qu´anque la vida la machuque una y otra vuelta tira p´alantre ensin perder la dignidá.

15. De xuro que podría recomendanos la visión de, polo menos, tres películes.

Nun entiendo de cine, pero por dicir tres que me prestaron; El pianista, El laberinto del fauno y Los Otros.

16. ¿Qué poema interpreta los sos sentimientos?

Depende del momentu.

17. ¿Cuáles son los sos nomes -de persona- favoritos?

Ana y Sergio, los nomes de los mios fíos.

18. ¿Ta d’acuerdu cola aplicación d’un canon pol préstamu en biblioteques?

Non, de nenguna de les maneres.

19. Los artistes más admiraos son…

Ensin nenguna dulda los pintores; Velázquez, Vermeer, Millet, Degás, Van Gogh…

20. L’últimu llibru que compró foi…

La borra del café de Mario Benedetti y Los meyores cuentos del mundu y otres proses mongoles de José Luis Rendueles.

21. ¿Podría dicinos cómo ordena la so biblioteca personal?

Asturiano, llibros de consulta y tolo demás nun caos ordenáu.

22. ¿Ónde-y prestaría vivir?

De llunes a vienres viendo la playa San Llorienzo de Xixón. De vienres a domingu nuna casina pequeña nun pueblu de montaña de Teberga o Quirós.

23. Pal so entender ¿cuála ye la meyor obra lliteraria adaptada pal cine?

Si lleo un llibru nun veo la película y viceversa, asina que nun pueo opinar.

24. ¿Qué ta lleendo actualmente?

La borra en el café, Los meyores cuentos del mundu y otres proses mongoles y L´Azabachería asturiana.

25. ¿Pa qué sirve la llectura?

Pa vivir otros mundos, pa pasar un ratadín prestosu, pa suañar, p’aprender… pa ser más feliz.

(Publicado en Biblioasturias11)