El branu de Mirtya

El branu de Mirtya

Berta Piñán / il. Pablo Amargo

Ámbitu

32 p.

///

“Tolo que sé sobre la selva y sobre les orques y tolo que deprendí aquel branu, secretos y coses, deprendiómelo Mirtya. Con ella les coses fueren asina: vímonos y entendímonos. Entós les dos tábemos perdíes como sapos fuera del charcu asina que punxímonos a xiplar xuntes y yá nun paramos en tol branu. Mirtya venía de Tambo…”

D’esta forma empieza la hestoria de la relación entre Isabel, una neña de 8 años, y Mirtya, peruana, 50 años mayor qu’ella, que trabaya d’ emplegada doméstica en casa de la so tía Isabel, onde la nena ta braniando, a la que conoz un branu problemáticu pa la neña yá que los sos pás divorciáronse, y que-y cuenta un montón d’hestories del so pueblu y de les coses qu’ella facía ellí. Nin edá, nin país, nin cultura suponen un muriu ente les dos principales protagonistes, bien al contrariu, tou ello contribúi a xuniles. Toa una llección de interculturalidad. Dos protagonistes, muyeres ambes, que se xunen p’arreglar les sos soledaes.

La bella prosa de Berta Piñan llega como siempres bien dientro, al sentimientu mesmu, y avéranos a esta preciosa relación. Si a ello añedimos delles ilustraciones de Pablo Amargo, tamién como siempres intelixentes y delicaes, con animales como la perguapa orca qu’enllena la cubierta, tenemos un álbum preciosu, de pequeñu formatu, pa llectores infantiles, xuveniles y de cualquier edá.

Berta Piñán (Cañu, Cangues d’Onís,1963) ye una de les nueses escritores n’ asturianu más reconocies y premiaes. Dexando un llao la so obra p’adultos y n’especial la poética, po la que ye sobradamente conocida, la so obra pa públicu infantil empecípiase con Lula, Lulina (Trabe,1996) y sigue con El branu de Mirtya (Ambitu, 2005); Les cosas que le gustan a Fran (Hotelpapel, 2005), Les coses que-y presten a Fran (Trabe, 2008), Arroz, agua y maíz (Pintar-Pintar, ediciones en 2009 y 2010) obra galardonada col Premiu “María Josefa Canellada” de Lliteratura Infantil y Xuvenil 2008 y La mio hermana ye una mofeta (Pintar-Pintar, 2011, con ediciones n’asturianu y en castellán).

Pablo Amargo (Uviéu, 1971). Estudió Belles Artes na Universidá de Salamanca. Empieza a desenvolver el so llabor de ilustrador profesional a mediaos de los años noventa, collaborando en prensa, publicidá y especialmente, na realización d’ilustraciones pa llibros. Participó n’esposiciones individuales y colectives d’ámbitu nacional ya internacional. Tamién realiza talleres y conferencies sobre ilustración. Amás de los galardones recibíos por Non toles vaques son iguales, tien numberosos premios ente los que destaca’l Premiu Nacional d’Ilustración por El monstruo de la lluvia. Foi Premiu Motiva d’Ilustración 2000, 2004, 2005, 2010 y 2012. So llibru Casualidad, realizáu xuntu con Pepe Monteserín, recibió’l Premiu CJ Picture Book Award 2011, asina como otros premios. Tamién forma parte del grupu de siete ilustradores de Kipling ilustráu (Kalandraka, 2011) que recibio’l Primer Premiu Nacional d’Edición 2011 na categoría de Llibros infantiles y Xuveniles.