El Muséu del Pueblu d’Asturies presenta’l ‘Cancioneru de la gaita asturiana’

Esti vienres, 14 d’avientu, a les 12 la mañana, nel Salón d’Actos del Muséu del Pueblu d’Asturies de Xixón preséntase’l Cancioneru de la gaita asturiana, d’Eugenio Otero Vega, Fonsu Fernández García y Gausón Fernande Gutierri. Un rigurosu estudiu sobre un instrumentu fundamental na música asturiana, un importante esfuerzu editorial, una obra d’especial rellevancia nel campu de la etnografía y el folclor de nueso.

Na sociedá tradicional asturiana la gaita foi l’instrumentu encargáu de pone-y música a la vida comunitaria, acompañando’l baille, el cantu y los cortexos, lo mesmo cívicos que relixosos. L’instrumentu, d’aniciu medieval, emprincipia a documentase en monumentos relixosos, tumbos y documentación alministrativa dende’l sieglu XIII, alitando fasta anguaño nuna tradición viva que pue rastrexase al traviés de delles dómines.

El primer tomu (Historia y usos) revisa les fontes afayadices y, encontando nelles, propón una historia d’esti instrumentu, na que son protagonistes los gaiteros mesmos, los artesanos facedores y la xente asturiana que, magar tolos cambeos sociales ya influyencies estétiques y culturales, caltuvieron n’usu la gaita xeneración tres xeneración, allegando a da-y un valir patrimonial y a convertila en símbolu musical del país.

El segundu tomu (Partitures) atropa una amuesa de sones, col envís d’ufrir a los escolinos ya inclusive a los gaiteros avezaos la posibilidá d’afayar enxunto unos materiales que fasta anguaño taben mayormente arramaos.

(10 d’avientu de 2012)