Cincoxcinco= Esther García

(La Degol.lada,Valdés). Ye Llicenciada en Pedagoxía, Esperta en Filoloxía Asturiana pola Universidá d’Uviéu y Maestra de Primera Enseñanza. Miembru de l’Academia de la Llingua Asturianay collaboradora habitual de La Nueva España y d’otros periódicos y revistes. Na so obra lliteraria destaquen títulos como L.luribaga (ALLA, 2003), Tiempu d’iviernu (2005), Historias de vida ya señas de muerte (2006), Faraguyas (Haikus) (2007), publicaes por Madú. Y les obres premiaes, Pisadas -Premiu Uviéu de Poesía 2006; La maestra (2008) -Premiu Xosé Álvarez 2007 de narrativa-, y el rellatu Performance –Premiu Fernández Lema (2007)- ente otres munches. Ye tamién autora de varios llibros de didáutica ya investigación etnográfica ya histórica, llibros de testu y cuentos al rodiu de la llingua y cultura asturiana. Les sos últimes obres van dirixíes a un públicu infantil: Musical-landia (2008) y Menú de Versos (2009), dambes editaes por Pintar-Pintar.

1. Proponga un menú lliterariu: entrada, platu principal y postre.

Bocadinos variaos de poemes, pa encomenzar. Primer platu: un “cuentu mínimu” que nos ponga en situación de bona dixestión. Segundu platu: unos cuantos “cadáveres esquisitos” a gustu del consumidor. Postre: Un poema d’amor,  allumáu por una velina prendida.

2. ¿Cuálu foi l’ últimu llibru que sacasti en préstamu d’una biblioteca?

El punto ciego de Daniel Goleman.

3. ¿Qué escena lliteraria-y vien nesti momentu a la cabeza?

La de Pinín y Rosa cuando’l so pá viende a la vaca Cordera. Ye una escena un poco triste que reviví estos díes lleendo’l cuentu Adiós Cordera de Clarín colos mios alumnos.

4. ¿Tiense namorao de dalgún personax lliterariu?

Tanto como namorame …enxamás creí nos amores platónicos (peor pa mi), anque seya en lliteratura. Pienso qu’a la escontra de lo que me pasa na vida real, en lliteratura namórome y desnamórome con facilidá, dúrame’l namoramientu mientres lleo la historia o’l poema y cuando cambiu pa otra llectura, pues vuelvo a emocioname.

5. Indique una triada de poetes.

Nun me gusta muncho citar nomes. Sobre too cuando son tan pocos, porque adlmiro a munchos poetes. Sicasí por citar dalgún, voi escoyer tres que yá nun tán ente nós: Ángel González, González, Mario Benedetti, Luis Cernuda…

6. ¿Cuála foi la Biblioteca la so vida?

La primera qu’anduvi foi la de L.luarca, nos mios tiempos d’institutu y recuérdola con muncha tenrura lliteraria. Pero pa mi toles biblioteques a les que voi tienen el so aquel. Son llugares onde m’alcuentro mui a gusto y espero agora poder frecuentales con más sosiegu, dada la mio situación llaboral.

7. ¿Con qué llibru despertaría l’amor a la llectura nun adolescente?

Depende. Los gustos de los adolescentes son mui variaos. Amás el gustu pola llectura nun s’algama sólo por un llibru recomendáu. Por citar un títulu El Principito de Antoine De Saint Exupéry, porque toos lo tendrían que lleer.

8. Cite tres novelistes pa siguir por cualquier llector.

Difícil recomendar. Non a toos nos gusta’l mesmu tipu de llectura, nin toles obres d’un mesmu autor. Dalgún de los importantes: José Ángel Mañas, Dolores Medio, Doris Lessing, Ana María Matute.

9. Proponga una midida a favor de la difusión de la llectura.

Tertulies lliteraries ente la mocedá, siendo ellos mesmos los que recomienden el so llibru, los que falen d’autores, etc. Cualquier actividá lúdica que pueda llamar l’atención del públicu llector, en potencia.

10. ¿Quiénes son los sos compositores o músicos favoritos?

Albinoni, Verdi, Vivaldi, Joaquín Sabina, Ernesto Paredano, Los Beatles… ente otros munchos.

11. ¿Hai dalguna llectura que-y marcara especialmente na vida?

Nun hai dulda qu’hai llectures que dexen señal. Por poner un exemplu, el Diario de Ana Frank. Lleílo cuando yera adolescente ya impactóme abondo.

12. ¿Sabría dicime qué ye un “tejuelo”?

La primera vez qu’oyí la palabra llamóme l’atención. Etiqueta que se-y pon al llibru nel llombu pa catalogalu ya identificalu nes biblioteques.

13. ¿Qué persona viva-y inspira más despreciu?

Siento despreciu polos terroristes que maten por matar y polos pederastres por guarros y engañadores pa satisfacer los sos vicios.

14. ¿A qué persona viva almira?

Almiro a les persones qu’entreguen la so vida a los demás, a facer el bien pola humanidá, como’l recientemente fallecíu Vicente Ferrer y otros munchos que dende l’anonimatu ayuden a los más necesitaos.

15. De xuru que podría recomendanos la visión de, polo menos, tres películes.

Pa mi’l cine, sobre too, ye entretenimientu y evasión. Por citar dalguna: El Club de los poetas muertos, Ghost, Los Otros, El Piano, Babel, Te doy mis ojos, El Laberinto del Fauno.

16. ¿Qué poema interpreta los sos sentimientos?

Seique tolos poemes míos espeyen sentimientos, pienso que toos tienen dalgo del mio estáu d’ánimu nel momentu qu’escribo.

17. ¿Cuáles son los sos nomes -de persona- favoritos?

Deva, Nora, Ricardo. Gústenme los nomes cenciellos y que tengan dalgún significáu.

18. ¿Ta d’acuerdu cola aplicación d’un canon pol préstamu en biblioteques?

En principiu non. Más que nada porque la mocedá nun tien perres y ellos son usuarios especiales a los que-yos tenemos que facilitar l’accesu a la cultura. Nun sería la meyor forma de fomentar la llectura. Sería dar un pasu p’atrás en cuanto al accesu gratis a tantos y tantos llibros como nos esperen nos estantes de les  biblioteques.

19. Los artistes más almiraos son…

Almiro a munchos artistes de distintes époques qu’algamaron un nome bien merecíu a nivel internacional, pero voi citar namás dellos nomes que me son cercanos, nel más ampliu sentíu de la palabra: Juan Fernández, Chechu Álava, Jesús Ángel Fernández, Miguel Solís Santos, Alfredo Echeverría, Álvaro Delgado, Ignacio Bernardo…

20. L’últimu llibru que compró foi.

Mujeres encontradas de Fernando Bertrán.

21. ¿Podría dicinos cómo ordena la so biblioteca personal?

Soi enforma desordenada, nun sé si dicir que tengo gran desorde dientro d’un orde. Cuando me da por ordenar y cambiu les coses de sitiu, llueu nun les atopo. Como si los llibros, papeles y demás-yos correspondiera un llugar que nun sé cómo, pero yo téngolo na mio cabeza. De toles maneres yá me toca facer una bona llimpieza. Habrá que decidise.

22. ¿Ónde-y prestaría vivir?

Vivo nun llugar que me presta. Toi contenta. De toles maneres soi “culu de mal asientu”. Atáronme les circunstancies, sinón, de xuru que cambiaría de llugar munches veces na mio vida. Anque vivo cerca del mar, nun lo veo dende casa y eso sí que me gustaría, poder asomame a la ventana y ver el mar.

23. Pal so entender ¿cuála ye la meyor obra lliteraria adautada pal cine?

Casi nunca se pue comparar la novela cola película. Son dos coses distintes. Ye verdá que tamién depende de si llees primero’l llibru o ves enantes la película. Si se llee enantes la novela, la película suel defraudar. Anque nes películes valoramos otres coses amás del guión.

24. ¿Qué ta lleendo actualmente?

Lo últimu, un llibru que me prestó un amigu Un ataque de lucidez de Hill B. Taylor. Y El Sil que baxaba de la nieve de Roberto González Quevedo. Siempre tengo dellos llibros encomenzaos, a nun ser que m’enganche muncho y lo llea d’un tirón, si ‘l tiempu me lo permite.

25. ¿Pa qué sirve la llectura?

Pa enanchanos l’horizonte, pa suañar, pa divertinos, pa deprender, pa conocer otres cultures, pa viaxar…

(Publicado en Biblioasturias14)