Festival Arcu Atlánticu 2019. Muyeres (in)visibles

El Festival del Arcu Atlánticu va celebrase en Xixón del 23 al 28 de xunetu. La octava edición del Arcu Atlánticu ta dedicada a les Muyeres (in)VISIBLES. Dende va más de dos sieglos, la humanidá vien persiguiendo un oxetivu mui bultable: la igualdá ente les persones. Un empeñu qu’avanza con ésitu; a vegaes bien rápido y otres selemente. Les distintes espresiones de la desigualdá cuestionáronse y combatiéronse una tres d’otra. Y cada pasu foi engrandando ’lcamín a oxetivos nuevos y a cotes más altes de llibertá, equidá y xusticia.

El festival quixo sumase a esta causa entamando conciertos, esposiciones, conferencies, alderiques, espectáculos de danza y teatru, amueses deportives  y una retafila d’actividades que tienen como suxetu principal a les muyeres. Muyeres músiques, muyeres escritores, muyeres científiques, muyeres deportistes, creadores plástiques, muyeres emprendedores… Muyeres brillantes con una personalidá y unes realizaciónes que se van poder ver nel Arcu, y a les que paga la pena conocer.

Les places y espacios de Cimavilla, Plaza Mayor, Puertu deportivu, Centru de Cultura Antiguu Institutu y Escuela de Comerciu Espacio d’Alcuentru Cultural van acoyer les actividaes teatrales, musicales, lliteraries, meses redondes, tamién xuegos y talleres infantiles, visites guiaes, festival de curtios y muncho más.

Miércoles 24 a domingu 28

12:00 a 15:00 y de 17:00 a 21:00 h. Xardinos de la Reina. Carpa de llibreríes. Entama: Asociación de Llibreríes del Principáu d’Asturies (ALPA). Espaciu d’esposición, venta y presentación de llibros, cola orientación que yá ye vezu: presencia bultable de llibros n’asturianu, d’editoriales asturianes y d’obres de temática rellacionada colos conteníos del festival: Muyeres (in)VISIBLES.

Miércoles 24

18:00 h. Xardinos de la Reina. Carpa de llibreríes. Preséntense dos llibros: Las reinas de la Monarquía Asturiana y su tiempo (718-925), d’Álvaro Solano Fernández-Sordo; y Vivienda, gestión y mercados inmobiliarios en Oviedo en el tránsito de la Edad Media a la Modernidad: el patrimonio urbano del cabildo catedralicio, de María Álvarez Fernández y Soledad Beltrán Suárez.

18:00 a 20:00 h. Cimavilla. Puntu d’alcuentru: Plaza’l Marqués (fonte de Pelayo). Visita guiada “La historia cuntada poles muyeres”. L’autora de la novela Mujeres errantes, Pilar Sánchez Vicente, repasa la historia de Xixón dende’l mesozoicu hasta anguaño guiando un percorríu pel pasáu y el presente del cascu vieyu de la ciudá, Places: 50. Inscripción: arcoatlantico@gijon.es

Xueves 25

12:30 h. Cimavilla. Casa’l Chinu. Entama: Asociación Empresa Mujer (ASEM). Taller d’escritura creativa y concursu de microrrelat “La historia del revés”. L’oxetivu ye reflexonar sobre los roles y estereotipos de dambos sexos al traviés de la llectura de cuentos ya histories. El meyor microrrellatu, escoyíu por votación ente les persones que participen nel taller, va llevar como premiu entraes d’adultu/a y neñu/a pal Acuariu de Xixón. L’actividá ta guiada pola profesora de llingua y lliteratura Elvira Laurelo y pola autora de La historia del revés, Yolanda Verdyguer.

18:00 h. Xardinos de la Reina. Carpa de llibreríes. Preséntase la Colección Deméter, qu’editen conxuntamente’l Serviciu de Publicaciones de la Universidá d’Uviéu y la editorial Trabe. Participen Ana Isabel Álvarez González, direutora del Serviciu de Publicaciones de la Universidá, y Rosa María Cid López, que ye la direutora de la coleición.

19:30 h. Cimavilla. Muséu de les Termes romanes del Campu Valdés. Charla “Egeria, la escritora viaxera. D’Occidente a Oriente nel sieglu IV”. Nel sieglu IV tuvieron gran impautu les pelegrinaciones d’homes y muyeres a Tierra Santa. Les sos creencies motivaron a estes persones pa visitar los llugares sagraos que se nomen na Biblia. El itinerario de Egeria, escritu por una muyer hispana, ilústranos sobre l’aventura del viaxe nel sieglu IV y sobre les rellaciones ente Occidente y Oriente. Va falar d’ello Rosa María Cid López, catedrática d’Historia Antigua y coordinadora del Grupu Deméter de la Universidá d’Uviéu, que va presentase nesti mesmu actu.

Vienres 26

18:00 h. Xardinos de la Reina. Carpa de llibreríes. Preséntase’l llibru Las edades vulnerables. Infancia y vejez en la antigüedad, qu’editó Trea en 2018. Participen los y les sos autores, que son investigadores universitarios/es ya integrantes del Grupu Deméter: Carla Rubiera Cancelas, Lidia González Estrada y Borja Méndez Santiago.

Sábadu 27

18:00 h. Xardinos de la Reina. Carpa de llibreríes. Presentación del llibru Familias, educación y género. Tradición y ruptura en las sociedades moderna y contemporánea, editáu por Trea en 2018. Participen les y los sos autores, que son investigadores universitarios/es ya integrantes del Grupu Deméter: Silvia Medina Quintana, Julia Guantes García, Roberto García Morís y Sonia García Galán.

18:00 h. Cimavilla. Plazoleta de Xovellanos. Alcuentru “Muyeres ilustradores” cinco ilustradores moces reivindiquen, dende una perspeutiva de xéneru, el so papel nel mundu de la ilustración y el diseñu gráficu. Xúneles nel so trabayu (webcómics, noveles gráfiques, storytelling…), un llinguaxe direutu y natural y un sentíu del humor mui finu. Son Ana Belén Rivero, Natalia de Frutos, Laura Pacheco, Quan Zhou Wu y María Murnau.

19:30 h. Xardinos de la Reina. Carpa de llibreríes. Mesa redonda “Referentes femeninos nel mundu del llibru”. Entama: Asociación Muyeres del Llibru d’Asturies. Siete muyeres profesionales del mundu del llibru charren al rodiu de los sos oficios estremaos y alredor del presente y el futuru del sector. Son Felicidad Martínez (escritora), Elena Pérez San Miguel (traductora), Mara Saturio (ilustradora y diseñadora gráfica), Leticia Rodríguez Torrado (correutora y coordinadora editorial), Mercedes del Castillo (editora), Pilar Sánchez Vicente (escritora y documentalista) y Sofía Sofosa (llibrera y editora). Modera l’alderique Belén Cabo, secretaria de l’asociación organizadora.

Pa más información consultar el programa completu.