Homenaxe n’asturianu al poeta Constantin Kavafis na Biblioteca d’Asturies

Nesti 2013 que ta dando les boquiaes celébrase’l 150 aniversariu del nacimientu del poeta K. P. Kavafis. Ye por ello que Saltadera Ediciones y la Conseyería d’Educación, Cultura y Deporte entamen l’actu «Homenaxe n’asturianu a Kavafis», que va facese’l vienres 20 d’avientu a les 19.30 hores nel Salón d’Actos de la Biblioteca Ramón Pérez d’Ayala (El Fontán, Uviéu), un actu que contará cola presencia del  profesor de griegu na Universidá Oberta de Cataluña, escritor y traductor Xosé Gago, residente habitual en Barcelona y especialista mundial na figura del poeta alexandrinu.

Konstandinos Petros Kavafis ye ún de los grandes poetes occidentales. Construyó la so obra, curtia, revisándola de contino, publicando en dalgunes revistes y en fueyes volandiegues, ensin priesa. Contribuyó de manera esencial a modernizar la llingua griega. A la so muerte dexó un corpus pequeñu: 154 poemes autorizaos pa la so publicación, que nun van ver la lluz en xunto hasta 1935, yá muertu’l poeta. Son los que se recueyen nel llibru Los 154 poemes, qu’agora edita Saltadera y que va presentase nel trescursu d’esti Homenaxe n’asturianu a Kavafis.

La traducción al asturianu de los poemas de Kavafis cuerre al cargu de Xosé Gago (Turón, 1957), quien yá s’ocupó de la poesía completa de Safo (Poemes y fragmentos, 1985) y tien publicada en versu la primer parte de la Odisea d’Homero (2007). L’actu del próximu vienres podrá contar con la so presencia