La 43 Selmana de les Lletres Asturianes va homenaxar al músicu y dibuxante Ígor Medio

La 43 Selmana de les Lletres Asturianes, que va celebrase ente’l 3 y el 6 de mayu, va homenaxar al músicu y dibuxante de cómic Ígor Medio, que cumpliría 50 años nesti 2022. La programación incluye una esposición centrada na obra gráfica del artista xixonés, la presentación d’un documental y un llibru sobre la so trayectoria, y la celebración d’un gran conciertu-homenaxe. Va ser la primer vez qu’una persona nacida na década de los setenta del sieglu pasáu reciba l’homenaxe de les Lletres Asturianes.

La presentación del llibru conmemorativu Ígor Medio. El carbón y l’arena va abrir los actos de la programación. La publicación, editada pola Conseyería de Cultura, Política Llingüística y Turismu pa la ocasión, axunta nueve artículos qu’analicen l’heriedu d’esti creador y incluye bien de testimonios gráficos de la so vida y obra. Amás, el Muséu Barjola va acoyer dende’l 3 de mayu la esposición Xente llano de Xixón. La obra gráfica d’Ígor Medio.

Ruma Barbero, cofundador xunto a Ígor Medio del grupu Felpeyu, y Norman Fernández Tascón, autor de delles monografíes y artículos sobre’l cómic, collaboraron cola Dirección Xeneral de Política Llingüística nel diseñu del programa d’actividaes. La proyección del documental Onde soi quien quiero ser. Una semblanza d’Ígor Medio y la celebración d’un gran conciertu-homenaxe onde van participar más de dos decenes de músicos y bandes asturianes completen l’homenaxe que la 43 Selmana de les Lletres rinde a Ígor Medio.

El programa d’actos incluye amás la celebración d’un conciertu de la Orquesta Sinfónica del Principáu d’Asturies, que cola batuta del maestru avilesín Daniel Sánchez Velasco va estrenar el so Concierto para violín y orquesta nel Auditoriu Príncipe Felipe d’Uviéu.

Por cuenta de la 43 Selmana de les Lletres Asturianes, la Conseyería de Cultura, Política Llingüística y Turismu edita tamién el llibru Contos eonaviegos, una escoyeta de 28 rellatos d’otros tantos autores publicada pa la ocasión. Estos Contos eonaviegos pal estremu occidental d’Asturies y el yá mentáu Ígor Medio. El carbón y l’arena pal restu de la comunidá son les obres que se van poner gratuitamente a disposición de les persones que merquen un llibru o un discu n’asturianu o n’eonaviegu el vienres 6 de mayu, Día de les Lletres Asturianes. Un total de 57 llibreríes y tiendes de discos del Principáu d’Asturies collaboren anguaño cola Dirección Xeneral de Política Llingüística na promoción y celebración de les Lletres.

La Selmana de les Lletres Asturianes, homenaxe públicu y institucional a la creación lliteraria en llingua asturiana, celébrase cada mes de mayu dende 1980 y foi configurándose como un acontecimientu cultural de gran importancia y vitalidá. Trátase d’un eventu participativu onde se dan la mano lo lliterario, lo festivo y lo institucional. A esta celebración entamada pol Gobiernu d’Asturies axúntense múltiples instituciones y participen de manera especial centros educativos, llibreríes, editoriales, escritores y medios de comunicación.

Ígor Medio (1972-2006). Dibuxante, guionista de cómic y músicu realizó cola so estensa obra una contribución esencial al cómic n’Asturies, creando mundos qu’inda perviven nel imaxinariu colectivu, ente los que destaca la familia Castañón, protagonista d’una tira cómica que se publicó ente 1997 y 2005 nel suplementu de branu del diariu La Nueva España. Collaborador en fanzinos y revistes como El Llapiceru, El Wendigo o Esquit y corresponsable de cómics de sonadía como Love Gun, en 1991 Ígor Medio fundó xunto al percusionista y compañeru d’estudios Ruma Barbero’l grupu de folk Felpeyu, que col tiempu diba convertise nun referente de la música asturiana. L’artista xixonés desenvolvió tamién un trabayu intensu como productor de discos d’artistes y grupos asturianos como Flavio Rodríguez, Gatos del Fornu o Tejedor. Nel 2003 punxo en marcha’l sellu editorial Tierra, nel que diba apaecer el so llibru recopilatoriu de la familia Castañón, Too Castañón. Ígor Medio morrió nel 2006 nun accidente de carretera nel que falleció tamién Carlos Redondo, compañeru d’él en Felpeyu.

PROGRAMA

12.00 hores │ Xixón – Paraninfu de Llaboral Ciudá de la Cultura

 - Inauguración de la 43 Selmana de les Lletres Asturianes.

- Presentación de la obra conmemorativa Ígor Medio. El carbón y l’arena.

- Proyección del documental Onde soi quien quiero ser. Una semblanza d’Ígor Medio.

18.00 hores │ Xixón – Muséu Barjola

- Inauguración de la esposición Xente llano de Xixón. La obra gráfica d’Ígor Medio. Esposición abierta hasta’l vienres 3 de xunu. Horarios: Martes a sábadu: de 11:30 a 13:30 y de 17:00 a 20:00h. / Domingos: 12:00 a 14:00h.

- Jam session, cola participación d’Alberto Ablanedo, Rubén Bada, Pepín de Muñalén y Dolfu R. Fernández.

MIÉRCOLES 4 DE MAYU

20.00 hores │Xixón – Llaboral Ciudá de la Cultura

- El conciertu d’Ígor Medio. Cola participación de Felpeyu y integrantes de los grupos Tuenda, DRD, La Bandina’l Tombo y Corquiéu, acompañaos por José Manuel Tejedor (gaita), Mapi Quintana (voz y contrabaxu), Bree Delian (cordión), Alberto Sánchez (flauta), Xuan Nel Expósito (cordión), Cástor Castro (flauta), Félix Castro (cordión), Toño Gómez (vigulín), Xel Pereda (guitarra y voz) y Isidro Suárez (flauta).

XUEVES 5 DE MAYU

20.00 hores │ Uviéu – Auditoriu Príncipe Felipe

- Conciertu de les Lletres Asturianes, al cargu de la Orquesta Sinfónica del Principáu d’Asturies (OSPA), baxo la dirección del maestru Daniel Sánchez Velasco.

VIENRES 6 DE MAYU Día de les Lletres Asturianes

18.30 hores │ Xixón – Muséu Barjola

- Mesa redonda ¿En qué andaría Ígor? El cómic asturianu güei. Modera: Chechu García. Participen: Raquel Lagartos, Ruma Barbero y Ernesto García, Neto.  

Un 10 % de descuentu na compra de llibros o discos n’asturianu y regalu del llibru Ígor Medio. El carbón y l’arena  nes tiendes participantes (hasta escosar existencies).

Llibreríes y tiendes participantes:

UVIÉU Aldaba Regalos / Llibrería Aldebarán / Llibrería Antares / Llibrería El Búho Lector / *Llibrería Casa del Libro / *Llibrería Cervantes / Llibrería Chemi / Llibrería Diocesana / Llibrería Elías / Llibrería Esfera / Llibrería Garluc / Llibrería Hangar Rebelde / Llibrería Maribel / Llibrería Pasa Página / Llibrería Pintar-Pintar Editorial / Llibrería Polledo / Llibrería Puntos / Llibrería Reconquista / Llibrería San Pablo / Llibrería II Milenio / *Llibrería Trabe

XIXÓN Llibrería Acuarel / Llibrería De Bolsillo / Llibrería La Buena Letra / Llibrería Central / Llibrería Clarín / Llibrería 4 Letras / Llibrería La Habitación Propia / Llibrería Identidad Secreta / Llibrería Paradiso / Llibrería La Revoltosa / Llibrería Roy / Mundo Sonoro-Tienda de discos

AVILÉS Llibrería Casona / Llibrería Clarín / Llibrería Noveno Arte / Llibrería Víctor Núñez / Tienda Elepé Productions

MIERES Disco 55 / La Llocura. Llibrería-Café / Llibrería La Pilarica / Llibrería La Torre

BUAL: *Llibreiría Pablo CANGAS DEL NARCEA: Llibrería Treito EL FRANCO: *Llibreiría Alfonso (A Caridá) GRAU: Llibrería Las Dos Vías NAVA: Muséu de la Sidra NOREÑA: Copistería La Semeya PARRES: Llibrería Gestión (Les Arriondes) PILOÑA: Llibrería Rima (L’Infiestu) SAMARTÍN DEL REI AURELIO: Llibrería Sol (L’Entregu) SIERO: Fnac / Llibrería La Chimenea (Llugones) / Llibrería Naredo (La Pola) A VEIGA: *Libreiría Casa Pérez / *Libreiría Patefa / *Libreiría San Pedro.