La Tertulia Malory entrega esti sábadu a Xuan Bello’l so premiu al meyor llibru n’asturianu del añu 2020

La Tertulia Malory, de L’Entregu, va entregar esti sábadu, 28 de mayu, a les 17:30 hores, el premiu al meyor llibru n’asturianu del 2020, nun actu público que se va celebrar nel pub Tom Malory de L’Entregu —onde, dende hai yá 24 años, la tertulia vien aconceyando selmanalmente—. La obra ganadora d’esta décima edición del premiu ye’l poemariu Les isles inciertes, del escritor y periodista de Tinéu Xuan Bello.

Anguaño, el xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Laura Marcos, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l 19 de payares del 2021. Esti xuráu destacó, nel acta del fallu, que’l llibru premiáu «ye una obra atemporal, onde l’autor establez un diálogu cola tradición poética universal, nun viaxe d’un valor artísticu grandísimu nel que resuenen los ecos de los grandes maestros»; el xuráu tamién punxo en valir la calidá de la producción lliteraria n’asturianu del añu 2020, lo que fixo que la decisión de premiar el poemariu de Xuan Bello se garrara por mayoría.

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu’l 28 de mayu. Esta ye la décima vez que’l grupu concede esti premiu, l’añu pasáu resultó ganadora, la novela d’Antón García Memoria de Tuña y n’ediciones anteriores, premiáronse les obres Incorrectos, de David Artime, El llibru póstumu de Sherezade, de Raquel F.Menéndez, Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

Les isles inciertes ye l’octavu poemario de Xuan Bello depués de Nel cuartu mariellu (1982), Llibru de les cenices (1988), El llibru vieyu (1994), Los caminos secretos (1996), La vida perdida (1999), Ambos mundos. Poesía 1988-2009 (2010) y El llibru nuevu (2017).

El poemariu yá foi premiu Teodoro Cuesta nel añu 2017. Les isles inciertes asítiase nun tonu grave y sentimental, nel que rescampla un poeta d’ aguda sensibilidá y fondu conocedor del ser humanu, cabalmente consciente del pasu del tiempu, de la muerte y del dolor qu’esta produz y que namás l’amor ye a dilir.

Xuan Bello (Paniceiros, 1965) Escritor y periodista, ye una de les principales figures de la lliterartura asturiana. Ente los sos numberosos gallardones y premios destaca’l Premiu Nacional de Lliteratura Asturiana en 2017, un premiu de calter triañal que se concede a autores con una destacada trayectoria lliteraria. Como periodista foi demientres ocho años director del selmanariu Les Noticies y collabora de forma regular colos diarios La Nueva España o El comercio, amás de ser presentador de los programes de la Televisión Pública Asturiana Clave de fondo o La cocina de les lletres.

Tien algamaos los premios más importantes de la poesía asturiana, ente ellos el Xuan María Acebal y el Teodoro Cuesta.

Xuan Bello tien tamién una llarga trayectoria como traductor al asturianu, especialmente d’autores portugueses. Foi collaborador de revistes como Clarín, Adréi y Zimbru, siendo cofundador de les dos últimes con Berta Piñán y Esther Prieto respectivamente. La traducción al castellanu de la so Hestoria Universal de Paniceiros, recibió’l premiu Ramón Gómez de la Serna y convirtióse nun de los llibros más destacados polos críticos españoles nel añu 2003. Otros libros de so, pente medies del ensayu y el rellatu, son Pantasmes, mundos, laberintos (1996), La memoria del mundu (1998), Meditaciones nel desiertu (2003), Los Cuarteles de la memoria (2003), La nieve y otros complementos circunstanciales (2007) y Al Dios del llugar (2007); amás de La hestoria tapecida (2007), La confesión xeneral (2009), Unas poucas cousas guapas (2010) y la novela curtia La cueva del olvidu (2006).