L’alma albentestate

L’alma albentestate

Marisa López Diz

Trabe

72 páx.

///

Premiu «Nené Losada Rico» 2015, ye’l reflexu del mundu interior de la escritora. Ventinueve poemes –d’imáxenes poderoses, d’honestidá fonda y madurez– nos qu’abre l’alma de par en par, como una ventana per onde sal la so voz desnuda. Como la mesma autora diz nún de los poemes: «Asina ye de fráxil / esta manera mía / d’andar col corazón / ente los llabios».

Marisa López Diz (Xixón, 1970) ye llicenciada en Filoloxía Hispánica y especialista n’Asturianu y Gallego-asturianu. Escritora nes tres llingües d’Asturies (les dos mentaes primero más el castellanu), tien publicaes una retafila obres mesmo pa neños como p’adultos. Nel xéneru poéticu ufiertó al públicu llector los poemarios Tiempu de tristura, A terra esqueicida y Les races del olvidu y nel xéneru infantil-xuvenil publicó Poemes de carambelu, Binoca, Malva y el paragües máxicu, Malva y el papapallabres y Tatuaxes nel corazón. El so llabor lliterariu foi premiáu nun centenar d’ocasiones. N’Asturies cunta con dalgunos de los premios más importantes: «Fernán Coronas», «Elvira Castañón», «Xeira», Premiu de la Crítica, Urogallo de Bronce del Centru Asturianu de Madrid, «María Josefa Canellada», «Fernández Lema», «Teodoro Cuesta» y «Nené Losada Rico». Persona d’amplies inquietúes culturales y artístiques, forma parte del dúu musical Mestura, nel que, amás de poner voz nos cuatro trabayos editaos, ye autora de lletra y música. Dirixó dos curtiumetraxes con guion orixinal. Actualmente compaxina’l so llabor lliterariu y cultural col trabayu como profesora d’Enseñanza Secundaria.