Mieu

Mieu

Milio’l del Nido /Ilustr. Alberto Sastre

Pintar-Pintar

48 páx.

///

“Los caberos díes nun foron gayoleros pa mi, les mudances nun me presten nada, nun me faen gracia nenguna los cambios. Dexar los amigos, el colexu, la ciudá onde naciere, pa dir a calar a un llugar desconocíu, nun ye dalgo que m’entusiasme. Pero, por más que refunfuñé, les mios quexes nun valieron de nada. Mio pá tenía un trabayu nuevu y la familia había de dir con él. Les dubies y los mieos de un neñu nun podíen camudar la marcha de toos”.

Asina empieza esti álbum ilustráu nel que dos hermanos, xuntu cola so madre, treslladense a vivir a una casona antigua y misteriosa al pie de un faru, nel que’l padre va empezar a trabayar. Tou paecía muy aburríu pero… ¡ZAS! unos ruios y figures estrañes nel faru… faen pasar momentos espeluznantes a los protagonistes.

El conocíu contaor d’histories, cuentacuentos, o “cuentista” -como a el y-presta- Milio’l del Nido, espubliza na editorial asturiana Pintar-Pintar un prestosu llibru -illustráu por Alberto Sastre- nel que nos fala, nun tiempo d’otros mieos, d’aquellos que conocimos de nenos: “Quiciabes seyan los mieos una de les coses que más marquen les velees de los críos perante la neñez; y cada unu tien los mieos que tien, hai de toles clases: al mar, a les altures, a la soledá, a la escuridá… Delles veces pasen los años y, anque yá nun yes un neñu, el mieu sigue ehí, a la gueta, esperándote detrás d’una puerta pesllada o a la revuelta d’un camín ente los árboles, y tienes qu’enfrentate a él pa poder siguir p’alantre, y ye nesi momentu, cuando vas enfrentate, cuando te da’l respigu, y esi respigu, esi, igual ye la cosa más prestosa de tol asuntu. Solo pol respigu merez la pena pasar el mieu”.