Pablo Texón presenta ‘Cantar de ti mesma’ na Biblioteca d’Asturies

Cantar de ti mesma, de Pablo Texón, obra ganadora del Premiu «Xuan María Acebal» de Poesía 2021 va ser presentada n’Uviéu esti xueves 29, d’avientu. Al autor va acompañalu nesti actu Ricardo Saavedra, doctor en Teoría Literaria, músicu y escritor. Alejandro Fernández-Osorio, sicólogu y poeta ganador de la edición pasada, va facer una intervención virtual nel actu.

La presentación va facese a les 19:00 h, nel salón d’actos de la Biblioteca d’Asturies «Ramón Pérez de Ayala» (Biblioteca d’El Fontán), asitiada na plaza Daoiz y Velarde, 11, d’Uviéu.

Cantar de ti mesma ye l’últimu llibru d’un autor esencial pa comprender la lliteratura asturiana del presente sieglu. Depués d’Allumamientu (2019) y xuncíu a esti como una estensión d’una propuesta vitalista qu’estiende los dos hitos esistenciales que son nacimientu y muerte, nesti casu Pablo Texón garra ente les manes la muerte de la madre dende un duelu de celebración barráu pola singularidá. Superando los tópicos y llugares comunes esperaos no melancólico de la elexía, topamos a un autor capaz de construyir con madurez una celebración d’esa vida que muda cola muerte de los qu’amamos pero sigue siendo un movimientu al futuru. Por esta razón tamos delantre d’un llibru clave na lliteratura en llingua asturiana, que recupera l’alegría popular y abre una puerta a la superación de la nostalxa estática y la señaldá de la que ficimos identidá lliteraria y cuasi antropolóxica. Col rigor llingüísticu y l’atrevimientu formal al que nos tien avezaos, Texón xuega coles sos referencies culturales y el simbolismu d’una realidá concreta pa llanzar al llector a una especiencia na que sentir, reconocese, conmovese y gozar». Alejandro Fernández-Osorio.

Pablo Texón Castañón (Felechosa, Ayer, 1977) ye poeta, narrador, traductor y articulista, amás de lletrista pa dellos grupos musicales asturianos (Dixebra, Verdasca, Toli Morilla, Alfredo González, Nacho Vegas…). Académicu correspondiente de l’Academia de la Llingua Asturiana, tien publicaos los poemarios Toles siendes (Premiu «Nené Losada Rico» 2003), La culpa y la lluz (Premiu «Teodoro Cuesta» 2006) y Allumamientu (Premiu «Xuan María Acebal» 2018). Nel 2017 publicó Media vida. Poemes y cantares, recopilación de tola so poesía hasta entós. ( Formientu.com)