Presentación de ‘El centinela’ de Henrique Facuriella en L’Entregu

Esti vienres a les 19:30 hores na Casa de Cultura “Gaspar García Laviana” de L’Entregu preséntase el llibru El centinela del escritor blimeín Henrique Facuriella que edita Saltadera. L’actu va ser presentáu pol escritor Chechu García.

Los poemes que componen El centinela traten d’un tiempu y un home que yá nun son pero que fueron necesarios pa configurar el tiempu y l’home presentes. Son la crónica d’un viaxe vital onde les estaciones márquenles non los sitios, sinon les persones, los alcuentros físicos y les distancies emocionales con esos otros que representen el suañu y la promesa pero tamién la decepción –con ellos y con ún mesmu–.

Henrique G. Facuriella (Blimea, 1980) estudió Periodismu en Salamanca con estancies en Braga y Barcelona. La esperiencia d’esos años de formación y construcción del yo adultu alcuéntrase recoyida nel llibru Intersticios. Estudios pa una topografía de lo que nun ye (2009), un conxuntu de proses poétiques nes que la descripción del esterior ta siempre al serviciu de la emoción interna. Esta ye una constante de la producción posterior del autor –tanto en prosa como en versu–, recoyida hasta la fecha en revistes y antoloxíes y onde sensualidá y espiritualidá entemécense nuna especie d’erotismu a la busca de trescendencia. Otra estaya del so llabor ye la traducción, con títulos como Llunariu, d’Al Berto; La confesión de Lúcio, de Mário de Sá Carneiro; Llibru del desasosiegu y El pelegrín y otros cuentos, de Fernando Pessoa, o Eurico, el presbíteru, d’Alexandre Herculano.