Presentación de ‘El faru de Gram’ de Manuel García Menéndez

El martes 2 d’abril a les 19:00 hores na Librería Cervantes d’Uviéu va presentase la novela El faru de Gram de Manuel García Menéndez. Invita a la llectura: Aida Escudero.

Con esta publicación Saltadera empieza la so colección «Zafir» de novela de xéneru.

Nel más puru estilu de la nordic noir, la novela negra nórdica que tantes hores d’agradable llectura y entretenimientu da a los siguidores, El faru de Gram trescurre na isla del mesmu nome, una de les munches que formen Dinamarca. La vida apacible de la comunidá, unes poques cases onde vive una pescadora, un xubiláu, una escritora y poca xente más, vese alteriada de sópitu pola llegada d’un grupu criminal que necesita’l faru pa cometer un atracu llargamente estudiáu y planificáu. Los habitantes de la isla nun tienen nada que temer si obedecen les órdenes, pero non siempre les coses pasen como taba previsto.

Manuel García Menéndez (Uviéu, 1962) ye Llicenciáu n’Historia. Nos años ochenta publicó dos obres de lliteratura infantil: Corcuspín el Rozcayeiru (1984) y Delina nel val.le’l Faloupu (1985). Depués d’unos años de silenciu regresa a la lliteratura con una novela mui bien recibida pola crítica: La sienda del amigu feliz (2013). En 2018 gana la 39ª edición del premiu «Xosefa Xovellanos de Novela» cola obra El visitante impropiu. Por vinculación familiar y sentimental pertenez al grupu d’escritores de Tinéu, del que formen parte autores como Rafa Lorenzo, Xuan Bello, Sabela Fernández, Miguel Rojo, L.luís Fernández, Pilar Arnaldo o Antón García.