Presentación de ‘El visitante impropiu’ de Manuel García Menéndez

El martes 24  de setiembre a les 19:00 hores, na Llibrería Cervantes va presentase el llibru El visitante impropiu de Manuel García Menéndez, Premiu “Xosefa Xovellanos” de Novela 2018.

Son los díes previos a la primavera de 1890 y l’inspeutor especial Marcos Engrueba, bon amigu de les nueches de xaréu y xuegu, entretién los díes en dir zarrando, ensin mayores problemes, dellos casos xunto colos sos collaboradores de la policía gubernativa de Madrid. Pero los superiores d’Engrueba tienen pa él planes bien distintos: deciden unvialu a Uviéu col encargu de resolver lo qu’hai quien define como «un asesinatu espantible», que paez que se‑yos ta travesando a los responsables iniciales de la investigación. Les razones de los xefes pa sacar a Engrueba del so acomodu en Madrid son variaes: ye fíu d’asturianos, ye espertu en delles de les téuniques d’investigación policial más avanzaes que se conocen na Europa de la época, y ta avezáu a resolver crímenes cuando medien implicaciones polítiques, como paez qu’ocurre nesti casu. A traviés de les páxines d’El visitante impropiu conocemos les idees y los métodos de Marcos Engrueba y cómo se rellaciona colos policíes que tienen que se poner baxo’l so mandu, pese a que lu consideren un intrusu, y con dellos personaxes de la sociedá uviedina a los que va tratando por trabayu o por fuelga. Y descubrimos les claves qu’en rellación col crime va dándonos la historia, contada de forma paralela, de Xulián Prieto, un mozu que ta a xornal na estación del Norte d’Uviéu.

Manuel García Menéndez (Uviéu, 1962) ye llicenciáu n’Historia. Nos años ochenta publicó dos obres de lliteratura infantil na coleición Escolín de l’Academia de la Llingua Asturiana: Corcuspín el Rozcayeiru (1984) y Delina nel valle’l Faloupu (1985). Nel añu 2013 editó la que pue considerase la so primer novela: La Sienda del Amigu Feliz, que describe un viaxe iniciáticu pelos caminos y montes de l’Asturies de posguerra. Tres ganar, nel añu 2018, la XXXIX edición del Premiu Xosefa Xovellanos de Novela con El visitante impropiu, nel añu 2019 publicó El faru de Gram, novela curtia d’ambiente nordic noir. En tou esti tiempu, dende que volviera a publicar nel 2013, siguió escribiendo cuentos o rellatos curtios. Como exemplu de la so contribución al xéneru ta pa salir, con Impronta, la coleición de rellatos Néctar dulce son los llevantos.