Presentación de los Premios Lliterarios 2012 en llingua asturiana

Nomes propios

Los cinco autores galardonaos na edición de 2012 son cinco nomes propios de la lliteratura asturiana, que tienen tres de sí una bultable y reconocida trayectoria, a la que sumen nueves producciones.

Pela so parte, La vida increíble ye una novela pa “llectores funambulistes que nun-y tengan mieu a aventurase pela raya –alcuando cimblante, ruina siempre– que suel separar lo solemne de lo ridículo”. Asina define’l periodista y escritor Quique Faes (Xixón, 1975) la que ye la so narración “más honesta”. Y tamién la que lu fixo ganador del premiu Xosefa Xovellanos, por tratase “d’una novela mui bien construida, con unos personaxes claramente definíos y qu’aporta a la lliteratura asturiana nuevos horizontes temáticos”. Faes ye periodista y historiador social de formación.

Como autor de ficción tien publicao, siempre en Trabe, la recopilación de cuentos Asuntos menores (o non) y trés noveles (Memoria, Malena fecha de sol y de fresa  y L’agobiante imperfección de les coses). En castellanu escribió una biografía’l segundu marqués de Comillas, propietariu de mines na cuenca’l Caudal (2009), y participó n’otra a propósitu’l ministru republicanu Manuel Rico Avello (2011). Ye autor, amás, d’una docena de lletres pal grupu Dixebra.

“Construyir un país onde guardar la risa de la infancia, onde añere l’escaezu de la mocedá y de les sos derrotes”. Esa ye la intención d’El llibru de les coses misterioses, poemariu del mierense José Ángel Gayol, reconocíu pol xuráu del Premiu de poesía Xuan María Acebal porque, “basándose na memoria y el viaxe, aportaba l’ecu personal de les voces ayenes”. Nacíu en 1977, Gayol ye un escritor y críticu lliterariu, qu’aveza a colaborar n’estremaes publicaciones como’l Suplementu de Cultura de La Nueva España y en revistes lliteraries como Clarín, Reloj de Arena o Paralelo Sur. La so obra poética compriende publicaciones en castellanu, como Con el velo de una sonrisa (Premiu Asturias Joven de Poesía) y n’asturiano, como Los poemes del oriental  (Premiu Elvira Castañón de Poesía) y Los suaños y los díes  (Premiu Fernán Coronas). En 2007 publicó la novela Argonautes  y en 2011 la obra de teatru Ensin noticies del fin del mundu (Premiu Asturias Joven de Textos Teatrales). Incluyíu en delles antoloxíes, en 2005 participa tamién y coordina’l volumen colectivu Nuevas maneras de contar un cuento.

Per otru llau, una obra, según el xuráu, de “gran profundidá narrativa y bien resuelta, que recupera la memoria histórica de manera afayadiza a la edá a la que va dirixida y abre caminos nuevos na lliteratura xuvenial n’asturianu”, ye la presentada por Milio Rodríguez Cueto (Xixón, 1962), y ganadora del premiu «María Josefa Canellada» de Lliteratura infantil y xuvenil: Carne de Melandru. Novela que ta editada por VTP y que cuenta con ilustraciones d’Alberto Álvarez Peña. Rodríguez Cueto ye ún de los autores más prestixosos de la lliteratura asturiana, reconocíu dende la so época d’estudiante cuando publicaba los primeros relatos en Hojas Universitarias. Estimáu poles sos traducciones d’autores como Stevenson, Sade, Cunqueiro, Shakespeare o Oscar Wilde; y pola so rica bibliografía. Dende’l Diálogu de la llingua o los gochos llinguateros, a Románticu, pasando pel ensayu Vistes lliteraries, son munches les obres que-y tienen valío la estima de los llectores:  L’últimu volador, Les razones del calamar, El ciegu la esquina o Véndese pisu, son namás unes poques obres d’esti autor que, nel campu de la lliteratura xuvenil, tien editao volúmenes como Laura contra el tiempo,  Mimí al volante o La Piedra de la culebra. Premios como’l Fuertes Acevedo d’Ensayu, el Xuan María Acebal de Poesía, el Premiu Edebé de Lliteratura xuvenil, el premiu asturianu de la crítica y, agora, el María Josefa Canellada de lliteratura xuvenil formen parte del currículum d’esti escritor.

Tamién fue presentáu’l Premiu «Máximo Fuertes Acevedo» d’Ensayu, col títulu de Los deseos del dineru, del que ye autor Xulio Arbesú, y qu’edita la editorial Trabe. “L’usu áxil del idioma, l’actualidá del tema y la forma d’armonizar la narración y el xéneru ensayísticu”, fueron les característiques destacaes pol xuráu que decidió qu’esta obra fuere la ganadora na edición de 2012. La publicación cuenta con un prólogu d’Enrique Fernández Rodríguez, profesor d’Economía de la Universidá d’Uviéu y actual alcalde de Samartín del Rei Aurelio qu’esplica cómo “utilizando l’argumentu de la llóxica, los usos y los sentimientos inherentes al dineru, abórdase continuamente la rellación ente’l poderosu caballeru y la felicidá”.  Y alvierte que’l llibru debiere llevar un avisu del tipu “absténganse los non irónicos” o “requierse nivel avanzáu de sentíu del humor”. Arbesú afonda asina na so faceta como ensayista, que yá tien publicaos La informatización del transporte y El destín treshumanu. Un autor tamién conocíu por obres como Misión Pelayo, Un raposu en Tresmonte, Potestas, El pisu d’enriba, L’eternu negociu o’l volume de relatos Cuentos con neños. Con esti premiu Máximo Fuertes Acebedo, que llogra per segunda vez,  añede un nuevu galardón a una llista onde yá figuraben el Premiu Llectures pa Rapazados de l’Academia de la Llingua, el Premiu Llorenzo Novo Mier, o’l Xosefa Xovellanos.

Otramiente, el Premiu Alfonso Iglesias de cómic fue pa la obra titulada Homes, de la que ye autor Javier Antonio Marinas, y que publica la editorial Trabe, depués de ser felicitada pol xuráu por ser una obra “de gran valor didácticu que destaca pol tratamientu dixital de les imáxenes”. Marinas, dibuxante, diseñador y guionista de cómics; historietista de formación autodidacta, debutaba como dibuxante a finales de los años ochenta na revista Tapón, y nestos años fue colaborando en publicaciones como El Gomeru, El Llapiceru, Sauco o Orbayando. Tien tamién dellos galardones, como l’Urriellu d’Ilustración, que, convocáu pol Principáu d’Asturies, consigue en 1991 y 1992, o’l de la Universidá Popular de Castuera (Badajoz) en 1995. Ye autor de la obra Ballenes; tamién de los debuxos de la Hestoria de la monarquía Asturiana, publicada por La Nueva España; lo mesmo que de la  novela gráfica Domno, que tien como protagonista a Gonzalo Peláez; asina como de la historieta sobre l’Adelantáu de La Florida, Pedro Menéndez d’Avilés, con guión del periodista y escritor avilesín José Martínez.

Toes estes obres fueron presentaes esta tarde, pa depués dar pasu a una charra-coloquiu na que los autores analizaron temes estremaos como la honestidá na creación, el cuidáu llingüísticu, la necesidá d’apoyu públicu a la lliteratura o la falta de promoción y visibilidá.

(2 de mayu de 2012)