Presentación de ‘Un par de botes’ de Vicente García Oliva

Esti xueves 22 de febreru va presentase a les 19:30 hores na llibrería Trabe el llibru Un par de botes. Cuentos de fútbol de Vicente García Oliva, al que van acompañar na mesa Nacho Fonseca y Esther Prieto.

Un par de botes ye un volumen de 11 cuentos sobre fútbol cuando esti xuegu yera espeyu de la inocencia: con un par de botes y una carretera, un camín o un prau, na década de los cincuenta (y más p’acá) nuna ciudá industrial que ta espolletando col desarrollismu franquista y en plena tresformación, los neños (en masculín) del barriu yeren a montar un cuadrín. Cuando’l fútbol provoca una emoción indescriptible nel rapacín que va per primer vez a un campu a ver un partíu.

Vicente García Oliva (Xixón, 1944) ye autor de referencia na lliteratura asturiana y ta consideráu’l padre de la novela xuvenil n’asturianu con Fontenebrosa: el reinu de los silentes (1984, 1992, 2011). Con más de 30 títulos, delles obres narratives suyes son: El Norte (1991), reeditáu nel añu 2010 baxo’l títulu El Norte. Cuentos 1976-2010; les noveles L’aire les castañes (1989, 2008), La vida de siempre (2015, Premiu de la Crítica d’Asturies) y Los tordos (2023), amás de les xuveniles Elemental, querida Lisa (2007), Fontenebrosa II: la rebelión de los homosaurios (2010, Premiu «Montesín de Lliteratura Infantil y Xuvenil 2009), Fontenebrosa III: el final (2016, Premiu «M.ª Josefa Canellada» de Lliteratura Infantil y Xuvenil 2015); Diariu d’Enol (1988, 2016), Cuadernu robáu. Diariu de Concha (2015). Ye autor, amás, de dellos ensayos, ente los que destaquen La aventura humana y lliteraria al rodiu de don Enrique García Rendueles (1992), El ríu soterrañu (2003) o El síndrome de Sherezade (2011, Premiu «Máximo Fuertes Acevedo» d’Ensayu 2010). Amás d’ello tien tamién una retafila cuentos pa la reciella: Garulla. Antoloxía del ritmu (2007), Deva y yo (2011), El marineru que perdió’l norte (2016)… ente más otros.