Presentación del llibru ‘Ciencia y Llingua’

El próximu martes, 7 d’agostu, a les 19:30 hores, el Salón d’Actos del Centru Integráu de L’Arena de Xixón acoxerá la presentación del llibru Ciencia y llingua (Averamientu al léxicu cinetíficu del Diccionariu de la llingua asturiana) de Fermo Fernández, Arturo Morales, Eufrasia Roselló y Carmen Toro. Nel actu participen, amás de los autores, Carlos Nores (Universidá d’Uviéu) y Esther Prieto (Ediciones Trabe).

Ciencia, porque ye ún de los temes más maraviyosos de los que se pue falar en cualquier llingua.

Llingua, qu’hai querer y curiar. Y eso namái ye posible usándola en toles estayes, inclusive, claro, na Ciencia.

Ciencia y llingua: un averamientu al léxicu científicu del dalla o quiciabes una disculpa. Porque enrestrando llagostes con positrones, bacteries con marraxos, los autores van falándonos de ciencies demientres, una y otra vuelta, cayen na tentación de llevanos a lo que más-yos presta: Asturies y la Naturaleza. Un binomiu indixebrable.

Esti ye un llibru especial ente los publicaos recientemente n’Asturies, Antón García ponderó la so relevancia nel diariu La Nueva España y nel so blogue (http://estoiru.blogspot.com.es/), al que calificó como “dalgo más qu’una lleción de ciencia”: “El resultáu del llibru va muncho más allá d’una simple llista d’aciertos y desaciertos de los académicos (y otres persones) que redactaron el diccionariu: ye un instructivu repás del mundu de la ciencia dende la perspectiva de la llingua asturiana, aptu pa tolos públicos, al alcance de cualquier interesáu na divulgación científica. Empiecen los autores fixando los sos criterios al respetive de los nomes científicos, acordies colos códigos internacionales de nomenclatura. Pasín a pasu, per orde alfabéticu de grandes temes (de los artrópodos a los reptiles y anfibios, pasando pela física, les matemátiques, la medicina o la química), van dando cuenta del vocabulariu básicu de les ciencies, tamién ordenáu alfabéticamente, con un sistema de trabayu que se repite: ofrecen la definición del DALLA, analícenla y coméntenla, a vegaes con minuciosidá y detalles (por exemplu, “pan de culiebra”, páx. 352), publiquen fotografíes o dibuxos ilustrativos y, si lo creen aparente, proponen otra qu’al so entender defina meyor, con más precisión científica, el lema correspondiente. Ponen especial procuru nos nomes científicos, pero tamién en distinciones más sutiles, como la diferencia taxonómica ente páxaru y ave, o n’ofrecer un xenéricu (“picatueru”) cuando parez necesario. Amás d’ello, proponen la entrada d’unos doscientos cincuenta términos comunes de les sos especialidaes que’l DALLA nun recueye.”

Fermo Fernández Suárez (Lluanco, 1958) ye llicenciáu en Ciencies Químiques pola Universidá d’Uviéu. Tres unos años como investigador nel campu los polímeros, trabayó de profesor en colexos d’Oxford y Madrid; n’actualidá failo nel colexu Quercus de Boadilla del Monte.

Arturo Morales Muñiz, (Xixón, 1952) ye llicenciáu y doctor en Bioloxía pola Universidá Complutense, caderalgu de Zooloxía y direutor del Llaboratoriu d’Arqueozooloxía nel Departamentu de Bioloxía de la Universidá Autónoma de Madrid. Investigador de les faunes de xacimientos arqueolóxicos, en 1982 fundó la revista Archaeofauna, que dirixe desde entós.

Eufrasia Roselló Izquierdo (Madrid, 1957) ye llicenciada y doctora en Bioloxía pola Universidá Autónoma de Madrid y profesora titular de Zooloxía nel Departamentu de Bioloxía d’esa mesma Universidá. Investigadora nel campu de la pesca marino n’Europa, ye cofundadora y editora-xefe de la revistaArchaeofauna.

M.ª del Carmen Toro Gonzálvez (Jaca, 1957) ye llicenciada en Bioloxía pola Universidá Autónoma de Madrid. Profesora dende l’añu 1982, agora dirixe’l Departamentu de Ciencies del colexu Quercus de Boadilla del Monte, Madrid.

(4 de agosto de 2012)