Toma de tierra. Antología de la poesía asturiana.

Toma de tierra ye una antoloxía billingüe dedicada a la poesía contemporánea asturiana, que si bien nun ye la primera, sicasí, sí ye la más amplia y ambiciosa de les feches hasta’l momentu. Quiciabes non definitiva, porque ye posible que pola mesma definición d’antoloxía nenguna pueda selo, pero sí y ensin dulda nenguna, de referencia, pol planteamientu, pol conteníu y hasta pola mesma edición cola que llega a les nuestres manes. Un llibru imprescindible pa cualquier biblioteca publicáu col sofitu de la Conseyería de Cultura del Pdo. de Asturias.

En cuantes qu’antoloxía, preparada y presentada pol también poeta José Luis Argüelles, supón la representación d’un territoriu lliterariu delimitáu y reconocible a les clares. Asina les coses, el llector va alcontrar nes sos páxines una amuesa bien amplia de la poesía escrita en llingua asturiana; una poesía que, n’opinión del autor del estudiu introductoriu, ye pa resistir comparanza cualquiera cola desenvuelta nel restu d’idiomes peninsulares dende l’añu 1975.

Si qu’así, esta poesía malapenes ye conocida acullá de les nuestres fronteres; d’aende l’interés y la oportunidá d’esta publicación, dirixida a unos llectores que, desinformaos y desconocedores d’esta realidá, a los que va llamar la so calidá, rexistros y matices. Nella van alcontrar, parafrasiando a Miguel Torga, una poesía escrita n’asturianu que tien les puertes de par en par pal mundu. Asina les coses, hai que reconocer el llabor editorial d’Ediciones Trea, empresa asturiana de trayectoria y solvencia reconocida, que s’encargó de preparar, na so llinia, una edición llimpia y cuidada, que nesta ocasión vien acompañada del acertáu y al empar axustáu estudiu introductoriu del poeta y periodista José Luis Argüelles, bon conocedor de la lliteratura fecha n’Asturies talo que s’encargó de reflectar na edición de la obra de Xosé Antonio García, poeta antologáu tamién equí y al que se-y dedicó la pasada Selmana de les Lletres Asturianes.

Nun tien que caer embaxo qu’esta antoloxía nun ye una compilación y nun tien un afán totalizador, pero sí selectivu y representativu de la lliteratura asturiana fecha nes décades últimes y protagonizada por autores nacíos nos años cuarenta hasta escritores más mozos nacíos nos años ochenta del sieglu pasáu. Axúntense de la mesma y col criteriu de José Luis Argüelles, un conxuntu de 38 autores ente los que s’alcuentren Pablo Ardisana, Nel Amaro, Xosé Bolado, Manuel Asur, Lluis Xabel Álvarez, Xosé Manuel Valdés, Xuan Xosé Sánchez Vicente, María Teresa González, Roberto González-Quevedo, Taresa Fernández Lorences, Miguel Rojo, Ánxel Álvarez Llano, Luis Salas Riaño, Antón García, Esther Prieto, Lourdes Álvarez, Miguel Allende, Xosé Antonio García, Ignaciu Llope, Lluis Fano, Humberto Gonzali, Berta Piñán, Xuan Bello, Xilberto Llano, Marta Mori, Pablo Antón Marín Estrada, Xabiero Cayarga, Xuan Santori, Xulio Viejo, Chechu García, Xandru Fernández, Elías Veiga, Martín López-Vega, Pablo Texón, Héctor Pérez y Vanessa Gutiérrez.

Esponentes, ellos y elles, d’una lliteratura asturiana rica y diversa; onde caún amuésase coles sos inquietúes y formes, pero a la que lleguen reconstruyendo la tradición y esplorando la llingua asturiana, siempre col ánimu y la voluntá de revitalizar y modernizar un idioma; siempre esforzándose a la d’adaptar l’asturianu a les sos necesidades espresives y compartiendo temes fondos y d’ecos universales talo que la perda y la busca.

Ye xusto’l reconocer estos esfuerzos y los llogros correspondientes, mesmo que desear qu’al traviés d’esta antoloxía la so obra llegue a otros llugares, a otros públicos. Porque, y usando agora les palabres de José Luis Argüelles, les sos palabres son les nuestres y falen d’aquello que nos interesa y toca.

(Publicado en Biblioasturias17)