Una historia cenciella

Una historia cenciella

Leonardo Sciasca

Seronda

72 páxs.

///

Una hestoria cenciella ye l’últimu llibru escritu por Leonardo Sciascia xustu antes de morrer. Apurrióla al so editor ensin correxir y la primer edición llegó a les llibreríes el mesmu día de la so muerte, en noviembre de 1989. Este ye’l primer llibru de Sciascia que se traduz, directamente del italianu, al asturianu.

El títulu d’esti llibru promete una hestoria cenciella… pero nada hai más lloñe de la realidá. Una enigmática llamada a la comisaría de policía d’una pequena ciudá de la isla de Sicilia afaya un casu, n’apariencia senciellu, que va complicándose a midida qu’avancen los barruntos y les investigaciones d’un sarxentu empeñáu en pensar qu’hubo un asesinatu onde los sos colegues na más ven un suicidiu. La solombra del “crime organizáu” empieza a crecer al par que los fechos, les feches y los personaxes van ocupando’l so espaciu y ganando el so momentu na trama d’esta novela negra, curtia pero maxistral, escrita nos últimos díes de la so vida por un autor que llogró la universalidá afondando na “sicilianidad”.

Una bona ocasión p’averase a esti maestru, periodista, políticu y escritor que ye una de les principales figures de la lliteratura italiana del sieglu XX.

Leonardo Sciascia nació na localidá siciliana de Agrigento en 1921. Foi maestru d’escuela, periodista y políticu, y como escritor convirtiose nuna de les figures culminantes de la lliteratura italiana del sieglu XX. Dexó escritos más d’un centenar de noveles, cuentos, ensayos y pieces de teatru que reflexen la realidá sociopolítica de Sicilia, la rexón isleña y suriega na que nació, vivió y morrió.

Parte de la so obra denuncia ensin miramientos la corrupción política y les redes de poder que va texendo con sangre y dineru la organización mafiosa Cosa Nostra. Foi conceyal en Palermo del Partíu Comunista Italianu y más tarde militó nel Partíu Radical, col que aportó a eurodiputáu y diputáu nacional. Morrió a los 68 años d’edá en Palermo, capital de Sicilia.