Cincoxcinco= Xandru Fernández

(Turón, 1970) Narrador, traductor y poeta, la so obra ye una de les más prolífiques de la segunda xeneración del Surdimientu, con títulos esenciales pa la narrativa asturiana, ente los que destaquen El club de los inocentes (1994), El suañu de los páxaros de sable (1999), Les ruines (2005), o La banda sonora del paraísu (2006)  asina como los llibros de relatos Del llaberintu al trenta (1995) o Les cuentes del alma (2000). Como poeta cuenta con títulos como Lletra muerto (1998) o Servidume (2000); a too ello hemos de sumái delles tornes d’autores como Franz Kafka, Thomas Mann y Friedrich Nietzsche. Pasa por ser ún de los meyores prosistes n’asturianu, teniendo recibío, ente otros, el Premiu de narrativa Xosefa de Xovellanos nes ediciones de 1994 y 1999, y el Premiu de Novela Trabe de 2005, esti añu 2007 recibió’l Premiu de la Crítica d’Asturies. Promotor d’estremaes iniciatives culturales, columnista nel selmanariu Les Noticies, tamién destaca na faceta de lletrista musical.

1. Proponga un menú lliterariu: entrada, platu principal y postre.

D’entrada, cualquier obra teatral o cuentu de Chejov.

Platu principal, Bajo el volcán, de Malcolm Lowry.

De postre, Pálido fuego, de Nabokov.

2. ¿Cuálu foi l’ últimu llibru que sacasti en préstamu d’una biblioteca?

Un d’Enrique Vila-Matas, nun recuerdo’l títulu (lo que significa que nun me gustó demasiao, pamidea).

3. ¿Qué escena lliteraria-y vien nesti momentu a la cabeza?

Una d’un cuentu de Miguel Rojo en qu’a un nenu pequeñu lu fríen a preguntes hasta que lu cabréen.

4. ¿Tiense namorao de dalgún personax lliterariu?

De Lucette, n’Ada o el ardor (lloré la so muerte). Del nenu de La carretera, de Cormac McCarthy. Y de Dorian Gray, claro.

5. Indique una triada de poetes.

T. S. Eliot, Pavese y Jorge de Sena.

6. ¿Cuála foi la Biblioteca la so vida?

La de Turón, por aquello de que foi la primera y, munchos años, la única.

7. ¿Con qué llibru despertaría l’amor a la llectura nun adolescente?

Nun cuento qu’eso pueda espertase con un solu llibru.

8. Cite tres novelistes pa siguir por cualquier llector.

Philip Roth, Haruki Murakami y Michael Chabon.

9. Proponga una midida a favor de la difusión de la llectura.

Favorecer qu’heba cuantos más llibros meyor a disposición de la xente, especialmente de la xente mozo.

10. ¿Quiénes son los sos compositores o músicos favoritos?

Yá. Músicos. Qué sé yo: Neil Young, Nick Cave, Robert Wyatt, David Bowie, Charles Mingus… Y un llargu etcétera.

11. ¿Hai dalguna llectura que-y marcara especialmente na vida?

Munches. El Palacio de la Luna, de Paul Auster, por exemplu, o la primer vez que lleí a Kafka, a Nietzsche o a Salinger.

12. ¿Sabría dicime qué ye un “tejuelo”?

Como dicen los mios alumnos, sé lo que ye pero nun sé esplicalo… L’adhesivu que se-yos pon a los llibros en llombu cola signatura.

13. ¿Qué persona viva-y inspira más despreciu?

Tolos qu’especulen cola vida y la muerte de seres llonxanos.

14. ¿A qué persona viva admira?

A la mio muyer.

15. De xuro que podría recomendanos la visión de, polo menos, tres películes.

Non tan seguro… Pongamos Apocalypse Now, Taxi Driver, y por dicir dalguna más reciente, anque non muncho: Hoy empieza todo, de Tavernier.

16. ¿Qué poema interpreta los sos sentimientos?

Suelen ser los mios sentimientos los qu’interpreten los poemes. Y como los sentimientos cambien, los poemes cambien tamién.

17. ¿Cuáles son los sos nomes -de persona- favoritos?

Nun tengo especial predilección por nengún.

18. ¿Ta d’acuerdu cola aplicación d’un canon pol préstamu en biblioteques?

Non. Nin ye necesario nin ye ético. El préstamu bibliotecariu fai más bien que mal a la cultura del llibru.

19. Los artistes más admiraos son…

Lo mesmo que colos poemes, depende de munches circunstancies. Últimamente tengo un grabáu de Durero de fondu de pantalla pal ordenador…

20. L’últimu llibru que compró foi…

El hombre del salto, de Don DeLillo.

21. ¿Podría dicinos cómo ordena la so biblioteca personal?

Nun la ordeno muncho, la verdá.

22. ¿Ónde-y prestaría vivir?

Gústame vivir onde vivo.

23. Pal so entender ¿cuála ye la meyor obra lliteraria adaptada pal cine?

Hamlet.

24. ¿Qué ta lleendo actualmente?

El país del silenciu, de Vanessa Gutiérrez y Beatriz R. Viado.

25. ¿Pa qué sirve la llectura?

Pa conocer xente, anque esa xente nun te conoza a ti.

(Publicado en Biblioasturias08)