Xosé Bolado: “El qu’escribe a dures penes manexa’l timón hacia la lluz”

Pa presentar La bona intención/La buena intención (Impronta, 2012), Xosé Bolado (Uviéu, 1946) escoyó la sé del mesmu Atenéu Obreru de Xixón del que fue presidente en so día y nel que hoi sigue dirixendo la colección Deva de poesía, na que tienen publicao dalgunos de los principales poetes asturianos contemporáneos. Responsable tamién de la revista Lliteratura de l’Academia de la Llingua Asturiana, ye autor de llibros como Línea imperceptible al temor (1988), Conxura contra la decadencia (2002) y Na estación de los relevos (2006), asina como de l’Antoloxía poética del Resurdimientu (1989) y los cinco tomos editados por KRK cola Obra reunida de Rosario Acuña y Villanueva. Otramanera, Emilio Coco tradució y publicó n’italianu, nos Quaderni della Valle de Bari, dos títulos de Xosé Bolado: Nomade (1991) y Antologia poetica (2005), ufiertando la palabra pausada, midida, emocionada y intelixente d’un autor qu’ufierta la so última obra n’edición billingüe, n’asturianu y castellanu. Por eso, aprovechamos la ocasión pa falar con esti gran observador y promotor de la lliteratura asturiana de les sos diferentes facetes; una perguapa entrevista col actual Premiu de la Crítica de la RTPA, nel comienzu de la Selmana de les Lletres.

Xosé, ¿cuála ye la intención de la poesía?

D’empiezu, la más difícil respuesta. Acaso lo único claro ye confiar na verdá que crea la poesía, una guapura que conmueve o manca de puru aciertu estéticu na esposición del ser humanu ente’l misteriu y los vezos de la vida. Pienso que, de mano, son inciertos los caminos del llector y del escritor de poesía, porque al fin la única recompensa llega si al testu lu acompaña la gracia. Ella xustifica o non la intención. Ella sola.

En La bona intención fales del archivu de la memoria como fonte del llibru. ¿Cómo fue naciendo y tomando cuerpu esti diariu del tiempu pasáu?

Toos sabemos que la memoria personal caltién unos archivos confusos. Hai elementos que nos ronden dende cuantayá, que s’asomen a la vida diaria con atrevimientu, como pidiendo vez, eso foi l’aniciu. Pero namái l’aniciu. Llueu yá nun controles de qué manera la historia va cuntase ella mesma. Paez que nun quier saber nada de nenguna otra compaña, tampoco de más razonamientos que’l xustu afluyir sonoru de la escritura. El qu’escribe a dures penes manexa’l timón hacia la lluz. En tou casu, la memoria tien una intelixencia de la que sé poco; ye sorprendente cómo te va orientando, o cómo te va llevando a les sales que nunca tuvieren del too zarraes. Amás, nel mio casu, quiero entender que les voces de la memoria pidíenme tamién la intervención d’otros tiempos, quiciabes, por ayenos, más claros.

El poeta, nesti casu, toma la forma d’un narrador que cuenta l’anécdota pero prescinde de la moralina. ¿Ye’l tiempu lo que permite alcanzar esa mirada qu’equilibra la distancia cola xusta midida d’emotividá?

Ye posible, que seya’l tiempu, quiciabes tamién el mieu a la trampa de les apariencies o de los comencionalismos. Préstame trabayar cola falta d’harmonía de los tiempos históricos, coles verdaes escachaes, cuando non rotes, poles ideoloxíes; tamién, claro, cola ilusión daqué infantil de los navegantes que siempre travesaren tiempos y fronteres. De toes formes, como llector siempre me prestó que la frase última camudase en grana de pensamientu. Si amás m’emocionaba, de xuru, que la vida diba agradece-ylo con xenerosidá. Si pieslles la ventana nunca va correr l’aire.

Intercales la primer persona en dalgunos testos, cola tercera d’otros y, davezu, la interpelación a un oyente-llector cómpliz. ¿Yera la forma de trazar una mapa completa de la situación?

Nun sé, si mapa completa, pero sí de situaciones posibles d’un personaxe que quier espresase dende la intimidá pero en diálogu cola redolada. En rellación continua col otru del qu’aprende tolo terrible y guapo que-y muestra la vida. Lo principal ye que nada hai estático na mirada, por eso, a veces, busques nuna desconocida la compañía.

Cambiando de tema ensin cambiar en verdá: na to relación costante cola lliteratura asturiana, tas acabante de sacar un nuevu númberu de la revista Lliteratura que destaca, ente otres coses, pol procuru con que ta fecha y pola so lonxevidá. ¿Cuáles son les motivaciones d’esta publicación que permiten que se mantega intacta col tiempu?

Lliteratura naz col comencimientu personal ya de l’Academia de la Llingua Asturiana de que yera interesante contribuyir con una revista que mostrare una cierta visión de conxuntu de la creación de ca momentu. Autores variaos, estétiques, en dellos casos, estremaes, sólo cola busca d’una calidá representativa. Pensamos que la presentación debía tar al altor del conteníu, nun podía prestáse-y menos cuidáu. En 29 númberos hai llogros mayores o menores pero, en conxuntu, muestren una parte relevante de lo que ta siendo la nuestra lliteratura actual. La so esistencia ye un relieve más de la yá llarga llucha de la lliteratura asturiana pola visibilidá, del llabor incansable d’unos escritores y del coraxe de la institución que-y da l’amparu.

Apocayá visitabes Asturies pa presentar un nuevu númberu de la colección Deva de poesía que dirixes. ¿Cuál ye l’espíritu d’esta colección?

Siempre se quixo combinar la espublización de llibros de poemes d’autores estimaos con otros d’autores cuasi noveles, asturianos na mayor midida, pero tamién d’otros llugares. Dacuando dalgún númberu estraordinariu, como les antoloxíes de poesía asturiana o italiana. Nel so catálogu alcuéntrese dellos nomes significativos de la llírica actual en castellanu.

De contino testes inéditos mesmo pa la revista Lliteratura que pa Deva. ¿Cómo ves el panorama nesti momentu?

De dalguna manera son dos panorames pero, simplificando muncho, si vamos, como vamos, al lleer, al resultáu creativu namái, al testu puramente, alcontramos una situación asomeyada en cuanto a la calidá o a la so falta. Nos dos casos hai incorporación contínua de valores nuevos, la diferencia ye sólo cuantitativa, y nello inflúi amás del númberu de población falante la mui estremada consideración social, política y cultural.

¿Nótense más dificultaes pa sacar alantre estes publicaciones qu’hai unos años?

Sí, aumenten los problemes financieros. La política de recortes escomanaos dexa a les entidaes que financien les publicaciones nuna situación mui delicada.

Fuisti presidente del Atenéu Obreru de Xixón. ¿Qué significó pa ti esta entidá?

El resurdimientu del Aténeu Obreru de Xixón llógrase gracies al llabor constante d’un equipu mui animosu. Habría de citar a un bon númberu de persones, delles, antiguos socios, cola terrible experiencia de la represión o la cárcel, como Fernando Rionda. Daniel Palacio, con entusiamu, xuntaba a toos, a los que daquella yeramos más nuevos y a los qu’en plena mocedá se incorporaben al proyectu. Yo tuvi nello hasta 1993, como presidente los últimos años, agora nun m’alcuerdo de cuántos, enantes tuviere de secretariu. Foi una etapa de la mio vida mui rica, deprendí muncho de la xente, de la xenerosidá, de la ilusión, de la posibilidá, cumplida, de crear dalgo importante pa la ciudá. Daquel equipu quedaren recuerdos imborrables, de los que yá nun tán, la so manera entregada de superar les llimitaciones. Los mozos d’entós siguieren creyendo nel Atenéu, ehí siguen y somos amigos.

Dende Madrid non solo nun escaeces los tos vínculos con Asturies, sinon que los estrenches al traviés de los autores asturianos que vivís ellí y que vos reunís nuna tertulia. ¿En qué consisten eses cites?

Quedamos los miércoles nun café, agora llevamos una temporadina nun llugar mui prestosu pa los que somos llambiones. Vamos cuando podemos, son alcuentros d’amistá, asina lo fiximos dende’l principiu. Fálase de to lo que nos esmolez, de lo lliterario, de lo propio pero tamién de lo ayeno, del mundu y de lo que vamos viendo d’Asturies. Tampoco somos indiferentes al clima, sobre too, a los bastiazos políticos de los últimos tiempos. Na tertulia nun sólo tamos asturianos (Herme G. Donis, Berta Piñán, Esther Muntañola…) tamién José Javier González (el fotógrafu), madrileñu, y otros, ente los fixos y los que van dacuando. Siempre salimos reconfortaos de les hores pasaes. Llegáu’l momentu podríemos falar tamién de trabayos ellí fraguaos, son yá unos cuantos, por exemplu: la collaboración fotográfica, escelente y desinteresada, de José Javier González na revista Lliteratura.

¿Cuálu ye l’análisis que facéis dende esa distancia cercana sobre Asturies?

¡Uhm, Vanessa! ¡Hai tantes coses que se mecen! Por citar dalgo no que podríemos tar toos d’acuerdu, nes conversaciones sal dacuando: la pena que produz la falta de ventanes pa mostrar lo bono que se fai, tamién pa que cuerra l’aire adientro. Un espaciu un tanto afogadizu.

(28 d’abril de 2012)

(Fotografías de José Javier González)